Golden Eagle Ylli e ka fituar ndeshjen e parë gjysmëfinale të plejofit të Superligës së Kosovës në basketboll.
Suharekasit të shtunën në mbrëmje mposhtën kampionen në fuqi të Kosovës, Pejën, me rezultatin 87:84.
Me ndeshjen që u zhvillua në palestrën “Karagaçi”, u shënua edhe nisja e fillimit të gjysmëfinaleve të plejofit.
Gjysmëfinalja tjetër është ajo mes Trepçës dhe Sigal Prishtinës që luhet të dielën në orën 19:00 në palestrën “Minatori” në Mitrovicë.
Ndeshja e parë ishte dramatike dhe ashtu pritet të jenë edhe gjysmëfinalet e tjera.
U vendos në çerekun e katërt.
23:22 mysafirët e fituan periudhën e parë, kurse çereku i dytë u mbyll me rezultatin e barabartë, 19:19.
Në pushim, Ylli shkoi me një pikë dallim, 42:41.
Peja u kthye fuqishëm në çerekun e tretë të cilin e fitoi 30:15. Vizitorët u kundërpërgjigjën në 10-të minutëshin e fundit duke fituar 30:13 dhe iu gëzuan në fund triumfit me tri pikë dallim.
34 sekonda para fundit, Ylli ishte duke fituar me vetëm një pikë dallim, 82:81. Deri në fund ishin më të saktë në aksionet që i patën, derisa te Peja gaboi në aksionet e veta.
Në fitoren e Yllit më i miri ishte Alonzo Verge Jr. Ai ndeshjen e mbylli me 32 pikë, pesë kërcime e katër asistime.
Kapiteni Gëzim Morina u shqua me 17 pikë, dy kërcime e një asistim.
Lojë të mirë patën edhe Jan Palokaj dhe Nate Grimes. Palokaj pati 14 pikë, katër kërcime e një asistim, ndërsa Grimes shënoi 11 pikë e katër kërcime.
Këta katër basketbollistë patën pikë dyshifrore te mysafirët.
Te Peja dyshifror të dyfishtë pati Justin Davis me 22 pikë e 12 kërcime, ndërsa kontribuoi me një asistim. Por pejanëve nuk i ndihmuan as 22 pikët, nëntë kërcimet e dy asistimet e Jimmy Hallit.
Skuadra që shënon tri fitore kualifikohet në finale. Peja për shkak se u rendit e dyta e ka përparësinë e terrenit vendës. Por, është mposhtur në ndeshjen e parë dhe do ta ketë të vështirë avancimin tutje.
Ylli në çerekfinale të plejofit e eliminoi Bashkimin e Prizrenit, duke i realizuar dy fitore.
