Që nga viti 2003, mësimdhënësit kanë përdorur presionin sindikal për të arritur qëllimin që lidhet me pagën. Historia e grevave tregon se jo në shumë raste, qëllimet janë arritur. Raporti: D. Fazliu & F. Abazi
D. Fazliu & F.Abazi
Kërkesa për rritje pagash, mësimdhënësit bashkë me Sindikatën e Bashkuar të Arsimit, kanë pasur ndër vite, që nga paslufta. Jo rrallëherë, ato kanë synuar t’i arrijnë edhe me grevë.
Një muaj e një javë, punonjësit e arsimit e bllokuan procesin mësimor në vitin 2022. Asokohe, u kërkua rritja e pagës për 100 euro. Qeveria ofroi opsionin e shtesës mujore prej 50 eurosh për tre muaj, por fillimisht nuk u pranua nga sindikalistët.
Ish-zëvendësministri i arsimit, Xhavit Rexhaj, në një intervistë në emisionin “60 Minuta”, tha se greva e paralajmëruar edhe tani, mund të interpretohet si e motivuar politikisht.
“Çdo veprim para fushate ose pas fushate elektorale doemos që do të ketë premisa të politizimit apo të përdorimit në luftën për pushtet, qoftë prej SBASHK-ut, opozitës apo prej Qeverisë. Veprime të tilla, në kohë të fushatës zgjedhore, ju kujtohet kontrata me SBASHK-un për kontratën kolektive, e dimë se çfarë pasojash ka sjellë ajo marrëveshje”, theksoi Rexhaj
Sindikalistët e arsimit edhe gjatë mandateve të shkuara, nëpërmjet presionit sindikal arritën qëllime që lidhet me pagën.
Gjysmëvjetori i dytë i vitit 2019, i gjeti profesorët në greva. Pas saj, u bënë ndryshime në Ligjin për pagat, me qëllim të rritjes së koeficientit për ta.
Megjithëkëtë, ligji nuk hyri në fuqi, meqë Gjykata Kushtetuese fillimisht e pezulloi, e më pas edhe e shpalli kundërkushtetues.
Ish-zëvendësministri Rexhaj thotë se grevat janë pasojë e veprimeve të qeverive.
“Në këtë situatë kemi ardhur për shkak se çështjet e mësimdhënësve nuk janë me prioritet dhe nuk janë me program, por gjithmonë trajtohen me imponim, por trajtohen vetëm kur ka greva dhe për çështje të zgjedhjeve”, deklaron Rexhaj.
Për njohjen e kontributit të mësimdhënësve në vitet 1989-99 është bojkotuar mësimi edhe në vitin 2016.
E për rritje të pagave, mësimdhënësit grevuan edhe në 2015-n.
Grevë disajavëshe për ngritje të pagave ka pasur edhe në vitin 2003.
Ani pse shumë nxënës humbën mësimin atëkohë, pagat mësimdhënësve u ishin ngritur vetëm për shtatë euro.
