-
Nga:
BBC
-
Përktheu:
Flutura Gashi-Mehmeti
- 22 korrik 2024 08:20
- Shpërndaje në:
Punonjësit e lartë të Shtëpisë së Bardhë dhe stafit të fushatës së Joe Bidenit kishin kaluar javën e kaluar duke këmbëngulur që presidenti do të vazhdonte garën e tij për zgjedhjet e 5 nëntorit, pavarësisht insistimit të hapur brenda Partisë Demokratike që ai tërhiqej.
Deri të shtunën, ndihmësit e presidentit po përgatisin një plan fushate që ai ta niste pas kthimit të tij në Shtëpinë e Bardhë javën e ardhshme. Ai po shërohej nga Covid-19 në shtëpinë e tij në plazh në brigjet lindore të Delaware, duke këmbëngulur se ai do të vazhdonte garën, por i zemëruar pasi një veprim i koordinuar për t'i bërë presion atij për t'u larguar nga disa demokratë filloi të shpërndahej në opinionin publik.
Deri të dielën në mëngjes, presidenti kishte ndërruar mendjen, sipas burimeve të afërta me të.
Të shtunën në mbrëmje, Bideni filloi të mendonte nëse duhet të jetë tërhiqet, një nga vendimet më të vështira në karrierën e tij politike 50-vjeçare. Ai mblodhi një rreth të ngushtë të ndihmësve, ku përfshihen Steve Richetti, një nga këshilltarët më të afërt, Mike Donilon, shefi i strategjisë së tij, Annie Tomasini, zëvendësshefe e kabinetit të tij, dhe Anthony Bernal, shefi i kabinetit të Zonjës së Par,ë Jill Biden.
Bideni dhe ndihmësit e tij diskutuan mbi të dhënat e reja të sondazheve dhe diskutuan nëse ai mund ta mposhtë Donald Trumpin në peizazhin aktual politik.
Përballë të dhënave të reja dhe duke u përballur për më shumë se një javë me presion brenda partisë, presidenti kishte një vendim për të marrë. Ai punoi me Donilon për të hartuar deklaratën publike përmes së cilës do të njoftonte se po i jepte fund kandidaturës, ndërsa Richetti punoi me detajet e publikimit të njoftimit dhe informimit të stafit tjetër.
Bideni mori vendimin përfundimtar se do të largohej të dielën në mëngjes, duke thirrur veçmas shefin e kabinetit Jeff Zients, kryetaren e fushatës së tij Jen O'Malley Dillon dhe zëvendëspresidenten Kamala Harris për t'i informuar ata, kanë thënë për BBC-në burimet e njohura me mënyrën se si rrodhën ngjarjet e së dielës.
Të dielën pasdite, presidenti zhvilloi një video-telefonatë me stafin e tij më të lartë të Shtëpisë së Bardhë dhe të fushatës, duke përfshirë Anita Dunn, e cila menaxhon strategjinë e tij të komunikimit në Shtëpinë e Bardhë. Një minutë më vonë, ai lëshoi një deklaratë publike që shkaktoi valë tronditëse në të gjithë peizazhin politik amerikan dhe përmbysi zgjedhjet e vitit 2024.
“Ai tha se kishte reflektuar mbi këtë gjatë dy ditëve të fundit”, ka deklaruar një zyrtar i lartë i Shtëpisë së Bardhë për BBC.
Megjithëse Bideni nuk e përmendi Harrisin në deklaratën e tij fillestare, ai postoi në Tëitter mbështetjen e tij për zëvendëspresidenten e tij, rreth gjysmë ore më vonë. Të dy kishin folur disa herë gjatë ditës në prag të njoftimit, sipas dy burimeve të njohura me bisedat.
Shumë në Shtëpinë e Bardhë dhe në fushatë nuk ishin të informuar paraprakisht për planet e Bidenit.
Kamala Harris, e cila ka thënë se planifikonte të "fitonte" nominimin presidencial, e kaloi pasditen e së dielës duke thirrur ligjvënësit, përfshirë udhëheqësin e pakicës në Dhomën e Përfaqësuesve Hakeem Jeffrie, zyrtarë kryesorë të partisë dhe guvernatorët për të mbështetur kandidaturën e saj.
Megjithëse ajo tashmë ka fituar mbështetjen e presidentit dhe demokratëve kryesorë, ngjitja e saj në krye të listës nuk është e sigurt derisa delegatët të votojnë për të konfirmuar zëvendësimin e Bidenit në Konventën Kombëtare Demokratike që do të mbahet në gusht.
Veçanërisht, ish-presidenti Barack Obama nuk e ka mbështetur atë në mënyrë eksplicite, ndërsa Bill dhe Hillary Clinton e kanë mbështetur.
