Kandidati i Partisë Republikane për president të Shteteve të Bashkuara të Amerikës, Donald Trump, po udhëheq në projeksionet e CNN-it dhe Associated Press, për zgjedhjet e 5 nëntorit. Megjithatë, gara e ngushtë përballë Kamala Harrisit në disa shtete të papërcaktuara, e ka bërë rezultatin final vështirë të parashikueshëm.
Përcaktohet një nga shtatë shtetet e “fushëbetejës”
Donald Trump pritet të fitojë në Karolinën e Veriut, një nga shtatë shtetet që do ta përcaktojnë presidentin e ardhshëm të Shteteve të Bashkuara të Amerikës, sipas projeksionit të AP-së.
Trumpi ka 230 vota elektorale, ndërsa Harrisi ka 187.
Sipas projeksioneve të AP-së, Harrisi ka fituar në Connecticut (7 vota elektorale), Delaware (3), Illinois (19), Massachusetts (11), Maryland (10), New Jersey (14), New York (28), Rhode Island (4), Vermont (3), Colorado (10), Washington (12), District in Maine (1), Kalifornia (54), D.C. (3), Oregon (8).
Ndërsa Trumpi është projektuar të fitojë në Wyoming (3), West Virginia (4), Tennessee (11), South Dakota (3), Karolinën e Jugut (9), Oklahoma (7), Ohio (17), Nebraska (2), Distrikti i Tretë i Nebraskas (1), North Dakota (3), Mississippi (6), Missouri (10), Louisiana (8), Texas (40), Kentucky (8), Indiana (11), Florida (30), Arkansas (6), Alabama (9), Montana (4), Utah (6), Kansas (6), Iowa (6), Idaho (4), Karolina e Veriut (16 vota).
Shtetet e tjera që pritet ta përcaktojnë rezultatin janë Pensilvania, Georgia, Michigani, Arizona, Wisconsini dhe Nevada.
S’ka befasi në bastione, shtetet e papërcaktuara pritet ta vonojnë procesin
Washington, 5 nëntor – Kandidati i Partisë Republikane për president të Shteteve të Bashkuara të Amerikës, Donald Trump, po udhëheq në projeksionet e CNN-it dhe Associated Press, për zgjedhjet e 5 nëntorit. Megjithatë, gara e ngushtë përballë Kamala Harrisit në disa shtete të papërcaktuara, e ka bërë rezultatin final vështirë të parashikueshëm.
Rezultatet e para të votave elektorale nuk kanë qenë befasuese. Trumpi ka fituar shumicën e bastioneve të Partisë Republikane, ndërsa Harrisi tek ato të Partisë Demokratike. Nga projeksionet e CNN-it dhe “Associated Press” në rreth 30 shtete, Trumpi ka siguruar të paktën 214 vota në Kolegjin Zgjedhor, ndërsa Harrisi ka 179 vota elektorale. Për t’u bërë president, kandidatit i duhen 270 vota elektorale nga gjithsej 538 sa i ka Kolegji Zgjedhor. Numërimi konsiderohet i mbyllur në më shumë se gjysmën e shteteve. Kandidati republikan që synon rikthimin në Shtëpinë e Bardhë, po prinë edhe me votë popullore. Nga numërimi i më shumë se 90 milionë votave popullore, 78-vjeçari prin me mbi 52 për qind.
Përderisa votat elektorale nga bastionet ishin të parashikuara, gara më e ashpër është në shtatë shtetet që konsideroheshin të papërcaktuara. Në asnjërin nuk ka projeksion për fitues, edhe për shkak se disa prej tyre procesin e votimit e kanë nisur më vonë, sipas kohës lokale. Në Georgia dhe Karolinën e Veriut ka nisur numërimi, por se rezultati është shumë i ngushtë për t’u konsideruar i sigurt. Si pasojë, pritet që procesi të marrë kohë deri në përfundim. Një tjetër vend që konsiderohet kyç për procesin final është Pensilvania. Aty, kur numërimi ka shkuar në mbi 50 për qind të votave, Trumpi për herë të parë ka dalë si udhëheqës duke tejkaluar Harrisin që printe që prej fillimit. Dallimi është më pak se dy për qind në shtetin që i ka 19 vota elektorale. Rëndësinë e këtij shteti e ka theksuar edhe kandidati republikan, Donald Trump, që në orët e para të procesit të numërimit, në një paraqitje në një radio në Filadelfia, u shpreh se po që se fiton në Pensilvani, e fiton krejt garën. Po ashtu gjatë ditës, Trumpi në rrjetin e tij social “Truth” ka hedhur akuza për dallavere me vota në Pensilvani.
Wisconsini është tjetër shtet në mesin e shtatë të papërcaktuarve. Aty në vazhdimësi ka pasur ndryshim në listën e kandidatit që i prinë garës.
Republikanët janë duke udhëhequr edhe për Senatin e Dhomën e Përfaqësuesve. Gara është për 34 nga 100 vendet e Senatit amerikan.
Proces i qetë
Amerikanët u janë drejtuar kutive të votimit që nga ora 5:00, sipas kohës lokale, për ta zgjedhur presidentin e 47-të në historinë e Shteteve të Bashkuara të Amerikës.
Votuesit janë përballur me zgjedhje të vështirë midis dy kandidatëve, zëvendëspresidentes Kamala Harris, që përfaqëson demokratët, dhe ish-presidentit Donald Trump, që përfaqëson republikanët. Ata kanë ofruar vizione të ndryshme për ekonominë më të madhe në botë dhe fuqinë dominuese ushtarake.
Harris ka mbrojtur të drejtat e abortit dhe është zotuar t’i ulë kostot e ushqimit dhe strehimit për familjet që punojnë.
E, Trumpi është zotuar ta mbyllë kufirin dhe ka propozuar ulje taksash me vlerë prej trilionë dollarësh.
Në SHBA mbi 80 milionë njerëz kishin votuar në procesin e njohur si “paravotim”.
Ata që hodhën votat të martën u përballën kryesisht me proces të qetë në të gjithë vendin, me disa parregullsi të vogla që ndodhin rregullisht, duke përfshirë radhët e gjata, çështjet teknike dhe gabimet në shtypjen e fletëvotimeve.
Agjencia amerikane për siguri kibernetike ka thënë se nuk ka incidente të mëdha që ndikojnë në infrastrukturën e zgjedhjeve në SHBA, ka raportuar “CNN”.
Mot ekstrem dhe “ndërprerje e përkohshme e infrastrukturës” janë raportuar në pjesë të SHBA-së, ndërsa votuesit po u drejtohen qendrave të votimit për ta zgjedhur presidentin.
“Nuk ka ndonjë incident të madh në nivel kombëtar që ndikon në sigurinë e infrastrukturës sonë zgjedhore. Ne jemi duke gjurmuar raste të motit ekstrem dhe ndërprerje tjera të përkohshme në infrastrukturë në zona të caktuara, por këto janë kryesisht ngjarje të pritshme”, ka thënë Cait Conley, këshilltare e lartë në Agjencinë për Sigurinë Kibernetike dhe Infrastrukturën e Sigurisë.
Ajo s’ka treguar se në cilat zona kanë ndodhur “ndërprerjet” e vogla.
Shkaku i pengesave teknike në disa qarqe u aprovua edhe vazhdimi i votimit për disa orë më tepër.
Në Michigan agjentët e FBI-së kanë arrestuar dy persona për kërcënime të lidhura me zgjedhjet, sipas “The Detroit News”.
Media me bazë në Michigan ka raportuar se një i dyshuar ishte i lidhur me një komplot vrasjeje që synonte Donald Trumpin.
Burri me emrin Isaac Sissel dyshohet se postoi në Reddit me emrin e përdoruesit "ShootUpTrumpRally" dhe që atëherë u ka thënë hetuesve se beson se "çdo gjë do të ishte më mirë nëse Trumpi do të kishte vdekur".
Në çështjen e dytë penale të zbardhur të martën, Christopher Clay Pierce, 46 vjeç, akuzohet për kërcënime kundër një komiteti të veprimit politik të paidentifikuar (PAC) të lidhur me demokratët gjatë dy vjetëve të fundit.
Pierce thuhet se ishte paralajmëruar më parë nga FBI-ja se ai mund të akuzohej për një krim nëse vazhdonte të postonte kërcënime në internet, por vazhdonte të ngacmonte grupin e lidhur me demokratët.
Rrjedhja e votimit
Vermonti ishte shteti i parë që hapi qendrat e votimit, teksa disa orë më pas u hapën edhe në vende të tjera si në Arizona.
Gara më e ngushtë mes kandidatëve u zhvillua në shtetet vendimtare sikurse janë Pensilvania, Wicsonsini, Georgia e Michigani.
Dy kandidatët kaluan orët e fundit të fushatës në Pensilvani, shteti më i madh i pavendosur, duke bërë përpjekje që t’i bindin qytetarët t’ua hedhin votën.
Rezultati në Dixville Notch, një fshat në New Hampshire, i cili, sipas traditës, i hap qendrat e votimit menjëherë pas mesnate, ishte një paralajmërim i asaj që pritej të ndodhte pak orë më vonë. Dixville Notch ka vetëm 6 votues të regjistruar e të cilët ndanë votën përgjysmë për Harrisin dhe Trumpin.
Edhe sondazhet paraqesin rezultate aq të ngushta saqë gara po konsiderohet si ndër më interesantet ndonjëherë.
Trumpi kaloi orët e para të ditës së zgjedhjeve në Michigan, ku përfundoi një tubim natën vonë në Grand Rapids. Pjesën tjetër të ditës kandidati republikan e kaloi në Floridë, ku edhe votoi.
Harris mori pjesë në natën e zgjedhjeve në Universitetin Howard në Uashington, ku ajo u diplomua në ekonomi dhe shkenca politike, në vitin 1986.
Optimizmi i Trumpit
Ish-presidenti Donald Trump hodhi votën e tij në Floridë.
Kandidati republikan për president votoi në qendrën e votimit në Palm Beach me bashkëshorten Melania Trump.
Trumpi foli pasi votoi. Ai tha se s’beson se do të dihet fituesi qysh në natën e zgjedhjeve.
“Një gjë e tillë nuk duhet të ndodhë kurrë”, ka thënë ai, derisa ka shtuar se ndihet “shumë optimist”.
“Dëgjoj se po ia dalim shumë mirë”.
Trumpi ka shtuar se rezultati mes dy kandidatëve as që “do të jetë i afërt”, porse do të marrë kohë për t’u certifikuar.
Ai tha se nuk beson se i duhet t’u thotë mbështetësve të tij se nuk duhet të ketë dhunë dhe se ata duhet të pranojnë rezultatet e zgjedhjeve nëse ai humb.
“Nuk kam pse t’ua them këtë”, ka thënë ai, kur u pyet nëse do t’u thotë mbështetësve të tij se nuk duhet të ketë dhunë.
“Por, a do t’u thoshit?”, u pyet ai.
“Nuk kam pse t’u them atyre se nuk do të ketë dhunë. Sigurisht se nuk do të ketë dhunë. Mbështetësit e mi nuk janë njerëz të dhunshëm. Nuk kam pse t’ua them. Dhe sigurisht se nuk dua dhunë, por qartazi nuk kam pse t’ua them. Këta janë njerëz të mrekullueshëm. Këta janë njerëz që nuk besojnë në dhunë. Ndryshe nga pyetja juaj. Ju besoni në dhunë”, ka theksuar Trump.
Bota në pritje të presidentit të ri
Bota nuk e zgjedh presidentin e SHBA-së, por ndikimi i zgjedhjeve vërehet gjithandej.
Është një vendim që do të ketë ndikim global, duke nisur nga luftërat në Gazë dhe në Ukrainë e deri te tregtia.
Sa i përket Izraelit dhe luftërave që po zhvillon në Gazë dhe Liban, zëvendëspresidentja Harris ka avokuar prej kohësh për zgjidhje me dy shtete midis izraelitëve dhe palestinezëve. Ajo ka deklaruar se nëse vihet në krye të Shtëpisë së Bardhë, do të përpiqet që t’i japë fund luftës sa më shpejt.
Në anën tjetër, ish-presidenti Trump ka politikë të jashtme izoluese dhe dëshiron që SHBA-ja të shkëputet nga konfliktet nëpër botë. Ai e ka pozicionuar veten si mbështetës të palëkundur të Izraelit, por ka folur pak për t’i dhënë fund luftës në Gazë.
Lidhur me luftën në Ukrainë, ukrainasit shqetësohen se Trumpi do të imponojë një marrëveshje të shpejtë, të favorshme për Rusinë. Ata shpresojnë se me Harrisin presidente do të vazhdohet mbështetja e Ukrainës në fushëbetejë.
Presidenti ukrainas, Volodymyr Zelensky, ka komentuar zgjedhjet duke thënë se Kievi është i përgatitur edhe me rrethanën nëse Trumpi fiton.
“Nuk kam dëgjuar që ai ka thënë se nuk do të mbështesë Ukrainën. Por sigurisht ne i kuptojmë të gjitha rreziqet. Nuk jam i sigurt se Trumpi, nëse do të zgjidhet president, ai dëshiron të humbasë. Por sidoqoftë, kjo është arsyeja pse Ukraina ka planin e saj të përkohshëm, se si të forcohet vetë. Do të jetë shumë e vështirë”, ka deklaruar Zelensky ditë më parë.
Megjithatë, në Rusi, presidenti Vladimir Putin sheh shumë pak ndryshim midis Trumpit dhe Harrisit për Ukrainën. Ai beson se të dy do të jenë më pak të përkushtuar ndaj Ukrainës sesa Joe Bideni.
Harrisi është zotuar ta mbështesë Ukrainën “për aq kohë sa duhet”. Ndërkaq Trumpi ka thënë se do t’i japë fund luftës brenda 24 orësh përmes një marrëveshjeje të negociuar me Rusinë.
Për Evropën këto zgjedhje në SHBA konsiderohen si fundi i një epoke, cilido qoftë rezultati.
Shumica e liderëve evropiano-perëndimorë janë thellësisht të shqetësuar. Ka drojë se ekonomia do të pësojë katastrofë, nëse jetësohet deklarata e Trumpit për vendosjen e tarifave prej 20 për qind për gjithçka që i shitet Amerikës, duke përfshirë eksportet evropiane.
Shqetësime janë ngritur edhe për sigurinë, meqë Trumpi ka folur vazhdimisht edhe për largimin nga NATO-ja.
“Kushdo që i fiton këto zgjedhje ne do të punojmë me Kamala Harrisin, do të punojmë me Donald Trumpin dhe do të sigurohemi që aleanca të qëndrojë e bashkuar. Është në interesin tonë, por edhe të Shteteve të Bashkuara, sepse ata nuk janë për të përsëritur gabimin e tërheqjes nga Evropa pas Luftës së Parë Botërore. Në një moment të tillë, një Rusi e guximshme është në krahun tonë lindor dhe do të paraqesë një kërcënim të drejtpërdrejtë për territorin e NATO-s”, është shprehur Rutte.
Ka një besim se nëse Harris fiton, do të presë që evropianët të bëjnë më shumë për veten e tyre, pasi Bideni është presidenti i fundit i SHBA-së që personalisht është i lidhur me aleancën e krijuar në luftën e ftohtë.
Kina ka një rol tjetër të rëndësishëm në politikën ndërkombëtare. Njerëzit në Pekin janë të ndarë se cili kandidat do të ishte më i mirë për Kinën.
Zyrtarët ekonomikë kinezë janë të vetëdijshëm se Trumpi ka bërë thirrje për tarifa të përgjithshme mbi eksportet e Kinës, të cilat mund të përbëjnë një kërcënim serioz për ekonominë e Kinës. Ky është një vend që është jashtëzakonisht i varur nga kërkesa e huaj, veçanërisht nga Amerika, për t’i mbajtur fabrikat e tij në funksion dhe punëtorët e punësuar.
Ndërkohë bota e politikës së jashtme kineze sheh avantazhe me fitoren e Trumpit.
Kina ndihet gjithnjë e më e ngufatur nga përpjekjet e SHBA-së, veçanërisht nga administrata Biden, për t’i forcuar aleancat më shumë nga fqinjët e Kinës: Japoninë, Korenë e Jugut, Filipinet, Indinë dhe mbi të gjitha Tajvanin. Harris ndoshta do t'i vazhdonte ato përpjekje. Trumpi është shumë më pak i përkushtuar për ndërtimin dhe ruajtjen e aleancave ndërkombëtare.
Dhe Trumpi ka treguar gjithashtu shumë më pak interes për ta mbrojtur Tajvanin, gjë që është shumë e mirëpritur nga Pekini.
Trumpi i pari pas numërimit të mbi 50 milionë votave
Sipas projeksioneve të AP-së, Harrisi ka fituar në Connecticut (7 vota elektorale), Delaware (3), Illinois (19), Massachusetts (11), Maryland (10), New Jersey (14), New York (28), Rhode Island (4), Vermont (3), Colorado (10), Washington (12), District in Maine (1), Kalifornia (54), D.C. (3).
Ndërsa Trumpi është projektuar të fitojë në Wyoming (3), West Virginia (4), Tennessee (11), South Dakota (3), South Carolina (9), Oklahoma (7), Ohio (17), Nebraska (2), Distrikti i Tretë i Nebraskas (1), North Dakota (3), Mississippi (6), Missouri (10)
Trumpi ka 214 vota elektorale, ndërsa Harrisi 179.
Deri tash, rezultatet janë të pritshme.
Harrisi ngushton diferencën
Photo: Associated Press
Kandidatja demokrate Kamala Harris është projektuar ta fitojë Illinoisin, sipas AP.
Illinoisi ka 19 vota elektorale.
Harris ka 71 vota elektorale, ndërsa Trumpi 101, sipas projeksioneve që ka publikuar AP-ja deri tash.
Trumpi po prin
Trumpi pritet ta fitojë edhe Karolinën e Jugut e Arkansasin.
Harrisi pritet të fitojë në New Jersey, Rhone Island, Conneticut e Delaware.
Trumpi ka 101 vota elektorale, ndërsa Harrisi 52 deri tash.
Dalin projeksionet për tetë shtetet e tjera
Donald Trump është parashikuar të fitojë në Alabama, Florida, Missouri, Oklahoma dhe Tennessee, raporton BBC.
Kamala Harris pritet të fitojnë në District of Columbia (Uashington), Maryland dhe Massachusetts.
Trumpi është projektuar të fitojë edhe në Kentucky, Indiana dhe West Virginia.
Harrisi pritet të fitojë në Vermont.
Të gjitha këto janë në përputhje me pritshmëritë, sipas historisë së votimit të secilit shtet.
Me projeksionet e publikuara deri tash, Trumpi prin me 90 vota elektorale, ndërsa Harrisi ka 27.
Trumpi fiton edhe katër vota elektorale
Photo: Associated Press
Kandidati republikan Donald Trump do ta fitojë West Virginian, sipas projeksionit të CNN-it.
Ai do të marrë katër vota elektorale nga ky shtet.
Paraprakisht, Trumpi është parashikuar ta fitojë edhe Kentuckyn dhe Indianan.
Harrisi është projektuar të fitojë në Vermont.
Janë rezultate të pritshme.
Serwer: Nëse Trumpi fiton do të ketë përpjekje për ndarje të Kosovës dhe Bosnjës
Daniel Serwer
Photo: Alban Bujari
Daniel Serwer, profesor amerikan në universitetin Johns Hopkins, ka thënë se nëse zgjedhjet amerikane i fiton kandidati republikan Donald Trumpi atëherë do të ketë menjëherë përpjekje për ndarje të Kosovës, Bosnjën dhe Ukrainës.
Në një intervistë në “Interaktiv”, Serweri u pyet nëse Trumpi do të ketë synime të tjera si ajo e shtatorit 2020 kur liderët e Kosovës dhe Serbisë nënshkruan Marrëveshjen e Uashingtonit – e cila nuk gjeti zbatim.
“Por unë mendoj se ata do të përpiqen ta bëjnë këtë, por me një marrëveshje shumë më të madhe për ndarjen. Por nuk mendoj se ndarja do ta presë 20 janarin. Unë mendoj nëse Trumpi fiton, ka të ngjarë të shihni përpjekjet për ndarjen e Bosnjës dhe Hercegovinës dhe Kosovës të iniciuara shumë përpara 20 janarit. E dini, Serbia do të përpiqet të përfitojë nga një lëvizje e dobët e Shteteve të Bashkuara dhe të shkojë drejt asaj që mendon se administrata Trump do të inkurajonte gjithsesi. Sigurisht. Kjo është aj ajo që unë imagjinoj”, ka thënë ai.
VIDEO:
Bideni ende beson se do ta kishte mundur Trumpin
Photo: Associated Press
Edhe pse presidenti amerikan Joe Biden nuk e di se si do të përfundojë gara e nxehtë mes zëvendëspresidentes, Kamala Harris dhe ish-presidentit, Donald Trump, sipas burimeve ai beson një gjë me siguri: Se do ta kishte fituar këtë garë, raporton CNN.
Njerëzit e afërm me Bidenin kanë thënë se, duke e pasur parasysh favorizimin e tij në mesin e votuesve të klasës së bardhë punëtore, ai beson se do t’i kishte fituar shtetet e Murit të Kaltër, që zyrtarët e fushatës së Harrisit tani thonë janë rruga e saj drejt fitores.
Duke parë rolin qendror të këtyre votuesve në fitoren e Trumpit në vitin 2016, Bideni dhe këshilltarët e tij më të afërt gjithashtu besojnë se Trumpi nuk do ta kishte fituar kurrë mandatin e parë ose se do të arrinte të rikthehej në Shtëpinë e Bardhë.
I pyetur nëse Bideni shqetësohet se do ta mbajë fajin për trajektoren e kësaj gare nëse Harris nuk fiton, një këshilltar i lartë i presidentit i tha CNN-it se “presidenti është më i shqetësuar për atë që do t’i ndodhte vendit nëse ndodh kjo”.
CNN: Trumpi planifikon t’i keqpërdorë vonesat në vendvotime
Teksa kandidati republikan, Donald Trump po i pret rezultatet e zgjedhjeve ai pritet t’i përsërisë lëvizjet e njëjta që ka përdorur ndër vite: të përdorë çdo lloj vonese, qoftë gabim i teknologjisë ose i njerëzve, në vendvotime dhe ta ekzagjerojë për t’ia përshtatur narrativës së tij për mashtrimet zgjedhore, raporton CNN.
Trump veç se ka filluar të pretendojë se ka raportime të mashtrimeve masive në Filadelfia, edhe pse zyrtarët thonë se nuk ia kanë idenë për çfarë po flet ai dhe se nuk ka asgjë të vërtetë në këtë supozim.
Por ka një ndryshim të madh nga 2020-ta. Trumpi nuk ka kontroll mbi Departamentin e Drejtësisë ose ndonjë zyrtarë të lartë për t’i bërë presion, siç ka bërë me prokurorin e përgjithshëm, Bill Barr, katër vjet më parë.
Projeksioni i AP-së: Trumpi fiton Kentuckyn dhe Indianan, Harrisi në Vermont
Kandidati republikan Donald Trump do t’i fitojë shtetet e Kentuckyt dhe Indianas, ndërsa demokratja Kamala Harris do të jetë e para në Vermont, sipas projeksionit të Associated Press.
Indiana ka 11 vota elektorale, ndërsa Kentucky ka tetë.
Vermonti i ka tri.
Indiana dhe Kentucky ishte parashikuar të fitoheshin nga republikanët, teksa Vermonti është bastion i demokratëve.
Një kandidat duhet t’i fitojë 270 vota elektorale për t’u zgjedhur president.
Dalin rezultatet e para
Kanë dalë rezultatet nga disa vendvotime në dy shtetet amerikane, Kentucky dhe Indiana. Këto shtete janë të sigurta që fitohen nga republikanët.
Në Indiana, që ka 11 vota elektorale, janë numëruar 1 për qind e votave.
Republikani Donald Trump aktualisht ka 70.7 për qind të votave dhe Kamala Harris 27.6 për qind.
Në Kentucky, që ka tetë vota elektorale, u numëruan 1.9 për qind e votave.
Trumpi aktualisht ka 65.1 për qind të votave dhe Harris 33.7 për qind.
Rreth 10 vendvotime në Georgia do të rrinë të hapura më gjatë, shkak i ndërprerjeve nga kërcënimet
Rreth 10 vendvotime në një pjesë të qarqeve të Georgias do të rrinë të hapura më gjatë për shkak të kërcënimeve që kanë ndërprerë procesin e votimit, sipas Sekretarit të Shtetit të Georgias, Brad Raffensperger.
“Janë rreth 10”, ka thënë Raffensperger, duke iu referuar vendvotimeve që do të zgjasin deri në orën 7 në kohën lokale.
“Dhe mund të shtyhen për rreth 20 deri në 40 minuta”, ka shtuar sekretari për zgjatjen e procesit të votimit.
Zyrtari i lartë i zgjedhjeve të Georgias ka thënë se pjesëmarrja përgjatë shtetit ka qenë mjaft e lartë, në total po arrin në 5.2 milionë pjesëmarrës, raporton CNN.
Mustafa: Demokratët i humbën shpresat me Bidenin, por Harrisi e ka kthyer lojën
Studiuesi i filozofisë, Latif Mustafa, ka thënë se demokratët i patën humbur shpresat teksa presidenti aktual Joe Biden ishte planifikuar të ishte kundërshtar i republikanit Donald Trump në zgjedhjet që po mbahen sot, por nominimi i Kamala Harrisit e ka kthyer lojën.
Sipas tij, demokratët bën “zgjedhje strategjike” kur zgjodhën Harrisin përballë Trumpit.
“Nëse zgjidhet, Kamala Harris do të shënonte sukses të ri në historinë politike të SHBA-së, do të bëhej presidentja e parë në histori. Harrisi është grua me ngjyrë me bindje social-demokrate apo liberale të majta e cila vjen nga drejtësia dhe kjo përzgjedhje nuk është bërë krejt rastësisht nga kampi demokrat por është bërë qëllimisht që ta sulmojë Trumpin sepse ai vjen nga një fushë ku ka bërë shkelje të shumta ligjore, është burrë maskulinist dhe ka politika anti-imigrante. Derisa ishte Bideni në fushatë, demokratët i patën humbur shpresat, por Kamala Harris e ka kthyer lojën dhe fitorja e saj do të ishte mrekulli, ka thënë Mustafa në “Interaktiv”.
Exit-polli: Votuesit të shqetësuar për dhunë të mundshme
Photo: Associated Press
Ja disa nga të dhënat e hershme të exit-polleve në lidhje me mënyrën se si ndihen votuesit për procesin elektoral dhe demokracinë në SHBA, raporton BBC.
Tri e katërta e të pyeturve kanë thënë se ndihen sikur demokracia është “shumë” ose “në njëfarë mënyre” e kërcënuar në SHBA.
Shtatë nga 10 votuesit janë të shqetësuar nga dhuna si shkak i zgjedhjeve.
CBS ka thënë se kjo është hera e parë në histori, që exit-pollet kanë pyetur për perspektivën e votuesve ndaj dhunës, meqë lidhet veçanërisht me zgjedhjet presidenciale të SHBA-së.
Shtatë nga 10 votuesit janë të sigurt se zgjedhjet janë duke u mbajtur në mënyrë të drejtë dhe adekuate. Përkrahësit e Harrisit janë më të sigurt, ndërsa në mesin e mbështetësve të Trumpit vetëm gjysma e tyre.
Të dhënat janë nga marrë nga valët e para të të dhënave të exit-polleve, prandaj këta numra mund të ndryshojnë gjatë natës.
Çfarë ndodh nëse dy presidentët kanë vota të barabarta?
Në Shtetet e Bashkuara të Amerikës po mbahen zgjedhjet presidenciale dhe amerikanët mund të zgjedhin mes demokrates Kamala Harris dhe republikanit Donald Trump.
SHBA-ja ka sistem që nuk shikon se cili kandidat ka më shumë vota në nivel vendi, por numërohen votat elektorale në proporcion me numrin e banorëve të një shteti. Për shembull, shteti i Kalifornisë i ka 54 vota elektorale – më së shumti.
Janë gjithsej 538 vota elektorale, të cilët janë të ndara në 50 shtete dhe në kryeqytetin amerikan, Uashington.
Ekziston skenar sipas të cilit të dy kandidatët mund të marrin nga 269 vota elektorale, pra do të kishte rezultat të barabartë.
Kjo nuk ka ndodhur në historinë moderne amerikane, veçanërisht pasi zgjidhet midis dy kandidatëve, por Kushtetuta e SHBA-së ka zgjidhje edhe për këtë.
Nëse të dy kandidatët marrin numrin e njëjtë të votave elektorale, Kongresi Amerikan do të kishte fjalën e fundit. Dhoma e Përfaqësuesve do ta zgjidhte presidentin, ndërsa Senati do të zgjidhte zëvendëspresidentin.
Megjithatë, në Dhomën e Përfaqësuesve, përfaqësuesit, prej të cilëve janë 435, nuk do të votonin, por shtetet federale përmes përfaqësuesve do të kishin secila nga një votë.
Duhen 26 shtete për të zgjedhur një president dhe pikërisht ky numër aktualisht kontrollohet nga republikanët.
Në Senat, secili anëtar do të votonte veçmas, dhe demokratët kanë shumicën.
Me fjalë të tjera, është i mundur skenari paksa i pabesueshëm ku president do të ishte Donald Trump dhe zëvendësi i tij demokrati Tim Walz.
Por gjasat janë shumë të vogla për të ndodhur një skenar i tillë.
Ekipi i Harrisit optimist për fitore në vendin kyç
Përveç pjesëmarrjes së lartë në Filadelfia, ekipi i fushatës së kandidates demokrate Kamala Harris është inkurajuar edhe nga pjesëmarrja e lartë e puerto rikanëve dhe studentëve në Pensilvani, që i ka konsideruar si trendë që çojnë drejt fitores në vendin kyç të zgjedhjeve presidenciale, raporton “CNN”.
Radhët e votuesve në Universitetin Lehigh afër Allentown ka qenë shtatë orë e gjatë sot, sipas ekipit të Harrisit.
Ky ekip ka dërguar zëvendësues dhe mbështetës për t’i mbajtur studentët në linjë. Ata po punojnë gjithashtu për ta zgjatur orarin e votimit atje.
Në Filadelfia, sipas ekipit, tri objektet që kanë pasur numrin më të lartë të votuesve puerto-rikanë, të cilët konsiderohen plotësisht pro-Harris, gati ka arritur shifrat e pjesëmarrjes në zgjedhjet e vitit 2020.
Mbyllen qendrat e para të votimit
Photo: Associated Press
Janë mbyllur qendrat e para të votimit të zgjedhjeve në Shtetet e Bashkuara të Amerikës.
Qendrat janë mbyllur në Indiana dhe Kentucky. Pas tyre, pas një ore do të nisin t’i mbyllin qendrat edhe shtetet e tjera.
Exit-pollet e para pritet të dalin pas mbylljes së qendrave.
Çfarë thonë exit-pollet e para?
Exit-pollet në SHBA nuk parashikojnë drejtpërdrejt rezultatin e zgjedhjeve, por krijojnë një pasqyrë të opinioneve dhe motivimeve të votuesve.
CBS raporton se gjendja e demokracisë dhe ekonomia kanë qenë çështjet kryesore për të gjithë votuesit.
Nga ata që votuan për Harrisin:
Gati gjashtë në 10 persona e renditën gjendjen e demokracisë si çështjen e tyre numër një;
Rreth një në pesë persona e renditi abortin si numër një;
Pak më shumë se një në 10 zgjodhi ekonominë.
Nga ata që votuan për Trumpin:
Gjysma thanë se ekonomia ishte çështja e tyre numër një;
Një në pesë tha se migracioni ishte çështja kryesore;
Pak më shumë se një në 10 persona tha se rendit gjendjen e demokracisë si çështjen numër një. /REL
Trumpi po përgatitet të flasë sonte, thonë burime
Kandidati republikan për president i SHBA-së, Donald Trump, po planifikon që t’u adresohet disa mijëra mbështetësve të tij të cilët janë mbledhur në Qendrën e Konventës në Palm Beach gjatë natës, kanë bërë të ditura burime për CNN.
Trumpi u ka thënë gazetarëve më herët se nuk ishte i sigurt për planet e tij dhe se nuk kishte ndonjë fjalim. Por, burimet kanë thënë se presin që ai të flasë pavarësisht rezultateve.
Nëse Trumpi do të pretendojë fitoren ndërsa ende numërohen votat - siç bëri në mënyrë të rremë më 2020 – mbetet të shihet.
Elon Musk voton në Teksas
Biznesmeni Elon Musk ka votuar tashmë për zgjedhjet presidenciale në Shtetet e Bashkuara.
Musk, i cili është mbështetësi më i shquar i republikanit Donald Trump, ka hedhur votën e tij në Teksas, raportoi “The Guardian”.
“Sapo votova në Cameron County, Teksas, shtëpia e Starbase”, ka shkruar në platformën “X”, drejtori ekzekutiv i SpaceX dhe Teslas.
Starbase është selia e SpaceX-it , e vendosur afër Haëthorne, Teksas, një qytet rural në veri të Hustonit.
“New York Times” ka raportuar se Musk do ta kalojë mbrëmjen e zgjedhjeve me Trumpin në Mar-a-Lago.
Bordi zgjedhor i Karolinës së Veriut zgjat votimin në dy zona
Photo: Associated Press
Bordi i zgjedhjeve i Karolinës së Veriut ka mbajtur një mbledhje emergjente dhe ka aprovuar një orë e gjysmë shtesë për të votuar, në dy zona që thuhet se ishin përkohësisht të padisponueshme për votuesit herët të martën, për shkak të problemeve teknike, raporton "CNN".
Dy zonat e ndryshme – një në qarkun Burke në rajonin perëndimor të shtetit dhe një në qarkun Wilson, në lindje të Raleigh – tani do të mbyllen në orën 8 pasdite në orën lokale.
Zëdhënësi i bordit zgjedhor të shtetit, Patrick Gannon, tha se vendvotimi në qarkun Wilson kishte disa “probleme me printerin që bëri që votuesit të mos ishin në gjendje të votonin për një orë apo më shumë”.
Një problem me një laptop në qarkun Burke ka kontribuar në vonesë në vendvotim të martën në mëngjes, ka thënë Kenny Rhyne, drejtori i zgjedhjeve lokale.
Harris u bën thirrje qytetarëve që të votojnë
Photo: Associated Press
Kandidatja demokrate për presidente të SHBA-së, Kamala Harris, ka qëndruar në selinë e Komitetit Kombëtar Demokrat në Washington nga ku ka falënderuar ata që e kanë mbështetur fushatën e saj.
Ajo ka folur me disa qytetarë në telefon dhe i ka inkurajuar që të dalin për të votuar.
“Vetëm desha të kontrolloja dhe të sigurohesha se e dini ku mund të votoni sot nëse ende nuk keni votuar”, i ka thënë ajo njërit prej telefonuesve në seli.
Një qytetari tjetër është dëgjuar t’i thotë që “t’ia rikujtojmë njëri-tjetrit fuqinë e zërit, votës, sepse këto zgjedhje janë shumë të rëndësishme”.
15 shtete kanë mobilizuar personelin e Gardës Kombëtare për ditën e zgjedhjeve
Photo: Associated Press
Më shumë se 250 personel të Gardës Kombëtare po ofrojnë mbështetje për ditën e zgjedhjeve në 15 shtete, ka thënë një zëdhënës për CNN të martën.
Sipas zëdhënësit, personeli është mobilizuar në shtetet e mëposhtme: Alabama, Arizona, Delaware, Hawaii, Illinois, Iowa, New Mexico, Karolina Veriore, Oregon, Pensilvani, Tennessee, Texas, Washington, Wisconsin dhe West Virginia.
Më pak se gjysma e trupave po ndihmojnë me misionet e sigurisë kibernetike, ka thënë zëdhënësi në një deklaratë. Pjesa tjetër po ofrojnë mbështetje bazuar në kërkesat lokale.
Përveç kësaj, Byroja e Gardës Kombëtare ka thënë se rreth 85 anëtarë janë në gatishmëri në Kolorado, Washington, DC, Florida dhe Nevada.
Gjatë fundjavës, përpara trazirave të mundshme civile për shkak të zgjedhjeve presidenciale, Garda Kombëtare ka thënë se ishte në gatishmëri si masë paraprake në disa shtete, duke përfshirë Washingtonin dhe Oregon, ku qindra fletë votimi u dëmtuan ose u shkatërruan.
FBI: Kërcënimet me bombë në disa vendvotime duket se kanë origjinë nga Rusia
FBI-ja ka thënë të martën se kërcënimet me bomba në disa vendvotime në shtete të ndryshme të SHBA-së duket se e kanë origjinë nga emaila me domene ruse.
FBI-ja ka thënë se nuk është përcaktuar se ishin kërcënime të besueshme.
“FBI është në dijeni për kërcënime me bombë në vendvotime në disa shtete, shumë prej të cilave kanë origjinën nga emaila me domene ruse. Asnjë nga kërcënimet nuk është përcaktuar të jetë i besueshëm deri më tash”, ka thënë në deklaratë FBI-ja, raporton “CNN”.
FBI-ja arreston dy persona në Michigan për kërcënime zgjedhore
Photo: Associated Press
Agjentët e FBI-së kanë arrestuar dy persona në Michigan për kërcënime të lidhura me zgjedhjet, sipas The Detroit News.
Media me bazë në Michigan thotë se një i dyshuar ishte i lidhur me një komplot vrasjeje që synonte Donald Trumpin, raporton BBC.
Burri me emrin Isaac Sissel, dyshohet se postoi në Reddit me emrin e përdoruesit "ShootUpTrumpRally" dhe që atëherë u ka thënë hetuesve se beson se "çdo gjë do të ishte më mirë nëse Trumpi do të kishte vdekur".
Në çështjen e dytë penale të zbardhur të martën, Christopher Clay Pierce, 46 vjeç, akuzohet për kërcënime kundër një komiteti të veprimit politik të paidentifikuar (PAC) të lidhur me demokratët gjatë dy vjetëve të fundit.
Pierce thuhet se ishte paralajmëruar më parë nga FBI-ja se ai mund të akuzohej për një krim nëse vazhdonte të postonte kërcënime në internet, por vazhdonte të ngacmonte grupin e lidhur me demokratët.
Kosovës i kërkohet ta shtyjë para bashkëpunimin me SHBA-në pavarësisht fituesit
Cilido krah politik që merr drejtimin e Shtëpisë së Bardhë për katër vjetët e ardhshëm do t’i mirëmbajë raportet strategjike me Kosovën, ka thënë presidentja Vjosa Osmani të martën, në ditën e zgjedhjeve në SHBA.
Sipas saj, bashkëpunimi i dëshmuar SHBA-Kosovë do të vazhdojë edhe pas zgjedhjeve presidenciale, ku kandidatë janë republikani Donald Trump dhe demokratja Kamala Harris.
“Në kohën kur ne e kemi fituar lirinë në qeveri kanë qenë demokratët. Në kohën kur e kemi arritur pavarësinë në qeveri kanë qenë republikanët. Kosova vërtet ka qenë shtet i bekuar me përkrahje mbi partizane amerikane. Është vendim i popullit amerikan. Ne do të vazhdojmë bashkëpunimin me këdo që zgjidhet. Me rëndësi është që Shtetet e Bashkuara të Amerikës vazhdojnë të jenë lider të botës së lirë dhe aleati më i rëndësishëm strategjik i Kosovës. Ashtu do të vazhdojë do të jetë edhe pas kësaj date”, ka thënë Osmani.
Por gjatë katër vjetëve të Administratës Biden, e ku Harris është nënpresidente, ka munguar bashkëpunimi me Qeverinë e Kosovës, vlerësoi hulumtuesi i politikës së jashtme në “Demokraci Plus”, Artan Abrashi.
Ai ka shtuar se është e rëndësishme që Kosova ta shtrijë bashkëpunimin me cilindo prej kandidatëve që i fiton zgjedhjet.
“Ajo që është e rëndësishme është që ne të mos e kushtëzojmë bashkëpunimin tonë dhe lidhjen tonë me SHBA në bazë të individit, por duhet të bashkëpunojmë përtej linjave partiake. Presidenti Biden ka pasur një lidhje emocionale me Kosovën por qeveria Kurti nuk ka ditur ta shfrytëzojë atë. Prandaj pak rëndësi ka personi që fiton zgjedhjet, me rëndësi është që ne te kemi një strategji të qartë se si do t’i qasemi administratës së re amerikane”, ka thënë Abrashi.
Ai ka përmendur arritjen e marrëveshjes së Uashingtonit nga Qeveria Hoti, momentum të cilin thotë se nuk e ka shfrytëzuar Kurti nën udhëheqjen e Bidenit. Nën drejtimin e Trumpit, Abrashi shprehet se mund të ketë sërish lëvizje të tilla në dialogun Kosovë-Serbi.
“Në mes të dy kandidatëve qoftë demokratë apo republikanë ne kemi parasysh që në fund të mandatit të presidentit Trump ka pasur një tentativë që t’i qojë proceset përpara. Prandaj ka mundësi që në se z.Trump rizgjidhet në krye të Shtëpisë së Bardhë, çështja e dialogut për normalizim të marrëdhënieve me Serbinë të shtyhet deri në fund”, ka shtuar ai.
E në Lidhjen Qytetare Shqiptaro-amerikane shohin përparësi e mangësi në lidhje me Kosovën te dy nga kandidatët.
Anëtari i Bordit të kësaj Lidhjeje, Agim Aliqkaj, ka vlerësuar se bashkëpunimi me Harrisin do të mund të ishte më i lehtë për shqiptarët e Kosovës, ndonëse thotë se s’ka parë përparim sa i përket normalizimit të marrëdhënieve Kosovë-Serbi gjatë qeverisjes së Bidenit.
“Nëse fiton zonja Harris ne mendojmë se do të jetë më lehtë të punohet me të edhe pse administrata Biden nuk ka bërë për Kosovën dhe për çështjen e zgjidhjes së konfliktit me Serbinë sa duhet. Për arsye se ia ka lënë çështjen Evropës që ka qenë gabim shumë i madh sepse Evropa kurrë nuk mund ta zgjidhë këtë çështje kaq kapitale”, ka thënë ai.
Mirëpo, ai shpreh drojë por edhe shpresë me fitoren e mundshme të Donald Trump.
“Sa i përket administratës Trump, është pak më e rrezikshme për arsye se megjithatë veprimet e tij janë më të shpejta nganjëherë të pa parapara domethënë frikësohem se presidenti Trump është pak i paparashikueshëm dhe mund të shkojë edhe keq edhe mirë. Megjithatë unë mendoj se në anën strategjike, Amerika kurrë nuk do të qojë dorë prej Kosovës”, ka deklaruar ai.
Nga këto votime do të nxirret fitues presidenti i 47-të i SHBA-së.
Optimizëm në Gjorgjia se fituesi në këtë shtet do të dihet natën e zgjedhjeve
Photo: Associated Press
Sekretari i Shtetit të Gjorgjias, Brad Raffensperger është optimist se një fitues i Gjorgjias do të parashikohet në natën e zgjedhjeve.
Me më shumë se 4 milionë vota të hershme të hedhura tashmë dhe fletëvotimet e pranuara me postë, të gjitha ato duhet të ngarkohen dhe regjistrohen jo më vonë se një orë pas mbylljes së votimit, sipas Raffensperger.
Shumica e qendrave të votimit do të mbyllen në orën 19:00 deri në orën 20:00.
"Ju do të keni ndoshta 99% të gjithë kësaj, kështu që do të keni një ide të mirë se si duket gara”, ka thënë ai.
Shumë nga qarqet më të vogla të Gjorgjias po përpiqen të përfundojnë deri në orën 22:00 ose 22:30 më së voni.
Luiziana përballet me kërcënim nga një stuhi teksa zhvillohen votimet
Photo: Associated Press
Disa pjesë të Luizianës përballen me kërcënimin e stuhive të forta ndërsa votuesit shkojnë drejt qendrave të votimit.
Qendra e Parashikimit të Stuhive të CNN-it ka përmirësuar pjesë të shtetit në nivelin 2 nga kërcënimi 5 për mot të ashpër.
Të paktën një tornado është vërejtur pranë Lafayette dhe rritja e ajrit të ngrohtë dhe të lagësht mund të krijojë stuhi më kërcënuese.
Gjykata zgjat orët e votimit në një qark të Pensilvanisë pas një mosfunksionimi të softuerit
Photo: Associated Press
Një gjykatë e Pensilvanisë pranoi kërkesën e zyrtarëve zgjedhorë të qarkut Cambria që orët e votimit të zgjateshin deri në orën 22:00 sipas kohës lokale, pasi një mosfunksionim i softuerit ndërpreu skanimin e fletëvotimeve.
Fletët e votimit të hedhura pas orës 20:00 sipas kohës lokale, do të jenë fletë votimi provizore, thuhet në urdhrin e gjykatës, raporton CNN.
"Bordi Zgjedhor i Qarkut Cambria mësoi herët këtë mëngjes se një mosfunksionim i softuerit në Sistemin elektronik të votimit të qarkut i ka penguar votuesit të skanojnë fletëvotimet e tyre. Kjo nuk duhet t'i dekurajojë votuesit që të votojnë në zonat e tyre të votimit”, ka thënë zyra e Komisionerëve të Qarkut në një deklaratë të martën.
Në deklaratë theksohej se “do të numërohen të gjitha votat” dhe se banorët duhet të vazhdojnë të votojnë. Qarku Cambria është rreth 70 milje në lindje të Pittsburgut.
Trumpi voton, ndihet "shumë optimist"
Photo: Associated Press
Ish-presidenti Donald Trump ka hedhur votën e tij në Florida.
Kandidati republikan për president ka arritur në qendrën e votimit në Palm Beach me bashkëshorten, Melania Trump.
Trump ka folur pasi ka votuar. Ai është pyetur për mundësinë që as ai e as Kamala Harris të mos arrijnë 270 votat elektorale deri në fund.
“Një gjë e tillë nuk duhet të ndodhë kurrë”, ka thënë ai, derisa ka shtuar se ndihet “shumë optimist”.
“Dëgjoj se po ia dalim shumë mirë”.
Trumpi ka shtuar se rezultati mes dy kandidatëve as që “do të jetë i afërt”, por se do të marrë kohë për t’u certifikuar.
Trump ka deklaruar se nuk beson se i duhet t’u thotë mbështetësve të tij se nuk duhet të ketë dhunë dhe se ata duhet të pranojnë rezultatet e zgjedhjeve nëse ai humb.
“Nuk kam pse ua them këtë”, ka thënë ai kur u pyet nëse do t’u thotë mbështetësve të tij se nuk duhet të ketë dhunë.
“Por, a do t’u thoshit?” u pyet ai.
“Nuk kam pse u them atyre se nuk do të ketë dhunë. Sigurisht se nuk do të ketë dhunë. Mbështetësit e mi nuk janë njerëz të dhunshëm. Nuk kam pse ua them. Dhe sigurisht se nuk dua dhunë, por qartazi nuk kam pse ua them. Këta janë njerëz të mrekullueshëm. Këta janë njerëz që nuk besojnë në dhunë. Ndryshe nga pyetja juaj. Ju besoni në dhunë”, ka theksuar Trump.
Hapen qendrat e votimit në Alaska dhe Washington
Qendrat e votimit në Alaska dhe Washington janë hapur sapo ora ka shënuar 7 e mëngjesit atje.
Janë tri vota nga Kolegji Elektoral që duhen të merren në Alaska dhe 12 në Washington.
Hawaii do të jetë shteti i fundit amerikan që hap qendrat e votimit.
Agjencia për Siguri Kibernetike thotë se s’ka incidente të mëdha që prekin infrastrukturën zgjedhore
Photo: Associated Press
Agjencia amerikane për siguri kibernetike ka thënë se nuk ka incidente të mëdha që ndikojnë në infrastrukturën e zgjedhjeve në SHBA, raporton “CNN”.
Moti ekstrem dhe “ndërprerje e përkohshme e infrastrukturës” janë raportuar në pjesë të SHBA-së, ndërsa votuesit po i drejtohen qendrave të votimit për ta zgjedhur presidentin.
“Nuk ka ndonjë incident të madh në nivel kombëtar që ndikon në sigurinë e infrastrukturës sonë zgjedhore. Ne jemi duke gjurmuar raste të motit ekstrem dhe ndërprerje tjera të përkohshme në infrastrukturë në zona të caktuara, por këto janë kryesisht ngjarje të pritshme”, ka thënë Cait Conley, këshilltarja e lartë në Agjencinë për Sigurinë Kibernetike dhe Infrastrukturën e Sigurisë.
Ajo s’ka treguar se në cilat zona kanë ndodhur “ndërprerjet” e vogla.
Harris thotë se do të drekojë me familjen para natës së zgjedhjeve
Kandidatja demokrate për presidente e SHBA-së, Kamala Harris, do të marrë pjesë në darkën familjare – të cilën e quajti traditë – para se të kalojë ditën duke mobilizuar votuesit përmes intervistave.
Ajo ka thënë se pasi të mbyllen qendrat e votimit, do të jetë në gjirin familjar.
“Kam një traditë të ngrënit darkë me familjen time dhe kështu do bëjmë. Kam familjarë që qëndrojnë me ne. E gjatë tërë ditës do të jem duke folur me njerëzit dhe duke ua rikujtuar që të dalin të votojnë”, ka thënë Harris.
Harris ka inkurajuar votuesit në Pittsburgh që t’u drejtohen qendrave të votimit.
“Dua t’u bëj thirrje të gjithëve që të mbajnë në mend se në demokracinë tonë, njerëzit vendosin dhe vota juaj është fuqia juaj”
Zgjatet koha e votimit në një qark në Pensilvani për shkak të problemit me softuer
Photo: Associated Press
Koha e votimit është zgjatur në Cambria County, në Pennsylvani, pasi një "mosfunksionim i softuerit" pengoi aftësinë e votuesve për të skanuar fletët e votimit, ka bërë të ditur të martën Zyra e Komisionerëve të Qarkut.
Zyrtarët zgjedhorë në qark këmbëngulin se mosfunksionimi "nuk duhet të dekurajojë votuesit që të votojnë në qendrat e tyre të votimit”, raporton CNN.
"Bordi Zgjedhor i Qarkut Cambria mësoi herët këtë mëngjes se një mosfunksionim i softuerit në sistemin elektronik të votimit të Qarkut, i ka penguar votuesit të skanojnë fletëvotimet e tyre”, është thënë në një deklaratë nga Zyra e Komisionerëve të Qarkut.
"Bordi ka paraqitur një urdhër gjykate për zgjatjen e kohës për të votuar brenda Qarkut Cambria. Askush nuk duhet të largohet nga qendrat e votimit nëse dëshiron të japë votën e tij. Bordi i Zgjedhjeve i Qarkut Cambria mori masa për të thirrur specialistë të IT-së për të shqyrtuar çështjen e softuerit. Të gjitha fletët e votimit të kompletuara do të pranohen, sigurohen dhe numërohen nga Bordi i Zgjedhjeve”, thuhet më tej në deklaratë.
Voton kandidati republikan për zëvendëspresident
Kandidati republikan për zëvendëspresident, JD Vance, ka votuar në Ohio të martën, në qendrën e votimit në Cincinnati.
Ai u shfaq me humorr të mirë teksa mbërriti në qendër të votimit me bashkëshorten e tij, Usha dhe fëmijët e tij.
Pasi votoi, Vance ka deklaruar se zgjedhjet amerikane janë një nga traditat më të mëdha në demokracinë amerikane.
“Ndihem mirë, nuk e di kurrë derisa ta dish, por ndihem mirë për këtë garë...Shpresojmë që të shkojë po aq mirë për mua dhe presidentin Trump”, ka deklaruar ai.
Shumica e shteteve nisin votimin
Shumica e shteteve tashmë kanë nisur procesin e votimit.
Arizona, Iowa, Oklahoma, Teksasi, Kolorado, Wisconsin, Tennessee, Nebraska, Arkansasi, New Mexico, Utah, Mississippi, Minnesota, Montana, Dakota e Veriut dhe e Jugut.
Alabama, Delawere, Florida, Georgia, New Hampshire, Illinois, Indiana, Kansas, Louisiana, Maryland, Massachusetts, Michigan, Missouri, Pensilvania, Rhode Island dhe Wyoming kishin nisur më herët.
Për pak do të nisin edhe pak shtete që kanë mbetur.
Si duket fletëvotimi në SHBA
Photo: Associated Press
Amerikanët të martën po votojnë për president të ardhshëm, por fletëvotimi ka një pamje më ndryshe nga fletëvotimet e vendeve të tjera.
Fletëvotimi i bardhë i përmban edhe dy ose tri faqe të tjera, që pos kandidatëve për presidentë përfshijnë edhe garën për Dhomën e Përfaqësuesve dhe të Senatit.
BBC-ja ka raportuar se në fletëvotim radhiten edhe iniciativa dhe propozime lokale, të tilla si financimi dhe shërbimet komunitare. Që fletëvotimi të jetë i vlefshëm, qytetari amerikan duhet të zgjedh në rubrikë me shenjën (*) ose (X).
Tashmë disa shtete i kanë hapur vendet e votimit.
Osmani: Kosova e ka përkrahjen e të gjitha partive amerikane
Presidentja e Kosovës, Vjosa Osmani, ka komentuar zgjedhjet presidenciale në Shtetet e Bashkuara të Amerikës, duke u shprehur se Kosova është e bekuar që ka përkrahjen e SHBA-së, si nga demokratët ashtu edhe nga republikanët.
Osmani nënvizoi se ShBA-ja është aleati strategjik i Kosovës dhe do të vazhdojë të jetë i tillë edhe pas zgjedhjeve presidenciale.
“Kosova ka qenë e bekuar me përkrahjen e jashtëzakonshme amerikane të të gjitha partive. Në kohën kur ne e kemi fituar lirinë në qeveri kanë qenë demokratët. Në kohën kur e kemi arritur pavarësinë në qeveri kanë qenë republikanët. Kosova vërtet ka qenë shtet i bekuar me përkrahje mbi partizane amerikane. Është vendim i popullit amerikan. Ne do të vazhdojmë bashkëpunimin me këdo që zgjedhjet. Me rëndësi është që Shtetet e Bashkuara të Amerikës vazhdojnë të jenë lider të botës së lirë dhe aleati më i rëndësishëm strategjik i Kosovës. Ashtu do të vazhdojë do të jetë edhe pas kësaj date”, “, ka thwnw Osmani tw martën, raportoi KSP.
Amerikanët janë duke votuar për të zgjedhur presidentin e ri. Kandidates demokrate Kamala Harris dhe atij republikan Donald Trump u duhen nga 270 vota elektorale për të fituar. Shtetet e papërcaktuara Arizona, Georgia, Michigan, Nevada, Karolina e Veriut, Pensilvania dhe Wisconsin, janë vendimtare për zgjedhjen e presidentit të 47-të të shtetit më të fuqishëm në botë.
Sondazhet paraqesin rezultate aq të ngushta sa që gara po konsiderohet si ndër më interesantet ndonjëherë.
Amerikanëve iu bëhet thirrje të mos mashtrohen nga teoritë konspirative
Zyrtarët e procesit zgjedhor në Shtetet e Bashkuara të Amerikës iu kanë bërë thirrje votuesve që të mos bien pre e mashtrimeve dhe e teorive konspirative.
CNN ka raportuar se zyrtarët janë zotuar ta ruajnë integritetin e votës, derisa kanë bërë thirrje për kujdes.
“Këtu në Gjeorgji është lehtë të votosh dhe është vështirë të mashtrosh. Sistemet tona janë të sigurta dhe njerëzit janë gati”, ka thënë sekretari i Shtetit të Gjeorgjisë, Brad Rafensperger.
Republikanët kanë thënë se procesi zgjedhor është prekur, duke pretenduar se në një pjesë të votimit ka pasur mashtrime.
Zyrtarisht nis dita e zgjedhjeve në SHBA
Edhe zyrtarisht kanë nisur zgjedhjet presidenciale në Shtetet e Bashkuara të Amerikës. Është Vermonti që ka hapur qendrat e votimit.
Një orë më pas, qendrat e votimit do të hapen në Connecticut, Kentucky, Maine, New Jersey, New York e Virginia.
Rreth orës 13:30 me kohën lokale në Kosovë, zgjedhjet do të hapen në katër shtete të tjera.
Ka shtete që nuk do të hapin qendrat edhe 7 orë, për shkak të kohës lokale atje.
Në SHBA tashmë miliona njerëz kanë votuar në procesin e njohur si “paravotim”.
Personalitetet e famshme që përkrahën Kamala Harrisin dhe Donald Trumpin
Photo: Associated Press
Është bërë debat se çfarë efekti ka përkrahja nga të famshmëve tek votuesit për zgjedhjet presidenciale në shtetet e Bashkuara të Amerikës, por kandidatët gjithmonë i mirëpresin.
Këtu janë disa pjesëtar të listës A të Hollywoodit që kanë qenë përkrahës të zëvendëspresidentes Kamala Harris dhe ata të ish-presidentit, Donald Trump, shkruan The Guardian.
Kamala Harris
Këngëtarja Beyonce ka folur në tubimin që mbajti Harris në vendlindjen saj, në Houston të Texasit.
“Jam këtu si e famshme, jo si politikane. Jam këtu si nënë. Imagjinoni si do të rriteshin bijat tona duke e ditur se kanë mundësi pa fund, pa limite. Duhet të votojmë dhe ne jemi nevojë për ju”, ka thënë Beyonce.
Të tjerë të famshëm që përkrahin Harrisin janë: Taylor Swift, Bruce Springsteen, Stevie Wonder, Wilie Nelson, Oprah Winfrey, Julie Roberts, Kerry Washington, Julie Louis Dreyfus, Jennifer Lopez, Eminem, Megan Thee Stallion, Bad Bunny, Ricky Martin, Samuel L Jackson, Magic Johnson, Usher, Lizzo, Tyler Perry, Lebron James, Cardi B.
Donald Trump
Ish ylli i arteve marciale, Hulk Hogain,i cili në të kaluarën ka përkrahur ish-presidentin Brack Obama, tash po e përkrah Trumpin.
“S’i kemi pasur punët asnjëherë më mirë se me Trumpin”, ka thënë ai në një tubim.
Përkrahës të tjerë të famshëm të Trumpit janë: Elon Musk, Kid Rock, Kanye West, Jon Voight, Mel Gibson, Dr Phil, Dennis Wuaid, Roseanne Barr, Russell Brand, Buzz Aldrin.
Harris apo Trump? Këto janë komentet e gazetave gjermane dhe zvicerane
“Süddeutsche Zeitung”, München
Evropa nuk ka ndonjë ndikim mbi atë se kë do të zgjedhin amerikanët për president (ose ndoshta, shpresojmë, për presidente). Por evropianët kanë padyshim ndikim mbi mënyrën se si do të përballen me një president si Trumpi. Kjo, kaq është e sigurt, nuk do të jetë as e lehtë dhe as e këndshme. Megjithatë, ajo që duhet theksuar paraprakisht është: zemërimi, protestat, shpërthimet e mllefit apo inati nuk janë reagime të përshtatshme. Edhe kërcënimi me divorc nuk çon askund dhe do ta përçante e dobësonte vetëm Evropën.
Çfarë duhet bërë pra? Ndoshta evropianët mund ta marrin tronditjen nga Trumpi si një rast dhe burim force për të zgjidhur disa probleme të brendshme, të cilat deri tani janë përshkruar vetëm në raporte voluminoze, por jo në realitet. E vështirë? Po. E pamundur? Jo domosdoshmërisht. BE-ja, gjatë pandemisë së Covid-it dhe pas sulmit rus ndaj Ukrainës, ka bërë me vendosmëri dhe qartësi disa gjëra të jashtëzakonshme, të cilat më parë konsideroheshin të paimagjinueshme, e lëre më të realizueshme. Por, siç duket, nuk kanë qenë të tilla.
“Tages Anzeiger”, Zürich
Amerikanët duhet të vendosin nëse duan t’ia besojnë vendin e tyre një politikaneje klasike. Kamala Harris ka një sfond multikulturor dhe përfaqëson kështu Shtetet e Bashkuara moderne; ajo do të ishte gjithashtu gruaja e parë në këtë post, një premierë historike. Por ajo është gjithashtu një politikane krejt normale me të mirat dhe të metat e saj, e etur për pushtet, pragmatike, ideologjikisht fleksibile. Jo Joe Bideni, por as shumë larg prej tij.
Ndërsa Donald Trumpi është një shkelës i rregullave, një “disruptor”, siç thuhet në zhargonin e biznesit të anglishtes së re. Ky reputacion magjeps shumë amerikanë, sepse ata në thelb nuk i besojnë shtetit. Dhe sepse politika për shumë njerëz ka dhënë rezultate të pamjaftueshme për dekada me radhë. Në një nga vendet më të pasura në botë, pabarazia midis më të pasurve dhe të gjithë të tjerëve po rritet. Ndërkohë, shoqëria po ndryshon me ritme të shpejta, përmes imigracionit, barazisë gjinore dhe ndryshimeve gjeopolitike.
Shumë amerikanë dyshojnë në ëndrrën amerikane. Donald Trumpi premton zgjidhje të thjeshta për këtë. Sa pak ky njeri i vlerëson institucionet demokratike, rregullat që mundësojnë bashkëjetesën në këtë vend të larmishëm dhe kompleks, mbështetësit e tij i lënë mënjanë. Ata, gjysma e popullsisë, nuk janë të gjithë të prekur nga racizmi dhe idetë fashistoide, të cilat janë pjesë e qëndrueshme të retorikës politike të Trumpit.
“Neue Zürcher Zeitung”, Zürich
Ajo që thotë dhe bën republikani (Donald Trump) është pjesë e një shfaqjeje të personalitetit aq të çakërdisur, saqë bëhet fascinante. Trump, Trump, Trump: Përkrah tij, të gjithë të tjerët duken si statistë. Pikërisht ky është rreziku më i madh. Njeriu priret ta mbivlerësojë këtë vetë-promovues që sfidon çdo konventë.
Megjithatë, Trump është vetëm një simptomë e ndryshimeve epokale. Thuhet se burrat bëjnë historinë – dhe natyrisht, edhe gratë. Por ata mund të forcojnë vetëm atë që është tashmë pjesë e epokës. Hitleri do të kishte mbetur një artist i dështuar po të kishte jetuar në një Gjermani të qëndrueshme dhe të prosperuar.
Sa shumë do ta ndryshonte botën një mandat i dytë i republikanit (Trump)? Kjo është pyetje e gabuar. Më e saktë do të ishte të mendonim se sa shumë ai mund ta përshpejtojë ndryshimin. Dhe balancat gjeopolitike po ndryshojnë në themel, gjë që ne e perceptojmë si një varg krizash.
“Frankfurter Allgemeine Zeitung”, Frankfurt
Kur Amerika (të martën) zgjedh presidentin, do të ndodhë diçka që shumë njerëz në Evropë nuk e konsideronin më të mundshme: Trump është përsëri në fletëvotim dhe ka një mundësi reale për t’u rikthyer në Shtëpinë e Bardhë. Harris ka një pozicion më të mirë në sondazhe se Biden, i cili (jo plotësisht me dëshirë) ia la asaj kandidaturën. Por Trump dhe Harris janë tani aq afër njëri-tjetrit, saqë nuk ka një favorit të qartë. Rreth gjysma e zgjedhësve amerikanë janë të gatshëm të votojnë përsëri për ish-presidentin.
Kjo kundërshton sidomos një perceptim që ishte i përhapur në Evropë pas fitores së parë të Trumpit në zgjedhjet e vitit 2016: se ky ishte disi një aksident politik në një vend që në thelb ende i ishte përkushtuar “vlerave liberale” aq të shumëpërmendura; një lëshim, i favorizuar nga interneti dhe përrallat e rreme të republikanit. Fitorja e Bidenit në vitin 2020 dukej se e mbështeste këtë interpretim. Si pothuajse gjithmonë, kur një demokrat është në pushtet në Uashington, në Evropë, veçanërisht në Gjermani, rizbulohen marrëdhëniet transatlantike; këtë herë, megjithatë, Putin ofroi ndihmë të konsiderueshme.
Në të vërtetë, Trumpi ishte një pararendës. Nëse rizgjidhet, ai do të kthehet në një botë politike që i është afruar ideve të tij. Kjo ndikon veçanërisht në Evropë. Partitë e djathta populiste kanë qenë gjithashtu në rritje këtu për vite me radhë, madje edhe në vendet e Evropës Perëndimore ato po fitojnë zgjedhje. Radikalizimi i vazhdueshëm i Trumpit është gjithashtu një fenomen i njohur në këto vende. Është formula e suksesit të AfD-së (partisë ekstremiste të së djathtës gjermane).
Dalin rezultatet e para nga qyteti i vogël amerikan
Kandidatja e Partisë Demokratike, Kamala Harris, dhe kandidati i Partisë Republikane, Donald Trump, kanë marrë nga tri vota në komunitetin Dixvile Notch në New Hampshire e që njihet si momenti i parë i garës së madhe presidenciale në Shtetet e Bashkuara të Amerikës.
Qyteza në kufi me Kanadanë ka hapur dhe mbyllur qendrën e votimit në mesnatë, si traditë që daton prej 1960-s.
Në zgjedhje morën pjesë vetëm gjashtë votues.
Përderisa Dixville Notch s’është gjithmonë vendi që tregon fituesin final, por në disa raste konsiderohet storie suksesi për nisje të mbarë.
Në pjesën tjetër të SHBA-së votimi pritet të nisë shumë shpejt. Fituesi, për shkak të garës së ngushtë, nuk pritet të dihet shpejt.
Garë shumë e ngushtë, por kush do t’i fitojë zgjedhjet – sipas inteligjencës artificiale
Pos sondazheve paraprake, edhe inteligjenca artificiale ka lënë të kuptohet se rezultati i zgjedhjeve amerikane mes kandidatëve Kamala Harris dhe Donald Trump do të jetë shumë i ngushtë. Duke pyetur robotin virtual të AI-së, ChatGPT, kjo platformë rekomandoi se është shumë herët të dihet ndonjë fitues potencial, por tha se dy kandidatët kanë avantazhe të lehta në disa shtete.
“Në disa nga sondazhet dhe rezultatet e hershme, Kamala Harris dhe Donald Trump janë të afërt në disa shtete vendimtare, me Harris që ka një avantazh të lehtë në sondazhet kombëtare, ndërsa Trump shfaqet i fortë në disa shtete të rëndësishme si Karolina e Veriut dhe Pennsylvania”, thuhet në një përgjigje të ChatGPT, që është produkt i kompanisë amerikane OpenAI.
Aty thuhet se shtetet si Michigan, Pennsylvania dhe Wisconsin do të jenë vendimtare në rezultatin final, pasi ato historikisht kanë pasur ndikim në rezultatin zgjedhor.
ChatGPT ka rekomanduar që të përcillen mediumet e mëdha botërore amerikane për rezultate dhe informacione të sakta. Por, duke i kërkuar një parashikim, ChatGPT tha se Harris ka gjasa më të mëdha për t'u shpallur presidente e SHBA-së.
Sondazhet e fundit nga shtatë shtetet e papërcaktuara
Përderisa orët vendimtare po afrohen, sondazhet e fundit në garën presidenciale në Shtetet e Bashkuara të Amerikës po e bëjnë garën edhe më të ashpër.
Janë shtatë shtete të cilat pritet të jenë vendimtare me votën e tyre elektorale. Sondazhet e përditësuara në vazhdimësi kanë nxjerrë rezultate të cilat janë brenda margjinës së gabimit.
Sipas të dhënave të fundit të BBC-së, Donald Trumpi i Republikanëve po prin ngushtë në Nevada, Georgia, Karolinë të Veriut dhe Arizona, ndërsa me epërsi po aq të ngushtë Harrisi udhëheq në Wisconsin e Michigan. Dyshja duket se është duke shkuar baras në Pensilvani.
Pensilvani (19 vota elektorale) – Baras
Nevada (6) – Trump <1
Wisconsin (10) – Harris +1
Georgia (16) – Trump +1
Karolina e Veriut (16) – Trump +1
Michigan (15) – Harris +1
Arizona (11) – Trump +2
Jetë të ndryshme. Harris dhe Trump siç nuk i keni parë kurrë më parë
Dekada të ndryshme, kandidatja demokrate për president, Kamala Harris i kaloi vitet e saj të hershme në Oakland, Kaliforni, dhe kandidati republikan Donald Trump u rrit në lagjen Queens të Nju Jorkut.
Harris dhe motra e saj Maya u rritën nga nëna e tyre indiane, Shyamala Gopalan Harris, studiuese e kancerit dhe aktiviste sociale.
Babai i Trumpit, Fred Trump, ishte djali i emigrantëve gjermanë dhe nëna e tij, Mary Anne MacLeod Trump lindi në Skoci. Ata e regjistruan në Akademinë Ushtarake të Nju Jorkut në moshën 13-vjeçare.
Harris kaloi pesë vjet në shkollën e mesme në Montreal, Kanada, ku nëna e saj filloi punë si mësuese në Universitetin McGill. Më vonë ajo u regjistrua në kolegjin afro-amerikan, Universitetin Howard në Uashington DC.
Trump ka thënë se pesë vjetët në akademi, të cilat i nisi më 1959, i dhanë atij trajnim ushtarak dhe e ndihmuan në formimin e aftësive të tij drejtuese. Ai nuk iu bashkua Luftës së Vietnamit për shkak të çështjeve akademike dhe të plagëve në këmbë.
Që në moshë të re, Harris u mësua nga nëna e saj për rëndësinë e lëvizjes për të drejtat civile dhe ajo mori pjesë në Marshin vjetor të Lirisë Martin Luther King Jr në Uashington në 2004.
Pasi u diplomua në Universitetin e Pensilvanisë, Trump u favorizua për të pasuar të atin në krye të biznesit familjar.
Harris u kthye në Kaliforni, ku ajo u ngjit me shpejtësi në krye të sistemit të drejtësisë së shtetit - duke siguruar punë si prokurore e përgjithshme - dhe e përdori atë moment për të nisur garën për Senatin e SHBA-së në 2016.
Në të njëjtën kohë kur ajo hyri në Kongres, Trump po hynte në Shtëpinë e Bardhë për herë të parë, pasi kishte befasuar botën duke mposhtur Hillary Clintonin.
Tri vjet më vonë, Harris zhvilloi fushatë presidenciale jo dhe aq mbresëlënëse, por u zgjodh nga fituesi i garës demokratike, Joe Biden, si zëvendëspresidente. Ata e siguruan fitoren duke e mposhtur Trumpin dhe Mike Pence.
Fundi i presidencës Trump dhe fillimi i mandatit Biden-Harris u shënuan nga bllokime për Covid, detyrime për mbajtje maskash dhe trazira sociale pas vrasjes nga policia të George Floydit në Minneapolis.
Harris e pati të vështirë për të lënë gjurmë si zëvendëspresidente, por zëri i saj u dëgjua në vitin 2022 kur Gjykata e Lartë e SHBA-së i dha fund të drejtës kushtetuese për abortin.
Ishte Trump ai që e kishte bërë Gjykatën e Lartë më konservatore, duke i hapur rrugën vendimit të abortit.
Gjatë kohës së tij në Zyrën Ovale, ai gjithashtu nxori SHBA-në nga marrëveshja e Parisit për klimën dhe ndërmori hapa për ta reduktuar imigracionin.
Vizita debutuese ndërkombëtare e Harrisit si zëvendëspresidente ishte në Guatemalë në vitin 2021, si pjesë e përgjegjësisë që iu dha për ta reduktuar numrin e imigrantëve nga Amerika Latine që arrinin në kufirin jugor të Amerikës me Meksikën.
Çështjet e politikës së jashtme që kanë dominuar kohën e saj në detyrë përfshijnë luftërat në Ukrainë dhe Gaza, si dhe tërheqjen kaotike të trupave amerikane nga Afganistani.
Vizita e parë e Trumpit jashtë shtetit si president ishte në Arabinë Saudite në vitin 2017. Trump mbron politikat izoluese që përfshijnë shkëputjen e vendit të tij nga konfliktet e huaja dhe promovimin e industrisë amerikane.
Harris është e martuar me Doug Emhoff , i cili bën fushata rregullisht në emër të saj. Ajo është njerka - ose “Momala”, siç thotë ajo - për fëmijët e Emhoffit nga martesa e tij e parë, Cole dhe Ella.
Anëtarë të ndryshëm të familjes së Donald Trumpit kanë luajtur role në karrierën e tij politike, megjithëse paraqitjet në fushatën e 2024-s nga gruaja e tij, ish-Zonja e Parë Melania Trump, kanë qenë të kufizuara.
Me gruan e tij të parë, Ivana, Trump ka tre fëmijë: Donald Jr, Ivanka dhe Eric. Ai ka një vajzë, Tiffany, me gruan e tij të dytë, Marla Maples. Ai u martua me gruan e tij të tretë Melania në vitin 2005, me të cilën ka një djalë, Barronin.
Harris hyri në garën presidenciale të vitit 2024 relativisht vonë në proces, duke zëvendësuar Joe Bidenin pasi u tërhoq. Ka shkruar historinë si gruaja e parë me ngjyrë dhe aziatiko-amerikania e parë që udhëheq kandidaturën e një partie për presidente.
Shpjegime: Gjithçka rreth garës presidenciale
Sipas ligjit amerikan, zgjedhjet presidenciale duhet të mbahen çdo katër vjet. Këto zgjedhje të përgjithshme, që nga viti 1845, kërkohet të zhvillohen të martën e parë të muajit nëntor. Këtë vit, dita e zgjedhjeve i bie të jetë 5 nëntori.
Shtetet i mbikëqyrin vetë proceset e tyre të votimit, që do të thotë se koha e hapjes së qendrave të votimit ndryshon nga shteti në shtet. Qendrat e para të votimit, në disa qarqe në Indiana dhe Kentucky, mbyllen në ditën e zgjedhjeve në orën 18:00 me orë lokale, ndërsa qendrat e fundit të votimit mbyllen në orën 1 të mëngjesit me orë lokale, të mërkurën, 6 nëntor, në Alaska.
Miliona amerikanë votojnë edhe më herët, personalisht ose edhe përmes postës.
Pse dita e zgjedhjeve zgjat më shumë se një ditë?
Në secilin shtet, procesi i votimit ka dallimet e tij. Votimi, si në shtetin e Washingtonit, Oregonit dhe Utahs, kryhet pothuajse tërësisht me postë, proces ky që zgjat me javë të tëra.
Çdo shtet ka në dispozicion edhe votimin e hershëm, i dedikuar për personat të cilët nuk mund të shkojnë në qendrat e votimit në ditën e zgjedhjeve, duke siguruar kështu që të gjithë ta kenë mundësinë që të votojnë.
Kush janë kandidatët për president këtë vit?
Nga radhët e demokratëve, këtë vit, mandatin për presidente e synon zëvendëspresidentja Kamala Harris, e cila kandidon bashkë me guvernatorin e Minnesotas, Tim Walz, me këtë të fundit që synon postin e zëvendëspresidentit.
Ish-presidenti, Donald Trump, do të rikandidojë për president nga radhët e republikanëve, bashkë me senatorin e Ohios, JD Vance.
Ka edhe kandidatë të tjerë dhe opsionet ndryshojnë varësisht nga shteti. Chase Oliver i Partisë Libertariane dhe Jill Stein i Partisë së Gjelbër, janë disa nga kandidatët, të cilët janë opsion për shumicën e shteteve.
Mirëpo, për ta përgjithësuar, shumica dërrmuese e amerikanëve pritet të votojnë për Harrisin ose Trumpin.
Pse Trump dhe Harris janë kandidatët kryesorë?
Dy partitë kryesore, Republikane dhe Demokrate, zhvilluan në fillim të vitit garën mes anëtarëve të partisë së tyre, për t’u nominuar si kandidatë në zgjedhjet presidenciale të vitit 2024.
Përkundër faktit se shumë republikanë nuk përkrahën Trumpin pas sulmit në Kapitol si revoltë ndaj humbjes së tij në zgjedhjet e vitit 2020, ish-presidenti ia doli prapë që të jetë kandidati republikan për president këtë vit. Këto janë zgjedhjet e treta radhazi, ku Trumpi zyrtarizohet si kandidat nga radhët e republikanëve.
Për demokratët, presidenti Joe Biden dominoi garën dhe u përball vetëm me kundërshtime simbolike. Por shqetësimet për moshën e Bidenit – 81 vjeç – dolën në pah. Pas një debati në qershor, Bideni rezultoi të jetë i dobët kundrejt Trumpit, duke bërë që presidenti të pranojë presionin dhe të largohet nga gara për president, përpara mbajtjes së konventës së demokratëve.
Mbështetja e Bidenit për Kamala Harrisin, zëvendëspresidenten e tij, qe shtysë që ajo të zgjidhej kandidate për presidente nga radhët e demokratëve. Madje asnjë demokrat nuk e sfidoi atë në konventën e gushtit.
Kur do të dihet fituesi?
Kjo mund të marrë pak kohë.
Në vitin 2020, CNN-i nuk doli me emrin e fituesit deri katër ditë pas ditës së zgjedhjeve. Shumë shtete ishin në garë të ngushtë atë vit.
Në 2016-n, një ditë pas ditës së zgjedhjeve, ndonëse numërimi i votave zhvillohej ende në shumë shtete, Hillary Clinton pranoi se nuk do ta fitonte garën.
Trump nuk ka gjasa që ta pranojë ndonjëherë humbjen.
Nëse në shtetet kyçe zhvillohet garë e ngushtë, mund të duhen ditë të tëra për ta përcaktuar fituesin. Lajmi i mirë është se shumë shtete kanë bërë ndryshime që nga viti 2020, duke lehtësuar përpunimin e fletëvotimeve me postë, të cilat kërkojnë më shumë kohë për t’u numëruar.
Në vitin 2000, për shkak të garës më të ngushtë në historinë e Shteteve të Bashkuara, fituesi u bë i ditur vetëm 36 ditë pas zgjedhjeve, kur Gjykata e Lartë e SHBA-së përfundoi rinumërimin e votave në Florida.
Këtë vit, është herët për të dalë në përfundime, mirëpo nëse nuk ka garë të ngushtë, rrjete të tilla si CNN-i, mund të projektojnë fituesin që natën e zgjedhjeve. Kjo pritet të shihet.
Cilat janë çështjet kryesore, me të cilat përballen amerikanët?
Njëra prej çështjeve kryesore, për të cilën amerikanët kërkojnë zgjidhje, është kostoja e jetesës. Çmimet u rritën pas pandemisë Covid-19 dhe Trumpi po shikon të përfitojë nga nostalgjia që njerëzit kanë, për vitet kur kostoja e produkteve ushqimore ishte më e ulët. Plani i tij për të vendosur tarifa të përgjithshme për mallrat e huaja mund të rrisë më tej çmimet, sipas ekonomistëve, por bazuar në sondazhe, Trumpi del të ketë avantazh ndaj Harrisit në fushën e ekonomisë.
Përkrahësit e Trumpit janë gjithashtu të motivuar nga politika që ish-presidenti kultivon për imigracionin. Ai ka premtuar të deportojë miliona emigrantë që kanë kaluar kufirin ilegalisht dhe ta mbyllë kufirin e SHBA-së.
Për votuesit e Harrisit, çështja e abortit është thelbësore. Pasi Gjykata e Lartë, me një të tretën e gjyqtarëve të emëruar nga Trumpi, përmbysi çështjen Roe v. Wade, Harrisi i ka cilësuar të drejtat riprodhuese si çështje të lirisë personale dhe është zotuar t’i mbrojë ato të drejta.
Ekziston edhe çështja kyçe e demokracisë. Trumpi u akuzua nga Departamenti i Drejtësisë për ndërhyrje në zgjedhje pasi u përpoq të përmbyste rezultatet e zgjedhjeve të vitit 2020.
Trumpi u shpall fajtor edhe për akuza të tjera në Nju-Jork, lidhur me pagesat në këmbim të heshtjes, përpara zgjedhjeve të 2016-s. Dënimi i tij është caktuar të zyrtarizohet në fund të nëntorit, që do të thotë, pas mbajtjes së zgjedhjeve.
Megjithatë, akuzat e tij për krime, apo edhe mundësia e burgimit, nuk e bëjnë Trumpin të papërshtatshëm për të shërbyer si president.
Si zgjidhet presidenti në SHBA?
Më shumë se 150 milionë njerëz pritet të votojnë në zgjedhjet presidenciale, në ose para ditës së zgjedhjeve. Por janë 538 (votat elektorale) anëtarët e Kolegjit Zgjedhor, që do të zgjedhin presidentin në një proces që zgjat deri në dhjetor dhe janar.
Amerikanët votojnë për kandidatin e tyre të preferuar për president, dhe në fakt zgjedhin edhe listën e anëtarëve të Kolegjit Zgjedhor, të lidhur me cilindo kandidat që fiton votën popullore në çdo shtet.
Më pas, këta anëtarë hedhin votat për presidentin dhe zëvendëspresidentin në Kapitolin e secilit shtet më 17 dhjetor. Ky takim i njohur si Kolegji Zgjedhor, parashihet me Kushtetutën e vendit.
Këto vota elektorale numërohen në sallën e Dhomës së Përfaqësuesve më 6 janar 2025.
Presidenti i ri merr detyrën më 20 janar 2025.
Cilat janë shtetet e fushëbetejës së 2024-tës?
Mendohet se janë shtatë shtete që mund të fitohen nga secili kandidat. Si rezultat, fushatat zgjedhore janë fokusuar në këto vende. Ato mund të ndahen në dy kategori të përgjithshme.
3 fusha beteje në Midwestern, i njohur si “muri i kaltër” - Këto janë shtetet e Pennsylvanias, Michiganit dhe Wisconsinit. Dikur shtete që përkrahnin demokratët, por që së fundmi kanë ndryshuar qasje, pasi popullsia ka ndryshuar.
Kur Trumpi e fitoi Shtëpinë e Bardhë në 2016-n, ai i fitoi të tri shtetet. Kur Bideni fitoi në 2020-ën, ai i fitoi po ashtu të tri shtetet. Nëse Harrisi fiton të tri shtetet këtë vit, ajo ka të ngjarë të ketë fituar edhe postin e presidentes. Por sondazhet tregojnë garë të ngushtë në të tri shtetet. Pjesëmarrja e votuesve luan rol të rëndësishëm, dhe për Harrisin janë tejet të nevojshme votat e grave dhe të afroamerikanëve. Të tri shtetet kanë qendra urbane.
4 fushëbeteja të Rripit të Diellit – Këto shtete me popullsi në rritje përfshijnë Arizonan, Nevadan në Perëndim e Karolinën e Veriut si dhe Georgian në Lindje. Arizona, Georgia dhe Karolina e Veriut dikur ishin shtete republikane. Trumpi fitoi Karolinën e Veriut dy herë, por kishte garë të ngushtë në vitin 2020. Demokrati i fundit që fitoi atje ishte Barack Obama në 2008-n. Bideni ishte demokrati i parë që fitoi Georgian që nga Bill Clintoni në vitin 1992, dhe Arizonan që nga Clintoni në 1996-n.
Fushëbeteja për 1 votë në Nebraska - 48 shtete ia japin votat e tyre elektorale fituesit, bazuar në avantazhin në secilin shtet. Nebraska dhe Maine e bëjnë atë ndryshe, duke i dhënë votat bazuar në distriktin e kongresit. Shteti i Nebraskas është territor i sigurt i Trumpit, por distrikti i kongresit rreth qytetit të Omahas është një fushëbetejë. Kjo votë e vetme mund të jetë shumë e rëndësishme në rast të një gare të ngushtë në Kolegjin Zgjedhor.
Është situata e kundërt në Maine, i vetmi shtet tjetër që nuk i jep të gjithë anëtarët apo votat elektorale të tij, fituesit mbarëkombëtar. Trumpi mund të marrë votë elektorale edhe në Maine.
Kosovarët preferojnë kandidaten demokrate Kamala Harris
Photo: Associated Press
Zgjedhjet presidenciale në Shtetet e Bashkuara, që do të mbahen të martën, po përcillen me interes edhe në Kosovë.
Për garën mes ish-presidentit Donald Trump dhe zëvendëspresidentes Kamala Harris qytetarët në Kosovë shprehën një preferencë.
Ndonëse thanë se të dy kandidatët kanë qasje pozitive ndaj Kosovës.
“Kamala Harris... Është vijë e partisë më stabile, më e sigurt. Ekziston mundësia të vazhdojë si ka qenë deri tash, gradualisht. Ai më shpejt i kryen punët, Trumpi”, u shpreh një qytetar.
“Megjithëse Trumpi si ekonomist është shumë i fortë, por edhe Harrisi si juriste shumë e pëlqyeshme. Bën vaki që edhe unë do ta votoja”.
“Edhe pse për Trumpin nuk jam, ai që duhet të japë ndonjë mendim, sepse s’kam të bëj asgjë me të në kuptimin direkt. Por, sjelljet, shprehjet pak po më çojnë kah Kamala Harris”, u shpreh një tjetër.
Njohësi i zhvillimeve politike Mazllum Baraliu, tha se gjatë mandatit të parë të Trumpit është lidhur një marrëveshje e dëmshme për Kosovën.
“Nuk ka rëndësi kush fiton, marrë parasysh drejtimet, karrierën e profesionet e tyre, zonja Harris për shembull, ajo ka një karrierë të suksesshme në mbrojtjen e ligjit, pra sundimit të ligjit dhe të drejtave të njeriut. Ndërsa në anën tjetër kemi një kandidat atipik, i pazakonshëm, do të thosha unë jostabil në kuptimin e qëndrimeve por edhe radikal në ato qëndrimet e tij në politika të shpejta ku mund të ketë ndikim në gjithë botën por edhe në Kosovë”, ka deklaruar Baraliu.
Më e rezervuar u shpreh ministrja e Punëve të Jashtme dhe Diasporës, Donika Gërvalla Schwarz.
Ajo theksoi se kosovarët janë populli më proamerikan në botë dhe se mbështetja e Amerikës është përtej partive.
“Prandaj, duke kryer detyra e shtëpisë në Kosovë, duke i quar përpara reformat, agjendën e reformave, duke e vendosur sundimin e ligjit në çdo cep të Kosovës, duke luftuar krimin e organizuar, atëherë miqësia dhe partneriteti me Amerikën kështu forcohet, nuk forcohet me fjalë, nuk forcohet me deklarata, por forcohet me punë konkrete”, është shprehur tutje Gërvalla.
E nga një matje e opinionit e bërë nga Gallup del se shumica e qytetarëve në shtetet evropiane mbështesin kandidaten demokrate.
E kandidati republikan ka dalë më i preferuar në Serbi, Hungari e Bullgari e disa vende në lindje të Evropës.
Donald Trump: Rikthimi i pazakontë
Në verën e vitit 1946, në Queens të Nju-Jorkut, u lind Donald Trump, tash kandidati republikan për t’u rikthyer si president i Shteteve të Bashkuara të Amerikës.
Një larmi e profesioneve të ndryshme e ka përcjellë që nga fëmijëria e deri te mosha 78-vjeçare.
Puna e parë që do t’i krijonte një jetë fitimprurëse ishte në vitin 1968. Pas përfundimit të studimeve në Universitetin e Pensilvanisë iu bashkua kompanisë së babait të tij që merrej me pasuri të paluajtshme.
Në vitet 1970-80, Trump zgjeroi biznesin duke blerë prona jashtë qytetit të Nju-Jorkut dhe duke ndërtuar kompleksin e apartamenteve 36-katëshe të quajtur “Trump Plaza”.
Përveç profilit afarist, Trumpi u sfidua gjatë jetës edhe në të tjera fusha.
Ai njihet edhe si autor i disa librave e po ashtu ishte edhe pjesë e ekranit televiziv. Për 11 vjet rresht ai drejtoi dhe prodhoi shfaqjen e njohur televizive “The Apprentice”.
Prej vitit 1996 deri më 2015 ishte drejtor i konkurseve të bukurisë “Miss USA”, “Miss Teen USA” dhe “Miss Universe”.
E derisa organizonte gara të bukurisë, Trumpi i hyri një gare edhe më sfiduese – asaj të politikës.
Më 16 qershor 2015, ai shpalli kandidaturën e tij për president të SHBA-së, derisa pranoi nominimin republikan në korrik të 2016-s.
Me këtë konkurs, Trumpi u tregua pishman për një deklarim të tij të vitit 1980. Në një intervistë atëkohë, ai e përshkruante politikën si një jetë shumë të keqe dhe thoshte se njerëzit e aftë zgjedhin botën e biznesit në vend të politikës.
Më 8 nëntor të vitit 2016, Trumpi u zgjodh presidenti i 45-të i Shteteve të Bashkuara të Amerikës, duke fituar garën ndaj kandidates demokrate, Hillary Clinton.
Zgjedhja e tij në krye të Shtëpisë së Bardhë solli drama të shumta për demokracinë amerikane.
Por, një mandat 4-vjeçar nuk i mjaftoi Trumpit, ambiciet e të cilit u shtuan në politikë duke synuar edhe një mandat tjetër.
Pas përfundimit të mandatit 4-vjeçar si president, në verën e 2020-ës, Trumpi rishpalli kandidaturën dhe do ta sfidonte Joe Bidenin, kandidatin e demokratëve që arriti ta fitonte garën ndaj Trumpit.
Por rezultati i atyre zgjedhjeve nuk ishte kapërdirë lehtë nga republikani, që insistonte se zgjedhjet janë vjedhur dhe e kontestonte rezultatin.
Trumpi kështu bëri thirrje për protesta në mënyrë që të pengohej certifikimi i Bidenit gjatë seancës së Kongresit.
Si pasojë e tyre më 6 janar 2021, Capitoli u sulmua nga mbështetësit e ish-presidentit Donald Trump. Katër persona mbetën të vdekur, ndërsa mbi 50 persona ishin arrestuar.
E 2 vjet pas, më 2 gusht 2023, ndaj ish-presidentit të Shteteve të Bashkuara ishte ngritur aktakuzë për komplot për mohim të disfatës elektorale të vitit 2020.
Kjo s’është përballja e vetme e Trumpit me drejtësinë. Më 30 maj 2024, ai u bë presidenti i parë amerikan që dënohet për vepër penale. Ish-presidenti u shpall fajtor për falsifikimin e regjistrave biznesorë për të ndikuar jashtëligjshëm në zgjedhjet presidenciale të 2016-s, përmes pagesave për heshtjen e një aktoreje të pornografisë, e cila tha se kishte kryer marrëdhënie seksuale me të.
E, përkundër telasheve me sistemin e drejtësisë, Partia Republikane ia ka besuar postin e kandidatit për president sërish në garën e 5 nëntorit.
Trumpi e nisi garën me Bidenin, por pasi e mposhti në debat ai u tërhoq dhe tani ish-presidenti përballet me zëvendëspresidenten aktuale, Kamala Harris.
Kamala Harris: Nga drejtësia e politika, drejt historisë
“Zambak uji” është kuptimi i emrit të Kamala Harrisit që po synon të bëhet gruaja e parë që merr postin e presidentit të Shteteve të Bashkuara të Amerikës.
Harris, e njohur si bijë emigrantësh, u lind në Oakland të Kalifornisë më 20 tetor të vitit 1964.
E rritur në një mjedis ku nëna i ishte përkushtuar shëndetësisë, ndërsa babai ekonomisë, 60-vjeçarja iu përkushtua fushës së drejtësisë.
Më 1982, ajo u regjistrua në Universitetin e Howardit, një universitet historikisht i dominuar nga amerikanët me ngjyrë, në zemër të Uashingtonit, ku diplomoi në drejtimin e shkencave politike.
Pas diplomimit, Harris u kthye në Kaliforni dhe ndoqi studimet për drejtësi në Universitetin e California Hastings. Harrisi punoi për tri dekada si prokurore në Oakland, para se më 2004 të zgjidhej kryeprokurore e qarkut të San Franciskos, detyrë kjo në të cilën shërbeu deri më 2011.
Më 2011, Harris u bë amerikania e parë me ngjyrë që do të zgjidhej prokurore e përgjithshme e Kalifornisë. Derisa mbajti këtë post ajo u përqendrua mbi çështje të ndryshme, si reforma në drejtësinë penale, krizën e hipotekave, mbrojtjen e mjedisit, dhe barazinë gjinore.
Kandidatja amerikane për presidente tërhoqi vëmendjen kombëtare sa ishte kryeprokurore, kur mbajti fjalim në Kuvendin Kombëtar të Demokratëve në Karolinën e Veriut, më 5 shtator 2012. Zgjedhja si folëse vuri në pah rritjen e ndikimit brenda partisë dhe potencialin si udhëheqëse e ardhshme.
Por kapërcimin e vërtetë jetësor drejt politikës Harris e bëri në vitin 2015, kur lansoi fushatën për t’u zgjedhur senatore, duke synuar ta zëvendësonte senatoren e kahershme të Kalifornisë, Barbara Boxer.
Fushata e saj u mbështet nga ish-presidenti Barack Obama dhe zëvendëspresidenti i atëhershëm, Joe Biden, duke bërë që në zgjedhjet e 2016-s Harris të zgjidhet senatorja e parë me ngjyrë nga shteti i Kalifornisë.
Në zgjedhjet e 2020-s, kandidati i Partisë Demokratike për president në Shtetet e Bashkuara të Amerikës, Joe Biden, zgjodhi Kamala Harrisin për të qenë krahu i tij i djathë e për të udhëhequr postin e zëvendëspresidentes.
Më 20 janar 2021, Harris bëri një hap gjigant në politikë. Harris u betua si zëvendëspresidente e Shteteve të Bashkuara. Ajo u bë gruaja e parë, si gruaja e parë me ngjyrë dhe si gruaja e parë jugaziatike të arrinte këtë majë të politikës amerikane.
Derisa po kryente detyrën si zëvendëspresidente, Harrisin po e priste një detyrë shtesë.
Dy partitë rivale amerikane po bëheshin gati për zgjedhjet e reja presidenciale të këtij viti. Demokratët e zgjodhën për kandidat presidentin aktual, Joe Biden, por në fushatë e sipër, për shkak të arsyeve shëndetësore, Biden u tërhoq nga gara, kështu kongresi i partisë pastaj zgjodhi Harrisin kandidate për presidente.
Më 23 gusht Harris pranoi kandidaturën për presidente të Shteteve të Bashkuara të Amerikës. Ajo do ta sfidojë ish-presidentin Donald Trump, me të cilën ka pasur një sërë divergjencash e përplasjesh gjatë fushatës zgjedhore.
Nëse Harris fiton, ajo do të lërë shenja të thella në historinë moderne të politikës amerikane, pasi do të jetë gruaja e parë me ngjyrë që ka shërbyer si kryeprokurore e Kalifornisë, si gruaja e parë jugaziatike që është zgjedhur zëvendëspresidente e Shteteve të Bashkuara, si dhe gruaja e parë që do të marrë postin më të lartë të demokracisë më të fuqishme në botë.
Premtimet kryesore të Harrisit dhe të Trumpit
Votuesit amerikanë do të kenë mundësi të zgjedhin mes dy profileve të ndryshme për president, midis zëvendëspresidentes Kamala Harris dhe republikanit Donald Trump.
Inflacioni
Kandidatja demokrate Harris ka thënë se prioriteti i ditës së parë do të ishte përpjekja për të reduktuar kostot e ushqimit dhe të strehimit për familjet që punojnë.
Ajo ka premtuar ndalimin e rritjes së çmimeve për gjërat ushqimore, të ndihmojë ata që blenë shtëpi për herë të parë dhe të rrisë pagën minimale.
Inflacioni u rrit nën presidencën Biden, siç ndodhi në shumë vende perëndimore, pjesërisht për shkak të periudhës pas COVID-19 dhe luftës në Ukrainë. Që atëherë, inflacioni ka filluar të bjerë.
Trumpi ka premtuar “t'i japë fund inflacionit dhe ta bëjë Amerikën përsëri të përballueshme”.
Ai ka premtuar norma më të ulëta interesi, pavarësisht se ato nuk kontrollohen nga presidenti.
Ekonomistët kanë paralajmëruar se zotimi i tij për të vendosur taksa më të larta mbi importet mund të rrisë çmimet.
Taksat
Harris dëshiron t’i rrisë taksat për bizneset e mëdha dhe për amerikanët që fitojnë 400 mijë dollarë në vit.
Por ajo ka zbuluar gjithashtu një sërë masash që do të lehtësonin barrën tatimore për familjet.
Trumpi ndërkohë ka propozuar të ulë taksat, si në vitin 2017, të cilat më së shumti i ndihmuan të pasurit.
Kandidati republikan planifikon që uljen e taksave ta shpaguajë me rritjen e tarifave për importet.
Ekspertët kanë thënë se planet e të dy presidentëve për taksat do ta shtonin deficitin në rritje, por i Trumpit më shumë.
Aborti
Harris i ka kthyer të drejtat e abortit në qendër të fushatës. Ajo vazhdon të mbrojë legjislacionin që do të garantonte të drejtën e abortit në të gjithë vendin.
Trump ndërkohë nuk ka pasur mesazh të qëndrueshëm për abortin.
Tre gjyqtarët që ai emëroi në Gjykatën e Lartë sa ishte president ishin vendimtarë në vitin 2022 për përmbysjen e së drejtës kushtetuese për abort, një vendim i vitit 1973 i njohur si “Roe v Wade”.
Migracioni
Harris u përball me krizën kufitare në vitin 2023 – kur numër rekord i njerëzve kaluan nga Meksika në SHBA. Që atëherë, shifrat kanë rënë në nivelin më të ulët të katër vjetëve të fundit.
Në këtë fushatë ajo ka ashpërsuar qëndrimin dhe ka theksuar përvojën e saj si prokurore në Kaliforni për përballjen me trafikuesit e qenieve njerëzore.
Trump është zotuar ta mbyllë kufirin dhe ta ndërtojë një mur të lartë.
Ai ka premtuar gjithashtu dëbimin më të madh ndonjëherë të emigrantëve pa dokumente në historinë e SHBA-së. Ekspertët kanë thënë se nëse ndodh, kjo do të përballet me sfida ligjore.
Politika e jashtme
Harris është zotuar ta mbështesë Ukrainën “për aq kohë sa duhet”. Ajo është zotuar, nëse zgjidhet, të sigurojë që SHBA-ja dhe jo Kina të fitojë “garën e shekullit XXI”.
Ajo ka qenë avokuese për një kohë të gjatë për zgjidhje me dy shtete midis izraelitëve dhe palestinezëve dhe ka bërë thirrje për t'i dhënë fund luftës në Gaza.
Trump ka politikë të jashtme izoluese dhe dëshiron që SHBA-ja të shkëputet nga konfliktet nëpër botë.
Ai ka thënë se do t’i jepte fund luftës në Ukrainë në 24 orë përmes një marrëveshjeje të negociuar me Rusinë, një veprim që demokratët thonë se do të trimëronte Vladimir Putinin.
Trump e ka pozicionuar veten si mbështetës i palëkundur i Izraelit, por ka folur pak për t’i dhënë fund luftës në Gaza.
Tregtia
Harris ka kritikuar planin e Trumpit për të vendosur tarifa mbi importet, duke e quajtur “taksë kombëtare për familjet që punojnë”, e cila do t'i kushtojë çdo familjeje 4 mijë dollarë në vit.
Ajo pritet të ketë qasje më të butë për taksimin e importeve, duke ruajtur tarifat që administrata Biden-Harris vendosi për disa importe kineze si automjetet elektrike.
Trump i ka vendosur tarifat për importet si premtim kryesor në këtë fushatë. Ai ka propozuar tarifa të reja 10-20 për qind për shumicën e mallrave të huaja dhe shumë më të larta për ato nga Kina.
Ai ka premtuar se do t’i nxisë kompanitë të qëndrojnë në SHBA për të prodhuar mallra, duke iu dhënë normë më të ulët të taksës së korporatës.
Kujdesi shëndetësor
Harris ka qenë pjesë e një administrate të Shtëpisë së Bardhë, e cila ka ulur kostot e barnave me recetë dhe ka kufizuar çmimet e insulinës në 35 dollarë.
Trump, i cili shpesh është zotuar ta ndryshojë Aktin e Kujdesit të Përballueshëm, ka thënë se nëse zgjidhet vetëm do ta përmirësonte atë, pa ofruar specifika. Akti ka qenë i dobishëm për sigurimin shëndetësor për miliona amerikanë.
Rendi dhe ligji
Harris është përpjekur të krahasojë përvojën si prokurore me faktin se Trumpi është dënuar për një krim.
Trump është zotuar të shkatërrojë kartelet e drogës, ta shtypë dhunën e bandave dhe të rindërtojë qytetet e drejtuara nga demokratët, që thotë se janë të pushtuara nga krimi.
Armët
Harris ka premtuar politika më të ashpra për zgjerimin e kontrollit ose ndalimin e armëve – të cilat do të kenë nevojë për ndihmën e Kongresit.
Trump e ka pozicionuar veten si mbrojtës i palëkundur i Amendamentit të Dytë, të drejtës kushtetuese për të mbajtur armë. Duke iu drejtuar Shoqatës Kombëtare të Pushkës në maj, ai u shpreh se ishte miku i tyre më i mirë.
Marihuana
Harris ka bërë thirrje për dekriminalizimin e marihuanës për përdorim rekreativ. Ajo thotë se shumë njerëz janë dërguar në burg për posedim të vogël të marihuanës dhe flet për numra joproporcionalë të arrestimeve për burrat me ngjyrë dhe ata latinë.
Trump e ka zbutur qasjen dhe ka thënë se është koha për t’iu dhënë fund “arrestimeve dhe burgosjeve të panevojshme” të të rriturve për sasi të vogla të marihuanës për përdorim personal.
