Kryeministri i Kosovës, Albin Kurti, iu ka shprehur ngushëllime familjeve të viktimave që humbën jetën nga përmbytjet në Spanjë.
Ai ka shkruar në rrjetin social X se Kosova qëndron me Qeverinë dhe popullin e Spanjës që po përballen me përmbytje shkatërruese dhe vdekjeprurëse.
“Mendimet tona janë me qeverinë spanjolle dhe popullin e Spanjës ndërsa përballen me përmbytjet vdekjeprurëse dhe shkatërruese. Kosova u dërgon ngushëllime familjeve të viktimave të shumta dhe solidarizohet me komunitetet e prekura, si dhe me reaguesit e emergjencës në përpjekjet e tyre të palodhura për të ndihmuar”, ka thënë Kurti.
Mediat ndërkombëtare kanë raportuar se deri më tani janë regjistruar 51 persona të vdekur nga përmbytjet.
Ndërsa, Ekipi që e përfaqësoi Kosovën në garën në “Fia Motorsport Games” në Valencia gjatë fundjavës, është bllokuar në aeroportin e këtij qytetit spanjoll.
