Shukri Buja, ish-komandanti i UÇK-së për Zonën e Nerodimes, ka njoftuar se ka udhëtuar për në Hagë pasi është ftuar nga Dhomat e Specializuara.
Buja në një postim në Facebook ka thënë se ka udhëtuar pa dëshirën e tij, pasi ka marrë ftesë me detyrim të paraqitjes.
“Të nderuar bashkëluftëtarë, miq dhe dashamirë, të nderuar qytetarë! Me ftesë nga Dhomat e Specializuara të Kosovës me seli në Hagë, sot pa dëshirën time, me ftesë të detyruar të paraqitjes, udhëtova për në Hagë. UÇK-ja ishte e shenjtë, ishte kundër pushtuesit, falë luftës së saj të armatosur dhe falë përkrahjes së aleateve në veçanti nga SHBA-të ne e gëzojmë lirinë sot. Lufta çlirimtare në Kosovë ishte e imponueshme, e domosdoshme dhe e drejtë, ngaqë ishte e drejtuar kundër një pushtuesi, i cili përpiqej me zjarr dhe hekur të kryente spastrimin e përgjakshëm etnik të Kosovës. Lufta çlirimtare solli lirinë dhe pavarësinë që shumë po e gëzojnë sot, ndërsa bijtë më të mirë të këtij vendi u akuzuan dhe po mbahen padrejtësisht në burg. Besoj në pafajësinë e bashkëluftëtarëve!” – ka shkruar ish-kryetari i Lipjanit në Facebook.
Buja ishte intervistuar më herët nga Dhomat e Specializuara në Hagë. Ai kishte qenë në Hagë në korrik të vitit 2019. Buja kishte konfirmuar për KOHËN atëbotë se më 17 korrik ishte ftuar si i dyshuar në Hagë.
Aktakuza e ZPS-së në rastin ndaj Hashim Thaçit, Kadri Veselit, Rexhep Selimit e Jakup Krasniqit, i referohet Shukri Bujës si komandant i Zonës Operative të Nerodimes. Versioni më i ri i saj, i publikuar më 2022, e përmend atë si pjesë e “ndërmarrjes së përbashkët kriminale" bashkë me të akuzuarit, me Fatmir Limajn, Sabit Gecin e të tjerë.
Sipas aktakuzës së Speciales, Buja bashkë me Limajn ka marrë pjesë në arrestimin e ndalimin e personave që janë mbajtur në Llapushnik gjatë luftës.
Burime të KOHËS thanë se Buja pritet të paraqitet para gjykatës brenda ditësh.
