Kryetari i Deçanit, Bashkim Ramosaj, ka kërkuar ndihmë për shuarjen e zjarrit që ka përfshirë një zonë të kësaj komune.
Me anë një të postimi në Facebook pas mesnatës, Ramosaj ka njoftuar se zona e Kullës së Qelisë në Bjeshkët e Deçanit është përfshirë nga flakët, teksa ka kërkuar reagim të menjëhershëm.
Në thirrjen e tij për vullnetarë, Ramosaj ka thënë se pret që nga ora 08:00, të dielën, të bashkohen te stacioni i zjarrfikësve në Deçan.
“Ju bëj thirrje të gjithëve që të bashkohemi në një aksion të rëndësishëm për shuarjen e zjarrit që ka përfshirë zonën e Kullës së Qelisë në Bjeshkët e Deçanit. Situata kërkon reagim të menjëhershëm dhe kontributin e secilit prej nesh. Ftojmë të gjithë vullnetarët që të bashkohen nesër, në ora 08:00, tek stacioni i zjarrfikësve në Deçan. Pajisjet e nevojshme do të sigurohen në terren, por ju rekomandojmë të vini të përgatitur me rroba dhe këpucë të përshtatshme”, ka shkruar ai.
Zjarri në Deçan është nën kontroll, njofton Agjencia e Menaxhimit Emergjent
Agjencia e Menaxhimit Emergjent ka bërë të ditur të dielën se është vërejtur një shtim i zjarreve në nivel vendi.
Në njoftim thuhet se një nga zjarret më të mëdha aktualisht është regjistruar në Komunën e Deçanit, në vendin e quajtur “Çeli”, ku është përfshirë një sipërfaqe me gështenja dhe shkurre.
Sipas agjencisë, zjarri është nën kontroll.
“Pas pranimit të njoftimit, janë mobilizuar forcat e NJPZSH-Deçan dhe NJPZSH-Junik, pjesëtarë nga Agjencia Pyjore si dhe vullnetarë. Ekipet po punojnë intensivisht për shuarjen dhe parandalimin e përhapjes së mëtejshme të zjarrit, aktualisht, zjarri është nën kontroll”, thuhet në njoftim.
Agjencia e Menaxhimit Emergjent ka apeluar për kujdes të shtuar nga të gjithë qytetarët, veçanërisht gjatë stinës së thatë, duke shmangur ndezjen e zjarreve në natyrë dhe duke raportuar menjëherë çdo rast të dyshimtë në numrin emergjent 112.
