Kryeparlamentari i Gjeorgjisë i jep miratimin përfundimtar “ligjit rus”

Kryetari i Parlamentit të Gjeorgjisë, Shalva Papuashvili, i ka dhënë miratimin përfundimtar të hënën një projektligjit përçarës të "agjentëve të huaj" që ka shkaktuar javë protestash nga kritikët të cilët thonë se do të kufizojë lirinë e medias dhe do të rrezikojë shanset e Gjeorgjisë për t'u bashkuar me Bashkimin Evropian.

Papuashvili njoftoi se nënshkroi projektligjin pasi legjislatura, e kontrolluar nga partia qeverisëse “Ëndrra Gjeorgjiane”, hodhi poshtë veton e presidentes, Salome Zourabichvili, raporton AP.

Projektligji, i cili u miratua nga Parlamenti muajin e kaluar, kërkon që mediat, organizatat joqeveritare dhe grupet e tjera jofitimprurëse të regjistrohen si "në ndjekje të interesave të një fuqie të huaj" nëse marrin më shumë se 20% të financimit të tyre nga jashtë.

Zourabichvili, e cila është gjithnjë e më shumë në mosmarrëveshje me partinë qeverisëse, vuri veton ndaj saj, duke akuzuar partinë qeverisëse se po rrezikojnë të ardhmen e vendit.

Qeveria argumenton se ligji është i nevojshëm për të frenuar ata që konsideron se janë aktorë të huaj të dëmshëm që përpiqen të destabilizojnë kombin e Kaukazit të Jugut prej 3.7 milionë banorësh, por shumë gazetarë dhe aktivistë gjeorgjianë thonë se qëllimi i vërtetë i projektligjit është t'i stigmatizojë ata dhe të kufizojë debatin përpara zgjedhjet parlamentare të planifikuara për në tetor.

Pas nënshkrimit të projektligjit, Papuashvili ripohoi se qëllimi i tij kryesor është "të rrisë rezistencën e sistemeve politike, ekonomike dhe sociale të Gjeorgjisë ndaj ndërhyrjeve të jashtme".

“Nëse organizatat joqeveritare dhe masmedia duan të marrin pjesë në procesin e vendimmarrjes dhe të ndikojnë në jetën e popullit gjeorgjian me financim nga qeveritë e huaja, ato duhet të përmbushin standardin minimal të transparencës, publiku duhet të dijë se kush qëndron pas secilit aktor”, ka deklaruar ai.

Kundërshtarët e kanë denoncuar legjislacionin si "ligji rus" sepse i ngjan masave të ndërmarra nga Kremlini për të goditur mediat e pavarura të lajmeve, organizatat jofitimprurëse dhe aktivistët.

Kritikët thonë se masa mund të jetë nxitur nga Moska për të penguar shanset e Gjeorgjisë për t'u integruar më tej me Perëndimin.