Komuna e Prishtinës ka prezantuar programin e ri të mësimit gjithëditor në pesë shkollat e kryeqytetit, qëllim i të cilit thuhet se është përmirësimi i cilësisë së arsimit dhe avancimi i aftësive të fëmijëve përmes aktiviteteve jashtëkurrikulare.
Gjatë prezantimit të këtij programi, kryetari i Prishtinë, Përparim Rama, ka theksuar se kjo do të ketë ndikim edhe te prindërit, pasi nuk do të kenë nevojë t’i marrin fëmijët në mesditë.
“Mbi te gjitha do të ketë me pak stres te prindërit sepse nuk kanë nevojë të shkojnë t’i marrin fëmijët në shkollë. Prindërit munden me u fokusu diku tjetër dhe jo të shkojnë t’i marrin në mes të ditës. Mësimi tërëditor i bënë më të përmbushur edhe prindërit dhe fëmijët”, ka deklaruar Rama.
Drejtoresha e Arsimit, Jehona Lushaku-Sadriu, ka thënë se qëllimi i këtij programi është ngritja e cilësisë dhe shndërrimi në model për komunat tjera.
“Qëllimi është ngritja e cilësisë së arsimit dhe të jetë edhe model në komunat tjera. Ka edhe shtete qe e praktikojnë mësimin tërëditor nga 1 deri 5. Kemi siguruar mjete dhe do t’ju mundësojmë që korrikula bazë të realizohet në mënyrë më kreative. Kemi marre sportist në mënyrë qe t’i realizojmë në mënyrë profesionale lëndën e sportit”, është shprehur ajo.
Shkollat e kryeqytetit që do të fillojnë më mësimin tërëditor nga shtatori i këtij viti janë: “Faik Konica”, “Xhemail Mustafa”, shkolla “Model”, shkolla “E Gjelbër” dhe ajo “Nazim Gafurri”./EO
