Tre amerikanë që ishin mbajtur në burg në Kinë prej vitesh, janë liruar në një shkëmbim të burgosurish mes Washingtonit dhe Pekinit të mërkurën.
SHBA-ja pati thënë se të tre ishin burgosur padrejtësisht.
“Jemi të lumtur të njoftojmë lirimin e Mark Swidan, Kai Li dhe John Leung nga burgu në Kinë”, ka thënë një zëdhënës i Këshillit të Sigurisë së SHBA-së.
Amerikanët janë liruar në shkëmbim për disa shtetas kinezë e që ishin në mbajtje në SHBA.
Swidan përballej me dënim me vdekje për akuzat për drogë, ndërsa Li dhe Leung ishin burgosur për akuza për spiunim.
Lirimi i tyre bëhet më pak se dy muaj para se presidenti i zgjedhur Donald Trump e merr detyrën. Me rikthimin e tij në Shtëpinë e Bardhë, lideri kinez Xi Jinping ka shprehur shqetësim se premtimet e Trumpit për të vendosur tarifa ndaj mallrave kineze mund t’i pengojnë lidhjet mes dy fuqive ekonomike.
