Komisioni Qendror i Zgjedhjeve (KQZ) ka njoftuar se sot (e martë) nis procesi i numërimit të votave të kandidatëve për deputetë.
KQZ-ja njoftuar se gjatë këtij procesi do të bëhet verifikimi i rezultateve të subjekteve politike, ashtu siç parashihet me Rregulloren Zgjedhore të KQZ-së për Qendrat Komunale të Numërimit.
Ky institucion ka njoftuar se pas përfundimit të këtyre procedurave do të bëhet numërimi i votave nga diaspora, i votave me kusht, i personave me aftësi të kufizuara si dhe i aspekteve të tjera.
Deri më tani KQZ-ja ka numëruar votat në 99.17 për qind të vendvotimeve. Nga 2533 vendvotimeve, janë procesuar 2512 vendvotimeve.
Sipas rezultateve aktuale preliminare të KQZ-së kryeson Lëvizja Vetëvendosje me 40.83 për qind të votave, pasuar nga PDK-ja me 22.15 për qind dhe LDK-ja me 17.59 për qind.
Koalicioni AAK-Nisma-Konservatorët-Intelektualët gjendet në vendin e katërt me 7.47 për qind të votave.
Lista Serbe ka marrë 4.43 për qind të votave e Koalicioni për Familjen 2.26 për qind.
Në rezultatet preliminare të KQZ-së nuk janë përfshirë votat me kusht, ato të personave me aftësi të kufizuara dhe votat e mërgatës.
