Gjykata në Turqi ka vendosur që zyrtarisht të arrestohet kryebashkiaku i Stambollit, Ekrem Imamoglu, mbi akuzat për korrupsion dhe lidhje me grupe terroriste, raporton "Al Jazeera".
Gjykata tha se Imamgolu dhe të paktën 20 tjerë janë burgosur si pjesë e një hetimi për korrupsion.
Prokurorët të dielën kishin kërkuar që kryebashkiaku i Stambollit, që gjendej në ndalim, të arrestohet zyrtarisht, raporton agjencia “AP”.
Gjykata vendosi pro kësaj dhe Imamoglu është arrestuar ndërsa është në pritje të gjykimit. Një vendim lidhur me akuzat për terrorizëm pritet të merret.
Imamoglu ka mohuar akuzat dhe protestat kundër ndalimit të tij - disa nga më të mëdhatë që vendi ka parë në më shumë se një dekadë - kanë vazhduar për katër net.
Ndalimi i Imamoglut këtë javë ka shkaktuar protesta masive në Turqi. Shumë e shohin arrestimin e tij si tentim për ta larguar Imamoglun nga gara për zgjedhjet presidenciale, që pritet të mbahen më 2028. Imamoglu shihet si rivali kryesor i presidentit aktual Recep Tayyip Erdogan.
Erdogani, nga ana e tij, ka dënuar trazirat dhe ka akuzuar Partinë Republikane Popullore (CHP) të opozitës për përpjekje për të "turbulluar paqen dhe polarizuar popullin".
Policia kishte marrë në pyetje Imamoglun rreth pesë orë të shtunën si pjesë e hetimeve se ka ndihmuar grupin terrorist Partinë e Punëtorëve të Kurdistanit (PKK). Të premten ishte marrë në pyetje për katër orë lidhur me akuzat për korrupsion. Kryebashkiaku i ka mohuar gjitha akuzat.
Ai më pas u dërgua në sallën e gjyqit ku u mor në pyetje nga prokurorët. Është në mesin e afro 100 të ndaluarve.
Për katër netët e fundit, mijëra njerëz kanë dalë në rrugë anembanë Turqisë në demonstrata kryesisht paqësore.
Autoritetet turke kanë njoftuar se 343 persona janë arrestuar të premten mbrëma, në ditën e tretë të protestave, në të gjithë vendin.