Kina do ta rrisë moshën e pensionimit për shkak të plakjes së popullsisë

Kina do ta rrisë gradualisht moshën e saj të pensionimit në pesë vjetët e ardhshme, në përpjekje për të përballuar popullsinë e saj të plakur dhe sistemin e dobësuar të pensioneve. 

Jetëgjatësia në vend tani është rritur përtej asaj në Shtetet e Bashkuara, në 78 vjet, nga vetëm 36 vjet në kohën e revolucionit komunist në vitin 1949, raporton BBC.

Por mosha e daljes në pension në Kinë mbetet një nga më të ulëtat në botë - 60 vjeç për burrat, 55 vjeç për gratë në punë me jakë të bardhë, dhe 50 për gratë e klasës punëtore. 

Plani për të rritur moshën e daljes në pension është pjesë e një serie rezolutash të miratuara javën e kaluar në një mbledhje pesëvjeçare të nivelit të lartë të Partisë Komuniste, të njohur si Plenumi i Tretë. 
Kina do të ketë 300 milionë pensionistë.

“Në përputhje me parimin e pjesëmarrjes vullnetare me fleksibilitetin e duhur, ne do të çojmë përpara reformën për të rritur gradualisht moshën e pensionit ligjor në një mënyrë të kujdesshme dhe të rregullt”, ka thënë komiteti qendror i partisë në një dokument kyç politikash që thekson reformat. 

Ai nuk specifikoi se sa do të rritet mosha e pensionit dhe deri kur, por një Raport i Zhvillimit të Pensioneve të Kinës i publikuar në fund të vitit 2023 shkruante se "65 vjeç mund të jetë rezultati përfundimtar pas rregullimit". 

Plani ka qenë në plan që disa vite për shkak se buxheti i pensioneve të Kinës po pakësohet. 

Akademia Kineze e Shkencave Sociale e drejtuar nga shteti ka bërë të ditur në vitin 2019 se fondi kryesor i pensioneve shtetërore të vendit do të mbarojë pa para deri në vitin 2035. 

Ky ishte një vlerësim përpara pandemisë Covid-19, e cila goditi rëndë ekonominë e Kinës. Në të njëjtën kohë, popullsia e madhe e vendit ka rënë për të dytin vit radhazi në vitin 2023, pasi niveli i lindjeve vazhdon të bjerë.