-
Përktheu:
Flutura Gashi-Mehmeti
- 26 dhjetor 2024 11:45
- Shpërndaje në:
Gatishmëria për të mbështetur Ukrainën "derisa të fitojë" në luftën e saj me Rusinë, ka rënë ndjeshëm në të gjithë Evropën Perëndimore në një kohë kritike për vendin, thotë një sondazh i publikuar së fundmi.
Kjo vjen në kohën kur rikthimi i Donald Trumpit në Shtëpinë e Bardhë ngre pikëpyetje mbi të ardhmen e ndihmës ushtarake amerikane për Kievin, raporton The Guardian.
Sondazhet e dhjetorit nga "YouGov" në Francë, Gjermani, Itali, Spanjë, Suedi, Danimarkë dhe Mbretëri të Bashkuar, zbuluan se dëshira e qytetarëve të tyre për të qëndruar pranë Ukrainës deri në fitore, edhe nëse kjo nënkuptonte zgjatjen e luftës, kishte rënë në të shtatë vendet, gjatë 12 muajve të fundit.
Mbështetja për një zgjidhje alternative të konfliktit, një përfundim i negociuar i luftimeve, edhe nëse kjo e lë Rusinë duke kontrolluar pjesë të Ukrainës, është rritur në çdo vend, zbuloi sondazhi, teksa ky ishte opsioni i preferuar në katër prej tyre.
Sondazhi ka zbuluar pakënaqësi në idenë e një zgjidhjeje të imponuar që do të përfshinte dhënien e territorit nga Ukraina për Rusinë, por gjithashtu besim të përhapur se presidenti i ri i SHBA-së do ta braktisë Ukrainën pas inaugurimit të tij më 20 janar.
Trumpi është mburrur, pa dhënë detaje, se ai mund t'i japë fund luftës "për 24 orë" dhe i dërguari i tij në Ukrainë, Keith Kellogg, do të udhëtojë në kryeqytetet evropiane në fillim të janarit. Analistët kanë shprehur dyshime se presidenti rus, Vladimir Putin, do të hyjë në bisedime për kushte që janë në çfarëdo mënyre të pranueshme për Kievin.
Të dhënat vijnë pothuajse tre vjet pas pushtimit të plotë të Putinit, dhe në një moment kritik për Ukrainën. Këtë vit Rusia ka përparuar me ritmin e saj më të shpejtë që nga pranvera e vitit 2022, kur forcat e saj bënë një përpjekje të pasuksesshme për të kapur Kievin.
Trupat ruse kanë pushtuar disa qytete në rajonin lindor të Donbasit, teksa forcat e armatosura të Ukrainës luftojnë për të mbrojtur vendbanimet urbane përballë mungesës së trupave të vijës së parë dhe epërsisë së vazhdueshme ushtarake të Rusisë.
Sondazhi tregon se gatishmëria për të mbështetur Ukrainën derisa të mundte Rusinë mbeti e lartë në Suedi (50%) dhe Danimarkë (40%).
Gjatë të njëjtës periudhë, përqindjet që thonë se preferojnë një paqe të negociuar u rritën në 55% nga 45% në Itali, 46% (38%) në Spanjë, 43% (35%) në Francë dhe 45% (38%) në Gjermani.
Teksa pritet rikthimi i Trumpit në Shtëpinë e Bardhë, shumica e vendeve, përveç njërit, menduan se ka të ngjarë që presidenti i zgjedhur i SHBA-së të ndërpresë mbështetjen për Ukrainën: 62% e gjermanëve, 60% e spanjollëve, 56% e britanikëve, 52% e francezëve dhe 48% e italianëve.
Sondazhi tregon se shumica e evropianëve perëndimorë mendonin se aleatët e Ukrainës nuk kishin bërë mjaftueshëm, si në aspektin e sanksioneve ekonomike kundër Moskës, ashtu edhe në aspektin e ndihmës ushtarake dhe të tjera për Kievin, për të parandaluar Rusinë të fitonte luftën.
Rreth 66% e danezëve, 63% e suedezëve dhe spanjollëve, 59% e britanikëve, 53% e gjermanëve dhe italianëve dhe 52% e francezëve thanë se ndihma e përgjithshme për Ukrainën nuk ishte e mjaftueshme. Megjithatë, pak menduan se vendi i tyre duhet të rrisë mbështetjen.
