Iraku akuzon Izraelin se ka shkelur hapësirën e saj ajrore për ta sulmuar Iranin

Iraku ka akuzuar ushtrinë izraelite për shkelje të hapësirës së saj ajrore kur kreu një seri sulmesh ndaj Iranit të shtunën.

Në një deklaratë të hënën, një zëdhënës i qeverisë irakiane ka thënë se Iraku i kishte dërguar një letër proteste Kombeve të Bashkuara për të dënuar shkeljen e supozuar të Izraelit, raporton CNN.

“Qeveria irakiane rikonfirmon angazhimin e saj të palëkundur ndaj sovranitetit, pavarësisë dhe integritetit territorial të Irakut. Nuk do të lejojë që hapësira ajrore ose toka e Irakut të përdoret për sulme ndaj kombeve të tjera, veçanërisht vendeve fqinje me të cilat Iraku ndan respekt dhe interesa reciproke”, ka thënë zëdhënësi Basim Alawdi në deklaratë.

Izraeli ka bërë të ditur të shtunën se kishte goditur objektiva ushtarake brenda Iranit në përgjigje të sulmeve të mëparshme iraniane, duke ngjallur sërish frikën se konfrontimi i gjatë midis dy ushtrive të fuqishme mund të përshkallëzohej në një luftë të gjithanshme rajonale. 

E pyetur nëse kishte përdorur hapësirën ajrore të Irakut, ushtria izraelite ka thënë se nuk mund të shtjellojë përtej asaj që është publikuar tashmë.

Irani më herët pretendoi se Izraeli kishte përdorur hapësirën ajrore të Irakut për të kryer sulmet dhe akuzoi SHBA-në për bashkëpunim. SHBA-ja ka thënë se ishte njoftuar për sulmet, por nuk ishte e përfshirë drejtpërdrejt.

LEXO EDHE: