Me derbin e madh mes Sigal Prishtinës dhe Pejës hapet xhiroja e pestë e Superligës së Kosovës në basketboll.
Kjo ndeshje zhvillohet të shtunën nga ora 17:00 në Pallatin e Rinisë dhe Sportit.
Prishtina është në seri prej tri fitoreve, ndërsa në xhiron e kaluar e mposhti Trepçën në Mitrovicë. Skuadra prishtinase është e dyta në tabelë me shtatë pikë. Peja ka dy fitore e dy humbje dhe me gjashtë pikë renditet e katërta.
Peja në xhiron e kaluar humbi në shtëpi nga Ylli.
Të premten punën te Peja e nisi trajneri irlandez Daniel Nelson, që zëvendësoi Rami Hadarin. Nelson disa vjet më parë udhëhoqi Rahovecin.
Të shtunën prej orës 19:00 është ndeshja mes Borës e Vëllaznimit.
Derbi tjetër i xhiros së pestë zhvillohet të dielën nga ora 17:00. Në Suharekë takohen Golden Eagle Ylli e Bashkimi.
Ylli ka gjashtë pikë në vendin e gjashtë, përkatësisht bilanc prej dy fitore e dy humbje. Bashkimi ka fituar katër ndeshjet e deritashme dhe udhëheq në tabelë me tetë pikë. Skuadra prizrenase udhëton për tjetër fitore, por suharekasit kërkojnë pikët për vete.
Xhiroja mbyllet me ndeshjen Proton Cable Prizreni – Trepça, që është të dielën nga ora 19:00. Trepça është në seri prej tri humbjeve dhe këtë krizë shpreson ta shfrytëzojë skuadra prizrenase.
