Australia me ligj për ndalimin e rrjeteve sociale për personat nën 16 vjeç

Ministrja e Komunikimit e Australisë, Michelle Rowland ka prezantuar një projektligj në Parlament të enjten, i pari i llojit të tillë në botë, që do të ndalonte personat nën 16 vjeç të kenë qasje në mediat sociale.

Rowland ka thënë se siguria në internet është një nga sfidat më të vështira të prindërve, raporton AP.

Sipas Rowland, TikTok, Facebook, Snapchat, Reddit, X dhe Instagram janë ndër platformat që do të përballeshin me gjoba deri në 50 milionë dollarë australianë për dështime sistematike për të parandaluar fëmijët e vegjël që të kenë llogari në to.

"Ky projektligj synon të vendosë një vlerë të re normative në shoqëri që qasja në mediat sociale nuk është tipari përcaktues i rritjes në Australi. Ekziston një pranim i gjerë se diçka duhet bërë në afatin e menjëhershëm për të ndihmuar në parandalimin e ekspozimit të adoleshentëve dhe fëmijëve ndaj rrjedhave të përmbajtjes të pafiltruara dhe të pafundme”, ka deklaruar ajo në parlament.

Projektligji ka mbështetje të gjerë politike. Pasi të bëhet ligj, platformat do të kenë një vit kohë për të përpunuar se si të zbatojnë kufizimin e moshës.

“Pothuajse dy të tretat e australianëve 14 deri në 17 vjeç kanë parë përmbajtje jashtëzakonisht të dëmshme në internet, duke përfshirë abuzimin me drogën, vetëvrasjen ose vetëdëmtimin, si dhe materiale të dhunshme. Një e katërta janë ekspozuar ndaj përmbajtjeve që promovojnë zakone të pasigurta të të ngrënit”, është shprehur Rowland. 

Një hulumtim i qeverisë ka zbuluar se 95% e kujdestarëve australianë e konsiderojnë sigurinë në internet si një nga “sfidat e tyre më të vështira të prindërimit”.