(BBC) - Gjashtë spiunë të dyshuar janë arrestuar në Gjermani vetëm këtë muaj, në atë që është shndërruar një lumë akuzash për spiunazh rus dhe kinez.
Për partinë e ekstremit të djathtë “Alternativa për Gjermaninë” (AfD) ka rezultuar veçanërisht e turpshme, sepse dy kandidatët e saj kryesorë për zgjedhjet evropiane të qershorit janë kryqëzuar.
Një ndihmës i eurodeputetit Maximilian Krah, i cili kryeson listën e partisë, është arrestuar me dyshimin se ka spiunuar për Kinën. Jian G akuzohet si “punonjës i një shërbimi sekret kinez”.
Prokurorët kanë nisur gjithashtu hetimet paraprake ndaj vetë politikanit mbi pagesat e supozuara nga burime pro-ruse dhe kineze. Krah mohon çdo keqbërje.
Ditë më parë, Petr Bystron, emri i dytë në listën e AfD-së, mohoi pretendimet se ai kishte marrë para nga faqja e internetit “Zëri i Evropës”, e pretenduar nga inteligjenca evropiane se ka qenë një front i inteligjencës ruse.
Por akuzat shkojnë përtej AfD-së.
Dy shtetas gjermanë me origjinë ruse janë arrestuar me dyshimin se kanë komplotuar për të sabotuar ndihmën ushtarake të Gjermanisë për Ukrainën, ndërsa tre gjermanë janë arrestuar pasi dyshohet se kanë planifikuar të tregojnë dizajne të avancuara të motorëve tek inteligjenca kineze.
“Është vërtet e pazakontë të kesh ndalime të tre rrjeteve gjoja të angazhuara në një lloj spiunazhi për Rusinë dhe Kinën që vijnë pothuajse në të njëjtën kohë”, tha Noura Chalati, një studiuese në Qendrën Leibniz për Orientin Modern.
Në të tre rastet e spiunazhit, përpjekjet e agjencisë së brendshme të inteligjencës gjermane “BfV” besohet të kenë qenë vendimtare.
“Autoritetet tona të sigurisë... kanë forcuar masivisht përpjekjet e tyre kundër spiunazhit”, tha ministrja e Brendshme Nansi Faeser.
Arrestimet u bënë të vështira pas kthimit të kancelarit Olaf Scholz nga bisedimet e gjera me presidentin e Kinës, Xi Jinping në Pekin.
“Arrestimi, gjithmonë vendim politik”
Andrei Soldatov, një ekspert i shërbimeve ruse të sigurisë, beson se rasti i dyshes ruso-gjermane mund të pasqyrojë një dëshirë nga ana e Kremlinit për të përshkallëzuar sulmet ndaj ndihmës për Ukrainën.
“Është vetëm një nivel krejtësisht i ri i përshkallëzimit”, tha Soldatov për BBC-në. “Këta njerëz gjoja mblodhën informacione për të ndihmuar në organizimin e operacioneve sabotuese kundër objekteve ushtarake në tokën gjermane”.
Ndërkohë, Roderich Kiesewetter, një ish-zyrtar i ushtrisë gjermane, i cili tani është deputet i opozitës, pretendoi se Kina po kërkonte të fitonte qasje në kërkime të avancuara që mund të ishin të dobishme për qëllime ushtarake ose të tjera.
“Kina sheh mundësi për të shfrytëzuar hapjen e Gjermanisë për të hyrë në njohuritë dhe teknologjinë tonë”, tha ai për BBC-në.
Një arsye pse vendimi politik mund të jetë marrë është se kundërshtarët e Gjermanisë - veçanërisht Rusia - janë shfaqur gjithnjë e më të prirë për të poshtëruar publikisht Berlinin, pasi ai është bërë më i sigurt në marrëdhëniet e tij me jashtë.
Një pikë veçanërisht e ulët ishte rrjedhja e një telefonate në mars midis gjeneralëve të lartë që diskutonin për furnizimin me raketa me rreze të gjatë Taurus në Ukrainë.
Muaj më parë, një zyrtar i rangut të lartë në shërbimin e inteligjencës së jashtme gjermane “BND” i quajtur Carsten L doli në gjyq, i akuzuar për rrjedhje të informacionit të klasifikuar te rusët në këmbim të pagesave prej rreth 400 mijë euro.
Ish-sekretari i mbrojtjes i Mbretërisë së Bashkuar, Ben Wallace shprehu zhgënjimin e shumë aleatëve kur tha se Gjermania ishte “e ndikuar mjaft nga inteligjenca ruse” dhe s’ishte “as e sigurt dhe as e besueshme”.
Roderich Kiesewetter thotë se ai shqetësohet për aleatët që e shohin Gjermaninë si të pabesueshme.
“Ne duhet të jemi një partner i favorizuar”, tha ai për BBC-në. “Ne nuk mund të përballojmë një bashkëpunim të shërbimeve sekrete pa gjermanë”.
Goditjet goxha publike ndaj spiunëve të dyshuar mund të jenë një mënyrë për t’i dërguar një sinjal si mikut ashtu edhe armikut se Berlini po e merr seriozisht sigurinë.
BND-ja dhe BfV-ja thanë se nuk komentuan mbi operacionet në vazhdim. Ministria e Brendshme nuk iu përgjigj një kërkese për koment.
E kaluara e kësaj historie
Agjencitë e inteligjencës gjermane kanë qenë prej kohësh të frustruara nga kufizimet më të gjera se si mund të veprojnë ndryshe nga homologët e tyre në vende të tjera perëndimore.
Pjesërisht, kjo është një trashëgimi e sundimit komunist në ish-Gjermaninë Lindore - e konsideruar gjerësisht si një nga shoqëritë më të mbikëqyrura në histori. Vlerësohet se një në 6.5 gjermanolindorë ishte informator i policisë sekrete, e njohur si Stasi.
Kur u zbulua shtrirja e spiunimit të Stasit pas rënies së Murit të Berlinit, u vendosën kufizime të forta ligjore për shërbimet e inteligjencës.
Këto kufizime mbeten kryesisht, edhe pse disa janë dobësuar që atëherë.
Mbrojtësit e të drejtave të njeriut i shohin këto kufizime si një gjë të mirë që mbron të drejtën e qytetarëve për privatësi. Por shërbimet e inteligjencës janë ankuar prej kohësh se nuk janë në gjendje të veprojnë në mënyrë efektive për shkak të kontrolleve mbi sjelljen e tyre.
Vitin e kaluar, dy ish-krerë të BND-së shkruan: “Shërbimet gjermane të inteligjencës, veçanërisht BND-ja, tani vuajnë nga mbikëqyrja e tepruar”.
Disa në shërbimet e inteligjencës i shohin arrestimet e fundit të profilit të lartë si një mënyrë për të theksuar shtrirjen e infiltrimit të huaj armiqësor në Gjermani - dhe si një shans për të rritur argumentin e tyre për më shumë fuqi.
Shtrirja e këtij infiltrimi, thotë Kiesewetter, është pjesërisht një trashëgimi e “naivitetit” politik që pasoi fundin e Luftës së Ftohtë.
“Që nga viti 1990 ekzistonte ideja se Gjermania është e rrethuar nga miq”.
Udhëheqësit ishin të përqendruar në marrëveshjet e biznesit, duke përfshirë vendet autokratike si Rusia, dhe ia hoqën vëmendjen sigurisë kombëtare, shpjegoi ai.
“Vendi nuk fle më”
Rafael Loss i Këshillit Evropian për Marrëdhëniet me Jashtë është më specifik për atë që shkoi keq.
Inteligjenca gjermane shkatërroi tërësisht një njësi të dedikuar kundër-zbulimit në vitin 2002 nën kancelarin Gerhard Schroder.
“Është e jashtëzakonshme që e gjithë kjo njësi prej rreth 60 personash u shpërbë plotësisht”, thotë Loss.
Por gjërat po ndryshojnë. Stafi i BfV-së është dyfishuar në 10 vitet e fundit. Vala e fundit e ndalimeve tregon se shërbimet e inteligjencës po bëhen më të sigurta në një vend, kultura politike e të cilit tradicionalisht ka qenë e kujdesshme ndaj tyre.
“Të gjitha arrestimet menjëherë dërgojnë një sinjal të mirë për kombet që na spiunojnë”, tha Felix Neumann nga Fondacioni Konrad Adenauer.
“Gjermania është zgjuar dhe nuk fle më”.
