Edhe Kurti kërkon largimin e masave
Edhe kryeministri Albin Kurti të shtunën ka kërkuar që masat e Bashkimit Evropian ndaj Kosovës të largohen menjëherë. Kjo kërkesë u bë në takimin që ai pati me presidenten e Komisionit Evropian, Ursula von der Leyen.
Kurti i ka quajtur të padrejta këto masa, ndërkohë që theksoi edhe rëndësinë e marrjes së statusit kandidat të BE-së.
“...kërkova heqjen e plotë dhe të menjëhershme të masave të padrejta të BE-së”, ka shkruar Kurti në X.
Presidentja e Kosovës, Vjosa Osmani, në takim paraprak me Von der Leyen po ashtu kërkoi që masat ndëshkuese të hiqen menjëherë. Por, Von der Leyen ka thënë se Kosovës i duhet ende punë për t’i hequr masat.
Von der Leyen takohet me Kurtin
Photo: Ekonomia Online
Kryeministri Albin Kurti ka pritur në takim presidenten e Komisionit Evropian, Ursula von der Leyen, pas takimit të kësaj të fundit me presidenten e Kosovës.
Takimi i Von der Leyenit me Kurtin është zhvilluar në objektin e Qeverisë.
Von der Leyen ka shkruar në platformën X për takimin me të. Ajo e ka uruar kryeministrin për “sukseset ekonomike në vitet e fundit”.
“Jemi krenarë t’ju mbështesim. Le të punojmë bashkë hap pas hapi për të ardhmen evropiane të Kosovës”, ka shkruar ajo.
Von der Leyen është duke qëndruar në Ballkanin Perëndimor nga 23 tetori, së pari ajo vizitoi Shqipërinë ku u takua kryeministrin dhe presidentin. Më pas shkoi për në Maqedoni të Veriut. Më 25 tetor, ajo ishte Serbi.
Pas Kosovës, Von der Leyen ka shkuar në Mal të Zi.
Von der Leyen: Duhet ende punë për t’i hequr masat ndaj Kosovës
Presidentja e Komisionit Evropian, Ursula von der Leyen, ka thënë se duhet punuar për hapat e mëtejshëm që të arrihet në një pikë ku shtetet anëtare të Bashkimit Evropian të binden për heqjen e masave ndaj Kosovës.
Në një konferencë për media të shtunën në Prishtinë me presidenten Vjosa Osmani, Von der Leyeni ka shtuar se bashkë me udhëheqësit e Kosovës janë të përkushtuar për t’i arritur këto qëllime. Ka vlerësuar si hap pozitiv hapjen e Merdarit për kalimin e mallrave serbe.
“Është shumë e rëndësishme të punojmë së bashku, dhe ne kemi mirëpritur hapjen e kufirit dhe avancimin në CEFTA dhe pas kësaj duhet të punojmë për hapa të mëtejshëm që të arrijmë në një pikë ku mund të hiqen masat dhe kjo do të ndihmojë të binden shtetet anëtare – pasi siç e dini të gjitha shtetet anëtare duhet të jenë dakord për heqjen e masave. Ne të dyja (Von der Leyen & Osmani) jemi të përkushtuara të gjejmë hapat e nevojshëm për të arritur këto qëllime. E rëndësishme ta shohim Kosovën si partneren tonë dhe ta bëjmë të mundur rrugën e Kosovës drejt BE-së”, ka thënë ajo.
Kosova është nën masat e BE-së që nga qershori i vitit të kaluar pas trazirave në veri me kryetarët shqiptarë – për të cilën ndërkombëtarët fajësuan Qeverinë Kurti se nuk ndërmori hapa për ta shtensionuar situatën.
Në konferencë, Von der Leyeni ka theksuar se zgjerimi do të jetë në krye të agjendës në mandatin e dytë si presidente e KE-së dhe se është e përkushtuar që vendeve të Ballkanit Perëndimor t’u sigurojë të gjitha mjetet e nevojshme për anëtarësim në BE.
“E di që viteve të fundit Kosova ka punuar shumë për ta përforcuar demokracinë dhe sundimin e ligjit dhe dua t’iu siguroj juve dhe Kosovës se në mandatin e tim të dytë zgjerimi do të jetë në krye të agjendës. Për mua është njëra prej projekteve më të mëdha. Për këtë arsye do të punojmë bashkë që të vazhdojmë tutje sepse jam e përkushtuar për një të ardhme ku të gjitha shtetet e Ballkanit Perëndimor t’i kenë të gjitha mjetet dhe instrumentet e nevojshme që ta bëjmë këtë realitet”, ka deklaruar ajo.
Presidentja e KE-së lavdëroi punën që ka bërë Kosova për Planin e Rritjes.
“Dua ta theksoj Planin e Rritjes. Plani i Rritjes është i planifikuar t’i sjellë ekonomitë e rajonit më afër tregut të përbashkët. Suksesi i madh i zgjerimit nuk janë vetëm marrëveshjet politike dhe ndarja e vlerave, por edhe prosperiteti ekonomik. Kemi hapur tashmë sektorët e tregut të përbashkët për partnerët e Ballkanit Perëndimor, në mënyrë që kompanitë nga Kosova përshembull mund të kenë qasje në tregun e përbashkët. Për këtë arsye na duhen reformat që të kemi nivel të barabartë të pjesëmarrjes. Këto reforma do të shoqërohen me investime shtesë evropiane. Ka kaluar një vit prej kur kemi filluar ky diskutim, shumica e shteteve e kanë Agjendën e Reformave të gatshme. Kosova ka bërë punë të shkëlqyer në këtë agjendë. Tani mund të fillojmë me parafinancimin e më shumë se 60 mln euro. Është një projekt ku e shohim Kosovën dhe marrëdhëniet me BE-në. Varet nga ne që ta bëjmë realitet”, ka thënë ajo.
Von der Leyeni u pyet për refuzimin për ta takuar Milosh Vuçeviq të premten në Beograd pasi kryeministri i Serbisë takoi ministrin rus paraprakisht. Por foli për presidentin Aleksandar Vuçiq.
“Për mua ishte mesazh i qartë që presidenti i Serbisë më priti në takim, dhe para meje priti në takim kryeministrin e Polonisë dhe e Greqisë, në vend se të shkonte në Kazan. Ishte mesazh shumë i qartë”, ka përfunduar ajo.
Osmani: Është koha e fundit që BE-ja t’i heqë masat e padrejta ndaj Kosovës
Vjosa Osmani
Photo: Alban Bujari
Presidentja e Kosovës, Vjosa Osmani, ka thënë se Bashkimi Evropian duhet t’ia njohë të arriturat Kosovës dhe të ndëshkojë satelitët në Ballkanin Perëndimor që i shërbejnë Rusisë, ndërsa ka përmendur Serbinë.
Osmani ka theksuar se Kosova po vepron me qasjen pro fqinjësisë së mirë e se Serbia duhet të mbajë përgjegjësinë e vet për aktin terrorist në Banjskë në shtator të vitit të kaluar.
“Është fat i keq për sigurinë e rajonit që në Ballkanin Perëndimor një shtet vazhdon të jetë sateliti më i fortë i Rusisë në Evropë, e ajo është Serbia. Është koha e fundit që vendosmëria që BE ka treguar ndaj Rusisë, të tregohet edhe ndaj satelitëve dhe shërbyesve të Rusisë në rajonin tonë. Kjo është me rëndësi sa i përket përgjegjësisë së Serbisë për aktiv e agresionit ndaj Kosovës të kryer përmes forcave paramilitare terroriste në shtator gjë që sipas Shtëpisë së Bardhë ka pasur për qëllim të destabilizojë jo vetëm Kosovën por tërë Ballkanin Perëndimor”, ka thënë presidentja në konferencë me presidenten e Komisionit Evropian, Ursula von der Leyen.
Osmani ka deklaruar se është koha që BE-ja t’i heqë masat ndaj Kosovës, duke shtuar se ato kanë dëmtuar edhe procesin e dialogun.
“Sot kemi nevojë që BE-ja t’i vlerësojë dhe njohë këto arritje. Është koha e fundit që masat e padrejta ndaj Kosovës të largohen përfundimisht. Përveç të padrejta, këto masa po dëmtojnë qytetarët dhe kanë dëmtuar procesin e dialogut duke e bërë atë tërësisht të pabalancuar, pabarabartë dhe të pakredibilitet. Heqja e masave është reflektim i nevojave të të gjithë qytetarëve të Kosovës, por do ishte edhe përgjigje ndaj plotësimit të parakushteve që vetë BE-ja i kishte vënë në raport me Kosovën sa i përket këtyre masave”.
Osmani pret Von der Leyenin
Presidentja e Kosovës, Vjosa Osmani, e ka pritur në takimin presidenten e Komisionit Evropian, Ursula von der Leyen, të shtunën në Prishtinë.
Pas takimit, është paraparë të ketë konferencë për media.
Nga ora 11:00, Von der Leyeni pritet ta takojë Kurtin.
Presidentja e KE-së të mërkurën nisi turneun në vendet e Ballkanit Perëndimor. Vizitoi Shqipërinë, Bosnjën, Serbinë e Maqedoninë e Veriut. Pas Kosovës, do ta vizitojë edhe Malin e Zi.
Von der Leyeni gjatë vizitës është fokusuar më së shumti në procesin e reformave, luftën kundër korrupsionit dhe krimit të organizuar, zhvillimin ekonomik, bashkëpunimin rajonal dhe ndihmën që BE-ja vazhdon t’u ofrojë vendeve të rajonit për të arritur progres në këto fusha.
Qeveria e Kosovës pret që gjatë vizitës së presidentes së KE-së të shtunën, të diskutohet për Planin e Rritjes së Bashkimit Evropian dhe përfitimet për Kosovën.
Policia do të bëjë ndërprerje të përkohshme të trafikut për vizitën e Von der Leyenit
Foto ilustrim
Policia e Kosovës ka kërkuar mirëkuptimin e qytetarëve për ndërprerjet e përkohshme të qarkullimit të trafikut që do të ndodhin gjatë ditës së sotme për shkak të vizitës së presidentes së Komisionit Evropian, Ursula von der Leyen.
Policia ka njoftuar se ndërprerja e përkohshme e trafikut do të bëhet në intervale të shkurta kohor në disa segmente rrugore, ku pritet të kalojë eskorta e presidentes së KE-së.
Gjithashtu, në afërsi të objekteve shtetërore, do të ketë riorientim të trafikut në rrugë alternative, “andaj Policia e Kosovës kërkon mirëkuptim të plotë nga ana e qytetarëve dhe pjesëmarrësve në trafik”.
