Izraeli pranon një dërgesë me bomba të rënda nga SHBA-ja

Izraeli ka marrë një dërgesë me bomba të rënda MK-84 nga Shtetet e Bashkuara, pasi presidenti amerikan, Donald Trump hoqi bllokimin e vendosur mbi eksportin e municioneve nga administrata e paraardhësit Joe Biden, ka bërë të ditur të dielën ministria izraelite e Mbrojtjes.

MK-84 është një bombë 2000 paund, e cila mund të çajë betonin dhe metalin e trashë, duke krijuar një rreze të gjerë shpërthimi, raporton Reuters.

Administrata Biden refuzoi t'i lirojë ato për eksport në Izrael për shkak të shqetësimit për ndikimin në zonat me popullsi të dendur të Rripit të Gazës.

Administrata Biden dërgoi mijëra bomba 2000 paund në Izrael pas sulmit të 7 tetorit 2023 nga militantët palestinezë të Hamasit nga Gaza, por më vonë vendosi të mos lëshonte një nga dërgesat.

Ndalimi u hoq nga Trumpi muajin e kaluar.

Dërgesa e municioneve që mbërriti në Izrael sonte, e lëshuar nga Administrata Trump, përfaqëson një pasuri të rëndësishme për Forcën Ajrore dhe IDF-në dhe shërben si dëshmi e mëtejshme e aleancës së fortë midis Izraelit dhe Shteteve të Bashkuara”, ka thënë ministri i Mbrojtjes, Israel Katz, të shtunën vonë.

Dërgesa mbërriti pas ditësh shqetësimi nëse do të zbatohej një armëpushim i brishtë në Gaza, i rënë dakord muajin e kaluar, pasi të dyja palët akuzuan njëra-tjetrën për shkelje të kushteve të marrëveshjes për të lejuar shkëmbimin e pengjeve të mbajtura në Gaza për të burgosurit dhe të paraburgosurit palestinezë në burgjet izraelite.

Uashingtoni ka njoftuar ndihmë për Izraelin në vlerë miliarda dollarë që nga fillimi i luftës.