Kryeministri i ri francez Barnier rrezikon të rrëzohet nga parlamenti

E djathta ekstreme franceze ka konfirmuar se do të paraqesë një mocion mosbesimi për të rrëzuar qeverinë këtë javë, nëse kërkesat e saj për projektligjin e buxhetit për sigurimet sociale të vitit të ardhshëm nuk plotësohen.

Partia “Tubimi Kombëtar” (RN) e Marine Le Pen thotë se do të shpallë mocionin e censurës të hënën pasdite, raporton The Guardian.

Fronti i Ri Popullor (NPR), një koalicion i majtë që përfshin socialistët, të gjelbërit, të majtën e fortë dhe partinë komuniste, ka njoftuar tashmë se do të paraqesë një mocion mosbesimi nëse kryeministri, Michel Barnier, shtyn buxhetin pa votim. 

Jordan Bardella, presidenti i “Tubimit Kombëtar” ka thënë se "pa një mrekulli të minutës së fundit" partia e tij do të kërkojë mocionin.

“Gjithçka që kemi propozuar është në interes të popullit francez. Të gjitha amendamentet që kemi paraqitur në javët e fundit, gjithçka është përçmuar dhe injoruar me vetëdije”, ka thënë Bardella për radion RTL të hënën.

Nëse paraqitet të hënën pasdite, votimi i mosbesimit do të bëhej 48 orë më vonë, të mërkurën. Nëse do të mbështetej nga deputetë të së majtës dhe të djathtës ekstreme, do të kalonte, duke rrëzuar qeverinë më pak se tre muaj pas formimit të saj.

Barnier më pas do të detyrohej të ofronte dorëheqjen e tij, por ai dhe ministrat e tij mund të mbeten në një administratë kujdestare derisa presidenti, Emmanuel Macron, të shpallë një qeveri të re.

Macroni mund t'u kërkojë partive të formojnë një shumicë të re koalicioni ose do të emëronte një qeveri rreptësisht teknokratike, duke sjellë njerëz nga qarqe të jashtme politike për të administruar vendin derisa zgjedhjet e reja legjislative të mund të mbahen në verë. Zgjedhjet e përgjithshme nuk mund të zhvillohet brenda 12 muajve nga votimi i mëparshëm.

Javën e kaluar, Barnier, ish-negociatori i BE-së për Brexit, i cili u emërua nga Macroni në shtator, ka thënë se një votë mosbesimi do të shkaktonte një "stuhi të madhe dhe turbulenca shumë serioze në tregjet financiare".

Franca po shkon drejt kësaj krize politike që kur Macroni thirri zgjedhjet e parakohshme në qershor që lanë parlamentin të ndarë në tri fraksione politike afërsisht të barabarta –  e majta, qendra dhe ekstremi i djathtë, por asnjëra prej të cilave nuk ka një shumicë absolute.

Ngërçi u shkaktua nga qeveria që kërkon të trajtojë deficitin publik në rritje të Francës përmes rritjes së taksave dhe shkurtimeve të shpenzimeve në buxhetin e saj të vitit 2025.

Projektligji i buxhetit të sigurimeve sociale për vitin 2025 është refuzuar nga të dyja palët e spektrit politik, dhe Barnier ka shumë të ngjarë të duhet të përdorë nenin e diskutueshëm 49.3 të Kushtetutës franceze për të shtyrë legjislacionin pa votim.

Barnier argumenton se ai tashmë ka bërë lëshime, duke përfshirë heqjen e një rritje të planifikuar të taksës së energjisë elektrike, por RN-ja thotë se këto nuk janë të mjaftueshme. Kërkon më shumë mbrojtje për familjet, bizneset e vogla dhe pensionistët ndaj masave buxhetore. 

Nëse mocioni i censurës rezulton i suksesshëm, do të ishte hera e dytë që një qeveri franceze rrëzohet që nga viti 1958, kur u formua republika e pestë. Qeveria e Georges Pompidou ishte e fundit që u rrëzua në një mënyrë të tillë në vitin 1962, kur Charles de Gaulle ishte president.