Sulmet e qenve endacakë në Prishtinë nuk kanë të ndalur

Derisa po shëtiste me qenin e tij në parkun e fëmijëve pranë shkollës “Ismail Qemali” në Prishtinë, Erblin Hoxha është kafshuar nga një qen endacak. Sulmi ka ndodhur pasditen e së martës në lagjen Bregu i Diellit në kryeqytet.

Në një prononcim për KOHËN, Hoxha ka thënë se po konsideron të ngrejë padi ndaj Komunës së Prishtinës në lidhje me këtë rast.

“Një qen endacak më ka kafshuar te parku i fëmijëve që është pranë shkollës ‘Ismail Qemali’ në Breg të Diellit. Rasti ka ndodhur sot (e martë) dikur rreth orës 16:30 apo 17:00. Nesër po mendoj të ngre padi ndaj Komunës në lidhje me këtë rast... jam duke e konsideruar këtë veprim”, ka thënë Hoxha teksa ka ndarë fotografi që shfaqin lëndimet e rënda që ka marrë në këmbë.

Rastet e sulmeve nga qentë endacakë në Prishtinë nuk janë të pakta. Ditë më parë, punonjësi i KOHËS, Fidan Imeri, u sulmua nga qentë endacakë derisa po ecte në oborrin e Universitetit të Prishtinës.

Si zgjidhje kundër sulmeve nga qentë endacakë, Komuna ka menduar të hapë pika ushqyese në zonat ku ka pasur sulme. Pas hapjes së 18 pikave ushqyese për qentë endacakë të premten, kryetari Përparim Rama ka thënë se në zonat ku ka pika ushqyese nuk ka pasur sulme të qenve endacakë, dhe për këtë ka deklaruar se janë marrë menjëherë masa që të ngrenë pika në të gjitha zonat e qytetit.

KUJDES, PAMJE TË RËNDA!

{gallery}