14 të plagosur pas sulmit rus me raketë balistike në Odesa

Katërmbëdhjetë persona janë plagosur si pasojë e një sulmi rus me raketë balistike në qytetin ukrainas Odesa, të mërkurën vonë, ka bërë të ditur Shërbimi Shtetëror i Emergjencave i Ukrainës.

"Nova Poshta", kompani e madhe postare ukrainase, përmes një postimi në Facebook ka njoftuar se një nga depot e saj është goditur si pasojë e këtij sulmi.

Sipas "Nova Poshtas" asnjë nga punonjësit e saj nuk është në mesin e të plagosurve, raporton “Associated Press”.

Odesa ka qenë objektiv i shpeshtë i sulmeve ruse, me tetë civilë të vrarë në qytet gjatë dy ditëve të fundit.