Katalanasit votojnë të dielën në zgjedhjet që shihen si çelës për stabilitetin e Spanjës

Katalanasit votojnë të dielën në zgjedhjet rajonale që mund të përcaktojë stabilitetin e qeverisë së udhëhequr nga socialistët e Spanjës, dhe gjithashtu të vlerësojë forcën e një lëvizjeje pro-pavarësisë që ka tronditur vendin për një dekadë.

Një qeveri e udhëhequr nga Partia Socialiste e kryeministrit Pedro Sanchez në Katalonjë pas një dekade qeverish separatiste, do të sillte një epokë të re, ka thënë politologu Toni Rodon, raporton Reuters.

“Nëse separatistët humbasin shumicën e tyre absolute në Parlament, kjo do të përfaqësonte patjetër një ndryshim cikli. Nëse kjo është e përkohshme apo afatgjatë, ne do të shohim”, ka deklaruar Rodon.

Por një fitore e partisë "Junts" do të forconte kauzën separatiste dhe do të krijonte telashe të mëtejshme për Madridin.

Kandidati i "Junts" është themeluesi i saj Carles Puigdemont, i cili ishte presidenti i Katalonjës gjatë një përpjekjeje fatkeqe për të shkëputur rajonin nga Spanja në vitin 2017, mirëpo ai është zotuar të ringjallë përpjekjen për pavarësi.

Që nga marrja e detyrës për një mandat të dytë nëntorin e kaluar, Sanchezi është mbështetur në një aleancë të brishtë me separatistët për të miratuar legjislacionin në Parlamentin kombëtar, duke fituar zemërimin e kundërshtarëve konservatorë.

Puigdemont, i cili u përball me ndjekjen penale në Spanjë për përpjekjen e dështuar të pavarësisë dhe ka jetuar në mërgim, por që do të kthehet së shpejti në shtëpi falë një amnistie të pritshme, ka paralajmëruar se "Junts" mund të tërheqë mbështetjen e tij nëse qeveria e ardhshme katalane është një që ai nuk mund ta pranojë.

Sondazhet e opinionit parashikojnë një epërsi për kandidatin socialist Salvador Illa në zgjedhje, përpara "Junts" dhe rivalit të tij më të moderuar, Esquerra Republicana de Catalunya (ERC), i cili aktualisht qeveris rajonin e pasur verilindor.

Socialistët do të fitojnë 40 vende, me "Junts" që merr 34 vende dhe ERC 26 vende, sipas një sondazhi të gazetës El Pais.

Por disa sondazhe tregojnë gjithashtu se rreth 40% e votuesve janë të pavendosur, kështu që çdo rezultat është i mundur.