Politikani Ali Lajçi u cilësua si frymëzim në rrugën për lirinë, drejtësinë dhe barazinë, në ditën kur në Kuvendin e Kosovës u bënë homazhe në përkujtim të tij.
Kryeministri Albin Kurti ka deklaruar se Lajçi nuk është ndalur nga rinia në veprimtari dhe çështje kombëtare.
“Qysh nga rinia e hershme nuk u ndalë asnjëherë në veprimtari për çështjen kombëtare. Është përpjekur shumë. Ka vuajtur shumë. Na ka mësuar se si duhet atdheu me punë e angazhim, në beteja me sakrificë. Na buzëqesh përjetësisht nga fotografia, përgjithmonë na frymëzon për rrugën e lirisë, drejtësisë dhe barazisë. Përkulem me mall për Bacën Ali, kryetarin e Pejës dhe deputetin e Republikës, Ali Lajçi!”, ka thënë Kurti, thuhet në njoftimin e Zyrës e Kryeministrit.
Presidentja e Kosovës, Vjosa Osmani, ka thënë se ish-kryetari i Pejës dhe ish-deputeti i Kuvendit do të mbahet mend për aktivitetin e tij të pareshtur patriotik përgjatë luftës.
Homazhe për politikanin nga Peja kanë bërë edhe parti opozitar.
Kreu i Aleancës për Ardhmërinë e Kosovës (AAK), Ramush Haradinaj, ka thënë se kujtimi për Lajçin do të jetë i paharrueshëm.
“Sot në Kuvendin e Kosovës, bashkë me kolegë nderuam veprimtarin e çështjes kombëtare, Ali Lajçi. Me këtë rast i shpreha ngushëllime bashkëveprimtarëve dhe familjes Lajçi. I paharrueshëm kujtimi për atdhetarin, Ali Lajçi”, ka shkruar ai në Facebook.
E, kreu i Lidhjes Demokratike të Kosovës (LDK), Lumir Abdixhiku, ka thënë se Lajçi ishte ndër figurat më emblematike të lëvizjes kombëtare për liri, pavarësi e demokraci.
“Kontributi i tij në orët më të rënda për vendin mbeten shtyllë e një Kosove të zhvilluar, progresive dhe demokratike. Si deputet i Kuvendit të Kosovës dhe si kryetar i komunës së Pejës ushtroi me mburrje dhe dinjitet funksionin e tij, në shërbim të qytetarëve. I tillë do të kujtohet përherë. Pusho në paqe”, ka shkruar LDK-ja në Facebook.
