-
Përktheu:
Flutura Gashi-Mehmeti
- 14 prill 2025 16:51
- Shpërndaje në:
Ministri i Jashtëm iranian, Abbas Araqchi do të vizitojë Rusinë këtë javë përpara rundit të dytë të planifikuar të bisedimeve midis Teheranit dhe Uashingtonit, që synojnë zgjidhjen e konfliktit bërthamor prej dekadash të Iranit me Perëndimin.
Araqchi dhe i dërguari i presidentit amerikan Donald Trump për Lindjen e Mesme, Steve Witkoff, zhvilluan bisedime në Oman të shtunën, gjatë së cilës i dërguari i Omanit, Badr al-Busaidi ndërmjetësoi dy delegacionet të ulur në dhoma të ndryshme në pallatin e tij në Muscat, raporton Reuters.
Të dyja palët i kanë përshkruar bisedimet në Oman si "pozitive", megjithëse një zyrtar i lartë iranian i ka thënë Reuters se takimi "kishte për qëllim vetëm vendosjen e kushteve të negociatave të mundshme të ardhshme".
Thuhet se Italia ka rënë dakord të presë rundin e dytë të bisedimeve, por një person i brendshëm i afërt me qeverinë iraniane i ka thënë Reuters se ndërsa SHBA-ja dëshiron takim në Romë, Irani preferon Gjenevën.
Teherani po tregohet dyshues ndaj Trumpit, i cili ka kërcënuar se do të bombardojë Iranin nëse nuk ka marrëveshje.
Uashingtoni synon të ndalojë punën e ndjeshme të Teheranit për pasurimin e uraniumit, e konsideruar nga Shtetet e Bashkuara, Izraeli dhe fuqitë evropiane si një rrugë drejt armëve bërthamore. Irani thotë se programi i tij bërthamor është vetëm për prodhimin e energjisë civile.
Zëdhënësi i Ministrisë së Jashtme iraniane, Esmaeil Baghaei, ka thënë se Araqchi do të "diskutojë zhvillimet e fundit në lidhje me bisedimet e Muskatit" me zyrtarët rusë.
Moska, një palë në paktin bërthamor të Iranit të vitit 2015, ka mbështetur të drejtën e Teheranit për të pasur një program bërthamor civil.
Udhëheqësi suprem i Iranit, Ayatollah Ali Khamenei, i cili ka fjalën e fundit për çështjet jetike të shtetit, nuk ka besim te Shtetet e Bashkuara dhe në veçanti tek Trumpi.
Por Khamenei është detyruar të angazhohet me Uashingtonin në kërkim të një marrëveshjeje bërthamore për shkak të frikës se zemërimi publik në vend për vështirësitë ekonomike mund të shpërthejë në protesta masive dhe të rrezikojë ekzistencën e institucionit klerik, i kanë thënë Reuters në mars katër zyrtarë iranianë.
Gjatë mandatit të tij të parë, Trumpi ka hequr dorë nga pakti bërthamor i Teheranit i vitit 2015 me gjashtë fuqitë botërore në vitin 2018 dhe ka rikthyer sanksionet gjymtuese ndaj Republikës Islamike.
Që nga viti 2019, Irani i ka tejkaluar shumë kufijtë e marrëveshjes së 2015-ës për pasurimin e uraniumit, duke prodhuar stoqe me një nivel të lartë pastërtie të zbërthyeshme, shumë më tepër se ajo që fuqitë perëndimore thonë se është e justifikueshme për një program energjetik civil dhe afër asaj që kërkohet për kokat bërthamore.
