Franca do të shfrytëzojë asetet ruse për të financuar ndihmën ushtarake për Ukrainën

Franca do të përdorë interesin nga asetet ruse për të financuar 195 milionë euro të tjera armë për Ukrainën, ka thënë ministri francez i Forcave të Armatosura, Sebastien Lecornu në një intervistë për gazetën “La Tribune”.

Franca gjithashtu planifikon t'ia dorëzojë Ukrainës disa nga automjetet e saj më të vjetra luftarake të blinduara, të tilla si AMX-10RC dhe transportuesit e personelit, ka shtuar Lecornu. 

“Falë interesit nga asetet e ngrira ruse, ne do të shfrytëzojmë gjithashtu fonde të reja me vlerë 195 milionë euro”, ka thënë Lecornu, duke shtuar se ato do të përdoren për predha artilerie 155 mm dhe bomba rrëshqitëse për avionët luftarakë Mirage 2000 që Franca ia ka dhënë Ukrainës.

Grupi i Shtatë Fuqive ka rënë dakord vitin e kaluar t'i sigurojë Ukrainës 50 miliardë dollarë nëpërmjet një sërë kredish dypalëshe që Kievi mund të shlyente duke përdorur fitimet e papritura nga 300 miliardë dollarë asete të ngrira shtetërore ruse.