Forcat izraelite kanë thënë se kanë gjetur trupin edhe të një pengu që ishte mbajtur në Gazë, raporton “BBC”.
Ushtria izraelite ka konfirmuar se trupi i Ron Benjamin 53-vjeçar është gjetur përkrah trupave të tre pengjeve tjera të gjetura të premten.
53-vjeçari kishte qenë duke kaluar me biçikletë në afërsi të kufirit në Gazë kur Hamasi sulmoi më 7 tetor.
Rreth 1200 persona u vranë në sulmin e Hamasit në jug të Izraelit. U morën 252 pengje.
Zëdhënësi i Ushtrisë së Izraelit, Daniel Hagari, në një postim në platformën “X” ka thënë se inteligjenca e ushtrisë ka zbuluar se Benjamin ishte vrarë më 7 tetor dhe trupi i tij “ishte marrë nga militantët e Hamasit dhe ishte dërguar në Gazë”.
Identifikimin e trupit e ka bërë familja.
Të premten u gjetën trupat e tre pengjeve tjera – Shani Louk, Amit Buskila dhe Itzhak Gelerenter. Edhe për ta u tha se u vranë në sulmin e 7 tetorit.
