-
Përktheu:
Flutura Gashi-Mehmeti
- 13 shtator 2024 14:15
- Shpërndaje në:
Në Austri po përgatiten thasë me rërë, në Republikën Çeke janë zbrazur rezervuarët, dhe në Poloni priten përmbytje të shpejta, pasi parashikuesit paralajmërojnë ditë me reshje "potencialisht katastrofike".
Kryeministri polak, Donald Tusk ka thënë se nuk ka "asnjë arsye për panik", pasi mori pjesë në një konferencë për rrezikun e përmbytjeve në Wroclaw, pas parashikimeve të reshjeve prej 15 cm në katër provinca jugore, raporton BBC.
Në Austri, shiu i dendur dhe bora në male tashmë kanë çuar në ndërprerje të udhëtimeve, teksa kancelari, Karl Nehammer ka thënë se ushtria ka vënë në gatishmëri deri në 1,000 trupa në raste nevoje.
Kryeqyteti çek nuk po rrezikon, pas përmbytjeve që shkatërruan qytetin dy dekada më parë.
Imazhet e vitit 2002 të stacioneve të metrosë së përmbytur, banorëve që evakuohen në gomone dhe elefantëve që mbyten në kopshtin zoologjik të Pragës, janë ende në kujtesën lokale.
Pak para orës 10:00 të premten, një portë e rëndë prej çeliku, një metër e trashë, mbylli të ashtuquajturin Kanali i Djallit ose Certovka, në lagjen historike të Pragës, Mala Strana.
Portat e Certovka janë pjesë e një rrjeti mbarëkombëtar të mbrojtjes nga përmbytjet, që zyrtarët thonë se kanë kushtuar më shumë se 1 miliard euro, në mënyrë që të parandalojnë një përsëritje të dëmeve katastrofike të viteve 1997 dhe 2002.
Praga shpreson të shpëtojë nga më e keqja e përmbytjeve. Vëmendja është përqendruar këtë fundjavë në pjesët qendrore dhe lindore të vendit, veçanërisht në Moravinë Veriore, ku në vitin 1997 humbën jetën 50 persona.
Malet Jeseniky në Çeki mund të kenë reshje shiu rreth 400 mm gjatë tre ditëve të ardhshme dhe ai ujë më pas do të rrjedhë poshtë lumit Oder dhe do të vazhdojë drejt Polonisë, duke kaluar një numër qytetesh dhe fshatrash gjatë rrugës.
Pasi mori pjesë në një konferencë nga shërbimet e urgjencës në Poloninë jugperëndimore, Donald Tusk u përpoq të siguronte publikun se parashikimet nuk ishin "shumë alarmante" dhe nuk kishte asnjë arsye për të parashikuar ndonjë gjë, në një shkallë që mund të shkaktonte një kërcënim në të gjithë vendin.
“Nëse diçka mund të pritet, dhe për këtë duam të jemi të përgatitur, sigurisht që janë përmbytje të lokalizuara ose të ashtuquajtura përmbytje të shpejta”, ka deklaruar Tusk.
Mijëra banorëve iu desh të përdornin shkallët e blloqeve të tyre të larta të banesave në Wroclaw të Polonisë sepse ashensorët u mbyllën për shkak të frikës nga përmbytjet, raportuan mediat lokale.
Austria përjetoi këtë verë gushtin e saj më të nxehtë, sipas institutit federal “Geosphere Austria”.
Tani paralajmërohet për 10-20 cm reshje shiu në shumë rajone brenda pak ditësh. Në disa vende, është e mundur që të reshurat të shkojnë në nivelin deri mbi 20 cm.
Reshje të dendura të vazhdueshme priten edhe përtej kufirit, në shtetin gjerman të Bavarisë.
