Kuvendi nuk ka kuorum për votimin e marrëveshjes me Bankën Botërore

Ka nisur seanca e Kuvendit të Kosovës, por në mungesë kuorumi votimi i marrëveshjes me Bankën Botërore për ndërtimin e hekurudhave është shtyrë për më vonë. 

Ndërsa në Kuvend po debatohet lidhur me "Marrëveshjen bilaterale me qeverinë e Kosovës dhe Luksemburgut për programin për mbështetje shëndetësore pjesa dy".

Ministri i Financave dhe Transfereve Hekuran Murati ka thënë se ‘projektligji për plotësim ndryshimin e ligjit për ratifikimin e marrëveshjes bilaterale me Luksemburgun për projektin e bashkëpunimit për programin për mbështetje shëndetësore pjesa dy”.

“Miratimi i këtij ligji bën të mundur që të zbatohet marrëveshja e nënshkruar në qershor të këtij viti. Ky propozim synon që përmes kontributit për zhvillim të mbështesë zbatimin e programit për reformimin e sektorit të shëndetësisë. Kjo do të mundësoj ngritjen e shërbimeve shëndetësore dhe përmirësimin e funksionimit të institucioneve shëndetësore” ka thënë më tutje Murati.

Ndërsa deputetja Fatmire Kollçaku ka thënë se Komisioni për Shëndetësi ka propozuar miratimin e këtij projektligji.

“Projektligji ka rëndësi të madhe për përmirësimin e sistemit të shëndetësisë në Kosovë. Në emër të GP LVV i ftoj gjithë deputetët që në zbatim të Kushtetutës ku parashihet që të gjitha marrëveshjet ndërkombëtare të kalojnë në Kuvend dhe them se miratimi mundëson zbatimin e marrëveshjes me Luksemburgun. Pra, objektiva është në bashkërendim me programin e qeverisë për sektorin e shëndetësisë, për riorganizimin e reformimin e këtij sektori. Konsiderojmë që nuk ka asnjë arsye që ky projektligj të mos përkrahet” është shprehur ajo..

Por deputeti nga PDK Bedri Hamza në seacën e Kuvendit ka thënë se PDK po kërkon më shumë transparencë sa i përket borxhit publik.

“Duke i parë ambiciet e qeverisë që brenda një viti të rrisë borxhin publik për gjysmë miliardi. Kjo tregon se do t’i ngarkojmë gjeneratat e reja me këto pa asnjë sqarim. Ne si GP kemi kërkuar dhe po insistojmë të kërkojmë më shumë transparencë e më shumë llogaridhënie dhe më shumë përgjegjësi për ngarkimin e gjeneratave të reja me borxh publik. Ne këto po i diskutojmë në komisioi dhe derisa po vazhdon kjo situatë nuk mundemi me e përkrah. Ne kërkojmë më shumë detaje dhe kemi të drejtë për këtë. Nëse rritet borxhi publik për 500 milionë euro dhe nuk kemi transparencë” është shprehur Hamza.

E mbështetje këtij projektligji nuk i ka dhënë as AAK.

“Kolegu Pal Lekaj ka kërkuar që ky borxh publik të bëhet brenda ligjeve në fuqi. Kërkojmë që të ulemi dhe të shohim se a është ky program në përputhje me kornizat buxhetore. E dyta, siç po shihet ne në sallë nuk i kemi as 80 deputet e ajo që dua të ngris këtu është që a duam të vendosim që mos me u votu apo me i votu. Dua të di a janë 80 deputet në sallë dhe sa dimë që qëndrimi i PDK-së është i njëjtë me të AAK-së. Çështja e tretë, kur flasim për një konsensus politik në vend është në rregull të kemi një debat, në seancën e fundit kemi pas një debat por, ministri nuk na ka bindë”ka thënë Besnik Tahiri Shef i GP të AAK-së.