Dhomat e Specializuara të Kosovës në Hagë kanë vendosur që të shtyjnë për të hënën me 9 dhjetor 2024, paraqitjen e parë të Isni Kilaj në çështjen ku ai po akuzohet së bashku me Hashim Thaçin, Bashkim Smakajn, Fadil Fazliun dhe Hajredin Kuçin për pengimi të drejtësisë.
Kjo kërkesë është bërë nga avokati i Kilajt, i cili e përfaqësonte atë që prej shkuarjes së tij të parë në Hagë.
Seanca pritet të hënën të mbahet duke filluar nga ora 13:00, raporton “Betimi për Drejtësi”.
Ndërkohë ish-këshilltari i Thaçit për siguri, Bashkim Smakaj është i akuzuari që e ka nisur paraqitjen e parë në Speciale.
Kur u pyet nëse dëshiron të deklarohet lidhur me akuzat, ai kërkoi që të konsultohet me avokatin e tij.
Pas Smakajt para gjyqtares së procedurës paraprake të dielën pritet të paraqitet Fadil Fazliu.
Smakaj, që më herët e ka udhëhequr edhe Agjencinë e Kosovës për Inteligjencë, tha pas konsultimit me mbrojtësin e tij nuk do të deklarohet.
"Nuk i kam të gjitha materialet e nevojshme për tu deklaruar sot", ka thënë Smakaj.
Gjyqtarja Majorie Maselot ka vendosur si për Thaçin, ashtu edhe për Smakajn që ata të jenë në paraburgim deri në vendimin e radhës, në kuadër të afatit ligjor, brenda dy muajsh ose edhe më herët.
Ndryshe Bashkim Smakaj, Fadil Fazliu dhe Isni Kilaj u arrestuan më 5 dhjetor në Kosovë dhe u transferuan në objektin e paraburgimit në DHSK-së të premten më 6 dhjetor në bazë të aktakuzës së konfirmuar dhe fletarrestimeve të lëshuara nga Haga.
Ndërsa, Thaçit i është dorëzuar fletarrestimi në objektin e paraburgimit në Hagë më 5 dhjetor 2024, gjithnjë sipas njoftimit të DhSK-së.
Kurse, Hajredin Kuçit i është dorëzuar aktakuza e konfirmuar dhe fletëthirrja për t’u paraqitur para gjykatëses së procedurës paraprake për paraqitjen e parë e cila pritet të mbahet të hënën me 9 nëntor.
Sipas aktakuzës, Thaçi individualisht dhe përmes veprimeve të përbashkëta me grupet; Grupi Fazliu (Fadil Fazliu dhe Fahri Fazliu), Grupin Smakaj (Bashkim Smakaj, Blerim Shala dhe Artan Behrami) si dhe Grupin Kilaj (Isni Kilaj dhe Vllaznim Kryeziu), kanë ndjekur një model të sjelljes për të penguar personat zyrtarë në kryerjen e detyrave zyrtare.
Në aktakuzë thuhet se Thaçi ka udhëhequr dhe marrë pjesë në këto përpjekje përmes vizitave të tij në objektet e paraburgimit gjatë kohës sa ishte i paraburgosur në kuadër të gjykimit të tij për krime lufte dhe krime kundër njerëzimit.
Aty thuhet se anëtarët e Grupit Fazliu, Grupit Smakaj dhe Grupit Kilaj u koordinuan për të ndikuar në dëshmitarët e ZPS-së gjatë vizitave jo të privilegjuara të datave 2 korrik, 9 shtator dhe 6 tetor 2023.
Si rrjedhojë, ndaj Thaçit rëndojnë tri akuza për pengim të personit zyrtar në kryerjen e detyrave zyrtare, tri për shkelje të fshehtësisë së procedurës dhe katër akuza për mosbindje ndaj gjykatës.
Ndërsa, Kilaj, Smakaj dhe Fazliu akuzohen për tentativë të pengimit të personave zyrtarë në kryerjen e detyrave zyrtare dhe mosbindje ndaj gjykatës. Kurse, Kuçi i ka dy akuza për mosbindje ndaj gjykatës.
