Shef i stafit i Ushtrisë së Izraelit, Herzi Halevi, ka thënë se do të ketë reagim ndaj sulmeve që bëri Irani në fundjavë.
Deklaratat e tij vijnë pasi kabineti i luftës i Izraelit është takuar për të vendosur për kundërpërgjigje ndaj Iranit, raporton “BBC”.
Irani lansoi mbi 300 mijë dronë e raketa në drejtim të Izraelit në orët e hershme të së dielës. Shumica prej tyre u shkatërruan.
Halevi ka thënë se Izraeli është duke shqyrtuar hapat e ardhshëm.
Ai ka folur nga baza ajrore Nevatim që ka marrë dëme të vogla nga sulmet.
“Këto sulme me aq shumë raketa, raketa lundruese dhe dronë në territorin e shtetit të Izraelit do të përballen me reagim”, ka thënë Halevi.
E zëdhënësi i Ushtrisë së Izraelit, Daniel Hagari, ka thënë se Izraeli duhet të bëjë çdo gjë që mundet për të mbrojtur shtetin.
Kryeministri izraelit Benjamin Netanyahu u ka bërë thirrje komunitetit ndërkombëtarë që të qëndrojë i bashkuar kundër Iranit.
“Duhet të qëndrojmë të bashkuar kundër agresionit iranian, që rrezikon paqen në botë”, ka shkruar Netanyahu në platformën “X”.
Sipas “The Washington Post”, Netanyahu u ka kërkuar forcave izraelite që të gjejnë shënjestra të mundshme për një sulm izraelit ndaj Iranit.
