-
Përktheu:
Flutura Gashi-Mehmeti
- 24 nëntor 2024 11:48
- Shpërndaje në:
Irani planifikon të mbajë bisedime për programin e tij të diskutueshëm bërthamor, me tri fuqitë evropiane, më 29 nëntor në Gjenevë, ka njoftuar të dielën agjencia japoneze e lajmeve Kyodo, disa ditë pasi mbikëqyrësi bërthamor i OKB-së miratoi një rezolutë kundër Teheranit.
Irani reagoi ndaj rezolutës, e cila u propozua nga Britania, Franca, Gjermania dhe Shtetet e Bashkuara.
Kyodo ka shkruar se qeveria e presidentit iranian, Masoud Pezeshkian po kërkonte një zgjidhje për ngërçin bërthamor përpara inaugurimit në janar të presidentit të zgjedhur të SHBA-së, Donald Trump, raporton Reuters.
Një zyrtar i lartë iranian konfirmoi se takimi do të zhvillohej të premten e ardhshme, duke shtuar se
"Tehrani ka besuar gjithmonë se çështja bërthamore duhet të zgjidhet përmes diplomacisë dhe se Irani nuk është larguar kurrë nga bisedimet".
Në vitin 2018, administrata e atëhershme Trumpit doli nga pakti bërthamor i Iranit i vitit 2015 me gjashtë fuqitë e mëdha, dhe rivendosi sanksione të ashpra ndaj Iranit, duke e shtyrë Teheranin të shkelte kufijtë bërthamorë të paktit, me lëvizje të tilla si rindërtimi i rezervave të uraniumit të pasuruar, rafinimi i tij në pastërti më të lartë të zbërthimit, dhe instalimi i centrifugave të avancuara për të përshpejtuar daljen.
Bisedimet indirekte midis administratës së presidentit Joe Biden dhe Teheranit për të ringjallur paktin kanë dështuar, por Trumpi ka thënë në fushatën e tij zgjedhore në shtator se “duhet të bëjnë një marrëveshje”.
