Rama për “dridhjen” që SHBA-ja ia bëri BE-së: Shumë e mirë, Evropa duhej shkundur

Kryeministri i Shqipërisë, Edi Rama, ka thënë se ajo që po ndodh së fundi në marrëdhëniet mes SHBA-së dhe Bashkimit Evropian, është shumë e mirë, pasi “Evropës i duhej një shkundje”.

Rama ka folur në një tryezë në kuadër të Konferencës së Sigurisë në Munih, ku ishte në panel me komisioneren për zgjerim Marta Kos dhe me kryeminsitrin e Maqedonisë së Veriut, Hristijan Mickoski. 

“Pas asaj çfarë kam parë në dy ditët e fundit në këtë çati, mund të them se Netflix mund të bënte dy seriale një për BE-në e një për SHBA-në...Ajo çfarë po ndodh mendoj se është një gjë jashtë mase e mirë, sepse unë e shoh nga kjo pjesa e Evropës që nuk është në BE. Ne jemi E pa B dhe i shohim gjërat paksa më ndryshe. Është një gjë shumë e mirë që ka ndodhur, sepse Evropa duhej shkundur në një mënyrë të tillë, që t’i humbte gjumi për ca kohë dhe të shohim çfarë del nga kjo”, ka thënë Rama. 

Ai tha se BE-ja duhet ta ndajë mendjen për atë që po ndodh. Ai ka thënë se ndonëse qëndrimi i BE-së për ritmin e përafrimit me Ballkanin Perëndimor po ndryshon, prapë është shumë ngadalë. Ai ka thënë se procezi i bazuar në merita, duhet të jetë vetëm sa i përket të drejtës së votës së shteteve anëtare në Këshillin Evropian. 

“Mendoj që Europa, BE duhet të ndajë mendjen për atë çfarë po ndodh sepse ka ndryshuar sa i takon qëndrimit kundrejt nesh dhe ka ndryshuar sa i takon ritmit të përafrimit me Ballkanin Perëndimor. Por ajo çfarë po ndodh është që ndryshon shumë ngadalë e shumë pak. Mund të flasim gjithë ditën për procesin bazuar në meritë, por besoj që ka ardhur koha të bëjmë një ndarje shumë të qartë e shumë të menjëhershme. Procesi i bazuar në meritë duhet të jetë vetëm për një gjë, për të drejtën e votës në Këshillit Europian”, tha Rama.

E komisionerja për zgjerim Kos ka thënë se zgjerimi nuk ndikohet nga ajo çfarë bën SHBA-ja, por nga situata gjeopolitike. Ajo ka thënë se zgjerimi është elementi më i rëndësishëm politik i garancisë së sigurisë dhe se kjo është arsyeja pse vendet duan t’i bashkohen BE-së. 
 

Rama: Nuk marrim refugjatë palestinezë

"Nuk kuptova pse më kërkuat dëshpërimisht që të isha pjesë e këtij paneli për Lindjen e Mesme”. Kjo ishte ndër fjalitë e para që kryeministri shqiptar, Edi Rama, tha gjatë aktivitetit të zhvilluar në kuadër të Konferencës së Sigurisë në Mynih, me titull: "Përtej konfliktit: Vlerësimi i rrugëve dhe pengesave që çojnë drejt paqes së qëndrueshme në Lindjen e Mesme”, pasditen e së shtunës.

Lufta në Gazë ishte tema e këtij takimi, në të cilin njerëz nga politika, bota akademike, shoqëria civile dhe media kishin mbushur thuajse të gjithë sallën në "Amerikahaus” në Mynih.

Në panel ishin lajmëruar si folës edhe kancelari austriak Alexander Schallenberg dhe ministri i Jashtëm i Arabisë Saudite, Faisal Bin Farhan Al Saud, të cilët e anuluan ardhjen në çastet e fundit dhe u zëvendësuan nga politikani gjerman Armin Laschet, i partisë CDU dhe ish-kryeministri i Libanit, Najib Mikati.

Paneliste ishte edhe Suzanne Maloney, zëvendëspresidente dhe drejtuese e programit të Politikës së Jashtme "Brookings Institution” në SHBA, eksperte e Lindjes së Mesme dhe kryesisht Iranit, njëkohësisht ish-këshilltare e rajonit për qeveritë republikane dhe demokrate në Shtetet e Bashkuara të Amerikës.

Palestinezë në Shqipëri?

Presidenti amerikan, Donald Trump, tha pak ditë më parë gjatë një konference për shtyp se Shqipëria është në listën e vendeve që ai po merr në konsideratë për dërgimin e refugjatëve palestinezë.

"Asnjë nuk na ka pyetur nga administrata Trump, por dhe nëse do të na pyesin – çka nuk është e logjikshme, sepse ne jemi në mes të Evropës dhe si mund të vijnë tek ne qindra-mijëra vetë… - gjithsesi kjo është pjesë logjistike dhe ne jemi një vend i vogël. Por kjo nuk ka për të ndodhur, të paktën jo gjatë qeverisjes sime”, u shpreh Rama.

Duke sjell në vëmendjen e të pranishmëve mikpritjen e hebrenjve gjatë Luftës së Dytë Botërore, pranimin e 7 mijë muxhahedinëve dhe strehimin e afganëve që u larguan pas rikthimit në pushtet të talebanëve në vitin 2021 dhe që u strehuan në Shëngjin, ku ende vazhdon të jetë një pjesë e tyre, Rama deklaroi se situata me palestinezët është ndryshe.

"Ne na vjen shumë keq për këta njerëz të cilët janë viktima të një prej diktaturave më të egra që ka ekzistuar ndonjëherë, që është Hamasi, por ne nuk jemi pjesë e kësaj historie dhe nuk do të jemi kurrë”, deklaroi Rama, duke theksuar se edhe shifrat kanë rëndësi.

Ideja e Trumpit për strehimin e palestinezëve në vende të ndryshme të botës shihet si diçka krejtësisht e gabuar edhe nga Suzanne Maloney. "Nuk është aspak normale që këta njerëz të largohen me forcë nga toka e tyre”, u shpreh ajo.

"Nga dega në degë”

Ish-kryeministri libanez Mikati tha se "BE-ja ka lënë një vakum shumë të madh në Lindjen e Mesme” dhe se drejtuesit e BE-së duhet të jenë më të pranishëm në rajon. Laschet nga ana e tij komentoi se "Evropa nuk mund të ndihmojë, por duhet të jetë pjesë e procesit”.

Rreth një muaj më parë, ministrja e Jashme gjermane, Annalena Baerbock vizitoi Sirinë, vend i dalë nga një luftë e gjatë dhe pushteti shtypës i Bashar Al-Asad. Ky takim u soll si shembull pozitiv i rolit dhe mbështetjes evropiane në Lindjen e Mesme, gjë për të cilin Rama, nuk ra dakord.

E teksa Laschet mbrojti rolin e Gjermanisë dhe Bashkimit Evropian në rajon, Rama habiti të gjithë të pranishmit në sallë duke e reduktuar kryediplomaten gjermane tek pamja e saj e jashtme. "Ajo është e bukur” ishte komenti i Ramës për vizitën e ministres Baerbock në Siri.

Pjesën më të madhe të kohës së panelit kryeministri shqiptar e kaloi duke dalë krejtësisht nga tema.

Rama u përqendrua sërish tek BE-ja dhe duke ironizuar mënyrën e funksionimit të saj, tha se BE-ja është një strukturë e cila sipas tij "shpik çdo javë normativa dhe rregullore të reja”.