30 të vrarë nga sulmi izraelit në një zyrë postare në Gaza

Të paktën 30 palestinezë janë vrarë dhe 50 janë plagosur në një sulm izraelit në një zyrë postare që strehonte banorët e Gazës, bënë të ditur mjekët në Gazë. 

Ushtria izraelite pretendon se në këtë sulm ka shënjestruar një anëtar të lartë të Xhihadit Islamik.

Familjet e zhvendosura nga konflikti 14-mujor kishin kërkuar strehim në objektin postar në kampin Nuseirat dhe sipas mjekëve sulmi që ndodhi të enjten vonë e çoi në 66 numrin e të vdekurve brenda ditës në enklavë.

Izraeli ka raportuar  se objektivi i tij ishte një udhëheqës i sulmeve të Xhihadit Islamik ndaj civilëve dhe trupave izraelite dhe e akuzoi grupin militant për shfrytëzimin e infrastrukturës civile dhe popullsisë si një mburojë njerëzore për aktivitetet e tij, raporton Reutes.

Në një deklaratë të ushtrisë izraelite thuhet se po shqyrtohet raporti për numrin e viktimave. 

Nuseirat është një nga tetë kampet historike të Rripit të Gazës. Tani ai është pjesë e një zone të dendur urbane të mbushur me njerëz të zhvendosur nga e gjithë enklava.

Të enjten, dy sulme izraelite në Gazën jugore vranë 13 palestinezë për të cilët mjekët e Gazës dhe Hamasi thanë se ishin pjesë e një force që mbron kamionët e ndihmave humanitare. Ushtria izraelite pretendon se ata ishin militantë të Hamasit që përpiqeshin ta rrëmbenin dërgesën.