Presidenca e Kosovës ka paralajmëruar padi për shpifje ndaj Bedri Elezit, i cili e akuzoi presidentet Vjosa Osmani, për siç ka thënë “negocim për lirim të agjentëve të BIA-s”.
Këshilltari i presidentes Bekim Kupina, ka shkruar në Facebook duke thënë se kjo është një gënjeshtër e pastër.
“Presidentja Osmani nuk ka negociuar për lirim të agjentëve të BIA-s, ndaj kjo është gënjeshtër e pastër e individit Bedri Elezi, për ç’ gjë Presidentja menjëherë do të përgatisë padi. Ky deklarim i pavërtetë dhe skandaloz, përbën shpifje të rëndë. Deklarime të tilla, cenojnë jo vetëm kredibilitetin e shtetit, por edhe sigurinë kombëtare”, ka shkruar Kupina.
Ai ka thënë se shpifjeve të tilla, presidentja do t'u përgjigjet nëpërmjet rrugës ligjore.
“Njëkohësisht, presidentja u bënë thirrje Policisë dhe Prokurorisë që urgjentisht të ndërmarrin masa, bazuar në raportet e shumta të institucioneve të sigurisë, të cilat dëshmojnë aktivitetin e vazhdueshëm të individit Bedri Elezi në dëm të sigurisë kombëtare”, ka shkrua Kupina.
Elezi në një postim në Facebook ka shkruar se “presidentja Vjosa Osmani, dyshohet se ka negociuar lejimin e largimit të anëtarëve BIA-së në rastin e Banjska”.
