12 të vdekur nga helmimi me monoksid karboni në Gjeorgji

Dymbëdhjetë persona kanë vdekur nga helmimi me monoksid karboni në një resort skish në Gjeorgji, ka bërë të ditur policia të hënën.

Trupat e 11 të huajve dhe një shtetasi gjeorgjian u gjetën në një zonë gjumi në një restorant në Gudauri, që njihet si resorti më i madh dhe më i lartë i skive në ish-shtetin sovjetik, sipas zyrtarëve. 

Policia ka thënë se "testet paraprake nuk tregojnë ndonjë gjurmë dhune në trupa" dhe gjithçka dukej se ishte një incident, njoftoi agjencia e lajmeve AFP.

Trupat u zbuluan të shtunën në katin e dytë të një ndërtese ku ndodhet një restorant indian.

Autoritetet kanë hapur një hetim për ngjarjen teksa identiteti i viktimave nuk është bërë ende i ditur.

Gudauri është një destinacion popullor turistik për të apasionuarit pas skijimit dhe snoëboardit, pasi ofron një sërë aktivitetesh sportive dimërore për vizitorët e të gjitha niveleve.

Historia e saj daton në shekullin e 19-të kur njihej si një pikë tregtare në rrugën e lashtë ushtarake gjeorgjiane që lidh Rusinë me Gjeorgjinë.

Gudauri ndodhet në malet e Kaukazit në rajonin Mtskheta-Mtianeti në rreth 2,200 m mbi nivelin e detit dhe është rreth 120 km në veri të kryeqytetit të Gjeorgjisë Tbilisi.