Policia në Korenë e Jugut është në procesin e bastisjes së zyrës presidenciale në Seul, pas përpjekjes së dështuar të presidentit Yoon Suk Yeol për ta imponuar ligjin ushtarak javën e kaluar.
Policia ka thënë se ndërsa kanë pasur qasje në zyrat e shërbimit civil, megjithatë, nuk janë lejuar të hyjnë në ndërtesën kryesore të zyrës së Yoonit, e cila është e bllokuar nga rojet e sigurisë, sipas AFP.
Bastisjet janë zhvillimi më i fundit në atë që ka qenë javë e trazuar në politikën e Koresë së Jugut.
Presidenti Yoon, i cili ka qëndruar në detyrë pavarësisht votimit për shkarkim dhe thirrjeve të shumta që të largohej, po përballet me hetime të shumta, me akuza për kryengritje dhe tradhti.
Ndërkohë, ish-ministri i Mbrojtjes i vendit, Kim Yong-hyun, i cili mori përgjegjësinë për shpalljen e ligjit ushtarak, tentoi vetëvrasje ndërsa ishte në paraburgim të martën mbrëma, ka thënë një zyrtar.
Kim aktualisht po mbahet në një dhomë me roje dhe nuk ka probleme shëndetësore.
Ai u arrestua të dielën.
Shumë zyrtarë të afërt me Yoonin kanë dhënë dorëheqjen pas shpalljes jetëshkurtër të ligjit ushtarak.
Vendi tani është në një gjendje të fluksit politik.
Ligjvënësit e partisë në pushtet u bashkuan për të bojkotuar votimin për shkarkimin e Yoonit si president pasi ai ra dakord të shkurtonte mandatin dhe të mos përfshihej në çështjet e jashtme dhe të brendshme.
Megjithatë, Partia Demokratike e opozitës, e cila ka shumicën në parlament e ka kritikuar marrëveshjen, duke e quajtur atë “kryengritje të dytë të paligjshme, antikushtetuese dhe grusht shteti të dytë”.
Është e paqartë se çfarë autoriteti, nëse ka, ka tani Yoon, dhe protestuesit janë ende në rrugë duke e bërë thirrje që ai të largohet.
