Presidenti Emmanuel Macron mbërriti në Gjermani të dielën për vizitën e parë shtetërore të një kreu të shtetit francez në 24 vjet. Vizita treditore synon të vë në pah lidhjet e forta midis fuqive tradicionale udhëheqëse të Bashkimit Evropian, raporton agjencia “AP”.
Vizita fillimisht ishte menduar të bëhej korrikun e kaluar, por u shty në minutën e fundit për shkak të trazirave në Francë pas vrasjes së një 17-vjeçari nga policia.
Derisa Macron është një vizitor i shpeshtë në Gjermani, pasi Parisi dhe Berlini përpiqen të koordinojnë pozicionet e tyre mbi BE-në dhe politikën e jashtme, kjo është vizita e parë shtetërore me madhështi të plotë që nga vizita e Jacques Chiracut në vitin 2000. Macron dhe gruaja e tij, Brigitte, u pritën nga presidenti i Gjermanisë, Frank-Walter Steinmeier.
Vizita vjen pasi Gjermania feston 75 vjetorin e Kushtetutës së saj të pas Luftës së Dytë Botërore.
Steinmeier do të organizojë një ndejë shtetërore për Macronin në pallatin e tij Bellevue në Berlin të dielën në mbrëmje përpara se të dy presidentët të udhëtojnë të hënën në qytetin lindor të Dresdenit, ku Macron do të mbajë një fjalim dhe të martën në Muenster në Gjermaninë perëndimore, raporton Associated Press.
Gjermania dhe Franca, të cilat kanë ekonomitë më të mëdha të BE-së, janë parë prej kohësh si “motori” i integrimit evropian, megjithëse shpesh ka pasur dallime në politikë dhe theksim midis dy fqinjëve për një sërë çështjesh.
Kjo ishte e dukshme në fillim të këtij viti në qëndrime të ndryshme nëse vendet perëndimore duhet të përjashtojnë dërgimin e trupave tokësore në Ukrainë. Të dy vendet janë mbështetëse të forta të Kievit.
