-
Përktheu:
Flutura Gashi-Mehmeti
- 17 tetor 2024 09:58
- Shpërndaje në:
Australia do t’ia japë Ukrainës 49 tanket e saj M1A1 Abrams, ka bërë të ditur të enjten ministri australian i Mbrojtjes, Richard Marles.
Sipas tij, qeveria australiane ka vendosur t’ia japë Ukrainës shumicën e tankeve të saj M1A1 të prodhuara në Amerikë, të cilat kanë vlerën e 163 milionë dollarëve, raporton AP.
Ato do të zëvendësohen në Australi nga një flotë prej 75 tankesh të gjeneratës së ardhshme M1A2.
“Ne flasim me qeverinë ukrainase në mënyrë të vazhdueshme rreth asaj se si mund t'i mbështesim ata më mirë”, ka thënë Marles për Australian Broadcasting Corp.
Shtetet e Bashkuara kanë dhënë lejen e nevojshme për Australinë për të transferuar tanket në Ukrainë siç kërkohet nga Rregulloret e SHBA-së për Trafikun Ndërkombëtar të Armëve, ka bërë të ditur ministri i
Industrisë së Mbrojtjes dhe Ofrimit të Aftësive, Pat Conroy.
"Ne po punojmë shumë ngushtë me aleatët tanë të SHBA-së për dhurimin e këtyre tankeve”, është shprehur Conroy.
Shtetet e Bashkuara kanë rënë dakord të dërgojnë 31 tanke Abrams në Ukrainë në janar të vitit 2023 pas një fushate agresive mujore nga Kievi, duke argumentuar se tanket ishin jetike për aftësinë e saj për të thyer linjat ruse.
Conroy ka bërë të ditur se Australia nuk ka vendosur kushte specifike se si Ukraina mund t’i përdorte tanket ose nëse ato do ta kalonin kufirin.
“Parimi ynë afatgjatë është se përderisa ato përdoren sipas rregullave ndërkombëtare të së drejtës, nuk ka kushte të tjera”, është shprehur ministri Conroy.
LEXO EDHE:
