Sërish vandalizohen tabelat me emërtime edhe në shqip të vendbanimeve

Disa nga tabelat me emërtime edhe në shqip të vendbanimeve në veri janë vandalizuar sërish. 
Atyre mbi emrin në shqip u është vendosur nga një stiker me emrin e vendbanimit të shkuar me alfabet cirilik.

Këtë për KOHËN e ka konfirmuar zëvendësdrejtori i Policisë për veri, Veton Elshani. 
“Kemi informata që janë vendosur disa stikersa në tabelat e vendbanimeve, një gjë e tillë po ndodh në vazhdimësi”, ka thënë Elshani. 

Tabelat e komunikacionit, në të cilat emërtimet e vendbanimeve në veri janë shkruar edhe në gjuhën shqipe, u patën vendosur nga autoritetet e Kosovës më 14 mars. 

Por menjëherë emërtimet në shqip u patën ngjyrosur me të zezë.