-
Përktheu:
Flutura Gashi-Mehmeti
- 12 mars 2025 07:54
- Shpërndaje në:
Kryeministri australian, Anthony Albanese, ka thënë të mërkurën se tarifat e SHBA-së për çelikun dhe aluminin australian janë të pajustifikuara, por ka shtuar se qeveria e tij nuk do të hakmerret me tarifa të veta.
Presidenti i SHBA-së, Donald Trump, ka thënë muajin e kaluar se po shqyrtonte një përjashtim nga tarifat për Australinë, një partner i traktatit të tregtisë së lirë që ka tregtuar me Shtetet e Bashkuara me deficit për dekada.
Albanese ka thënë se do të vazhdojë të ndjekë një përjashtim australian.
“Është paralajmëruar se asnjë shteti, pavarësisht nga marrëdhëniet e tij me Shtetet e Bashkuara, nuk i është dhënë një përjashtim. Një vendim i tillë i administratës Trump është krejtësisht i pajustifikuar”, ka thënë Albanese.
“Tarifat dhe përshkallëzimi i tensioneve tregtare janë një formë e vetëdëmtimit ekonomik dhe një recetë për rritje më të ngadaltë dhe inflacion më të lartë. Ato paguhen nga konsumatorët. Kjo është arsyeja pse Australia nuk do të vendosë tarifa reciproke ndaj Shteteve të Bashkuara”, ka shtuar Albanese.
Ministrja e Jashtme e Australisë, Penny Wong, ka thënë ndërkaq se qeveria megjithatë do të vazhdojë diskutimet me SHBA-në për këtë çështje.
SHBA-ja ka rritur zyrtarisht tarifat për të gjitha importet e çelikut dhe aluminit me 25% të mërkurën.
Vendimi i SHBA-së për të mos përjashtuar Australinë u njoftua disa ditë pasi një grindje u bë publike midis Trumpit dhe ish-kryeministrit australian.
Trumpi e ka përshkruar Turnbullin, i cili u largua nga politika në vitin 2018 pasi u përmbys si kryeministër nga qeveria e tij, si një udhëheqës të dobët dhe joefektiv.
LEXO EDHE:
