-
Përktheu:
Flutura Gashi-Mehmeti
- 12 qershor 2024 19:22
- Shpërndaje në:
Udhëheqësi i Armenisë deklaroi të mërkurën synimin e tij për t'u tërhequr nga një aleancë sigurie e dominuar nga Rusia e disa vendeve ish-sovjetike, ndërsa tensionet janë rritur midis dy aleatëve.
Kryeministri armen, Nikol Pashinyan ka thënë se qeveria e tij do të vendosë më vonë se kur do të largohet nga Organizata e Traktatit të Sigurisë Kolektive (CSTO), një grupim që përfshin Rusinë dhe ish-kombet sovjetike të Azisë Qendrore të Kazakistanit, Kirgistanit dhe Taxhikistanit, raporton AP.
Mes përçarjes në rritje me Rusinë, Armenia ngriu më parë pjesëmarrjen e saj në aleancë, anuloi përfshirjen e saj në stërvitjet e përbashkëta ushtarake, dhe refuzoi samitet e CSTO-s.
Të mërkurën, Pashinyan ka thënë për herë të parë se Armenia do të largohet krejtësisht nga CSTO-ja gjatë një sesioni pyetje-përgjigje në parlament, duke thënë se qeveria do të vendosë më vonë se kur do të bëjë lëvizjen përfundimtare.
Lidhjet e Armenisë me Rusinë, sponsorin dhe aleatin e saj prej kohësh, janë tendosur gjithnjë e më shumë pasi Azerbajxhani zhvilloi një fushatë të rrufeshme ushtarake në shtator për të marrë rajonin e Karabakut, duke i dhënë fund tri dekadave të sundimit separatist etnik armen atje.
Autoritetet armene akuzuan paqeruajtësit rusë që u vendosën në Nagorno-Karabakh pas një rundi të mëparshëm të armiqësive në vitin 2020, se nuk arritën të ndalonin sulmin e Azerbajxhanit. Moska, e cila ka një bazë ushtarake në Armeni, hodhi poshtë akuzat, duke argumentuar se trupat e saj nuk kishin një mandat për të ndërhyrë.
Kremlini, nga ana tjetër, është zemëruar nga përpjekjet e Pashinyan për të thelluar lidhjet e Armenisë me Perëndimin dhe për të larguar vendin e tij nga aleancat e dominuara nga Moska.
Rusia ishte veçanërisht e shqetësuar nga vendimi i Armenisë për t'u bashkuar me Gjykatën Penale Ndërkombëtare, e cila vitin e kaluar paditi Putinin për krime lufte të dyshuara lidhur me veprimet ruse në Ukrainë.
Moska, e zënë me konfliktin ukrainas që ka hyrë në vitin e tretë, ka shprehur publikisht shqetësimin për ndryshimin e Armenisë drejt perëndimit, por ka kërkuar të minimizojë dallimet.
