Një skandal i madh ka shpërthyer në Kolumbi pas akuzave të rënda të ish-ministrit të Jashtëm, Alvaro Leyva, ndaj presidentit Gustavo Petro. Në një letër të hapur, të publikuar në rrjetin “X”, Leyva e përshkroi presidentin si “narkoman” dhe ngriti shqetësime serioze për gjendjen e tij mendore dhe fizike.
Leyva, i cili ishte pjesë e kabinetit të Petros për gati dy vjet, shpresoi se presidenti i parë i majtë në historinë e Kolumbisë do të ishte “udhëheqës rajonal dhe shpresë globale” kur fitoi mandatin në vitin 2022. Por sipas tij, ajo që ndodhi më pas ishte “shqetësuese dhe konfuzuese” – përfshirë vendime të çuditshme, udhëtime të pakuptimta dhe sjellje të paqëndrueshme.
Akuzat më tronditëse lidhen me një vizitë në Francë në vitin 2023, ku Leyva pretendon se presidenti “u zhduk për dy ditë”, dhe sipas tij, aty e kuptoi se Petro ka problem me varësinë ndaj drogës.
“Ishte në Paris ku pashë me sytë e mi se ju kishit një problem serioz me substancat. Fatkeqësisht, nuk jeni shëruar”, shkruan ai në letrën e tij.
Presidenti Petro reagoi në rrjetet sociale me një ton sarkastik, duke mos e mohuar drejtpërdrejt akuzën, por duke e ironizuar pretendimin se kishte kaluar dy ditë në Paris larg ministrit.
“A nuk është Parisi më interesant se letra e tij? Kam vajza dhe mbesa atje – shumë më interesante për mua sesa të kaloj kohë me të”, ka shkruar Petro.
Letra e Leyvas ka tronditur skenën politike në Kolumbi. Mediat kryesore e kanë vendosur këtë histori në faqet e para, ndërsa komentuesit politikë e quajnë këtë ndër akuzat më serioze të bëra ndonjëherë publikisht nga një ish-zyrtar i nivelit të lartë ndaj një presidenti aktiv.
