Të mërkurën në orën 12:30 do të mbahet protesta e organizuar nga Sindikata e Bashkuar e Arsimit, Shkencës dhe Kulturës (SBASHK) në Prishtinë. SBASHK-u ka njoftuar se në mesin e kërkesave janë ngritja e pagave, nënshkrimi i kontratës kolektive dhe diskutimi me ministren e Arsimit, Arbërie Nagavci.
Kryesindikalisti Rrahman Jasharaj ka deklaruar se kryeministri Albin Kurti dhe ministrat kanë premtuar shumë, por s’e respektuan zërin sindikal dhe “paralizuan dialogun e mirëfilltë”.
Ai ka shtuar se ministri i Financave, Hekuran Murati, do të kujtohet si person që deshi t’ua ndalte bukën e gojës mësimdhënësve “pse kërkuan mundësinë për një kafshatë bukë më shumë”.
“Ministri Murati do të kujtohet në kujtesën e punëtorëve të arsimit si personi që deshi t’ua ndalë bukën e gojës, pse kërkuan mundësinë për një kafshatë bukë më shumë. Në betejën e vazhdueshme të Qeverisë me SBASHK-un mori pjesë aktive edhe ministrja Nagavci, ajo u mbush me inat pse SBASHK është kaq unik u angazhua për ta dobësuar SBASHK-un, por kurrë nuk ia arriti”, është shprehur Jasharaj.
SBASHK-u ka kërkuar edhe përmirësimin e kushteve në institucione arsimore.
“1. Duam nënshkrimin e Kontratës Kolektive. 2. Ministre reflekto, fillo dialogun. 3.Duam ngritje dinjitoze të pagave. 4. SBASHK-u është zëri ynë-dëgjojeni! 5.Ministre a fole ndonjëherë në Qeveri për kërkesat tona? 6.Kur mungon dialogu, mungon demokracia. 7.Mos na mohoni kontributin e viteve të 90-ta. 8.Nuk lejojmë të bëhen ndryshime të ligjeve në dëm të punëtorëve të arsimit. 9.Pensionistët ju arsimuan e ju po i ndëshkoni. 10.Duam përmirësimin e kushteve të punës në institucione arsimore. 11. E shenjtë është puna e mësuesit në edukimin e brezave. E të tjera në këtë frymë”, thuhet në njoftimin e Sindikatës në Facebook.
MASHTI: Diskutimi për kontratën kolektive s’duhet të jetë i njëanshëm dhe i margjinalizuar
Ministria e Arsimit, Shkencës, Teknologjisë dhe Inovacionit ka njoftuar për takimin e të martës me përfaqësuesit e Sindikatës së Bashkuar të Arsimit, Shkencës dhe Kulturës (SBASHK).
Ministria ka thënë se mbetet gjithmonë e hapur për të diskutuar dhe bashkëpunuar me SBASHK-un në përputhje me zhvillimin dhe ngritjen e cilësisë së arsimit në Kosovës dhe të trajtohen bashkërisht çdo nismë ligjore brenda infrastrukturës ligjore të Kosovës.
“Dokumentet dhe iniciativat për ndryshime legjislative duhet të trajtohen brenda kornizës ligjore, pasi çdo qasje e njëanshme mund të shkaktojë përçarje në kolektivat e mësimdhënësve nëpër shkolla, të pengojë mbarëvajtjen e procesit mësimor dhe të mos kontribuojë në objektivin e përbashkët për rritjen e cilësisë në arsim. Siç dihet, gjatë qeverisjeve të kaluara, në periudha zgjedhore, janë nënshkruar marrëveshje të shumta me sindikatën, të cilat kanë prodhuar pasoja juridike me të cilat institucionet tona vazhdojnë të përballen. Prandaj, një gabim i tillë nuk do të përsëritet. Çështja e pagave për mësimdhënësit është rregulluar me Ligjin për Pagat në Sektorin Publik (08/L-196) dhe përcaktohet nga ligji vjetor i buxhetit. Rrjedhimisht, rritja e koeficientit përfshin edhe mësimdhënësit. Sa i përket kontratës kolektive, diskutimi nuk duhet të jetë i njëanshëm dhe as i margjinalizuar. Ky diskutim mund të zhvillohet nga BSPK dhe Këshilli Ekonomik Social në nivel qeveritar, sapo të krijohen kushtet e përcaktuara me ligj. Ministria e Arsimit, Shkencës, Teknologjisë dhe Inovacionit mbetet gjithmonë e hapur për të diskutuar dhe bashkëpunuar me SBASHK-un në përputhje me zhvillimin dhe ngritjen e cilësisë së arsimit në Kosovë, si dhe për trajtimin e përbashkët të çdo nisme ligjore brenda infrastrukturës ligjore të Republikës së Kosovës”, thuhet nga MASHT-i.
SBASHK ka njoftuar se takimi mes përfaqësuesve të sindikatës dhe ministres së Arsimit, Arbërie Nagavci, s’ka prodhuar rezultat. Të mërkurën do të mbahet protestë e SBASHK-ut para Ministrisë së Arsimit e më pas para Qeverisë.
Nesër protestë, SBASHK: Takimi me Nagavcin pa asnjë rezultat
Sindikata e Bashkuar e Arsimit, Shkencës dhe Kulturës ka thënë se takimi me ministren e Arsimit, Arbërie Nagavci, nuk ka prodhuar asnjë rezultat, andaj protesta e paralajmëruar për të mërkurën do të mbahet.
Në takim me ministren ka qenë kryetari i SBASHK-ut, Rrahman Jasharaj, nënkryetarja Vjollca Shala, sekretari i përgjithshëm, Ymer Ymeri, dhe zyrtari ligjor Blendor Shatri.
Në njoftimin e kësaj sindikate thuhet se ky ishte një takim i shkurtër dhe se ka përfunduar pa ndonjë rezultat. SBAShK ka ripërsëritur se nesër do të mbahet protestë dhe siç thuhet në njoftim, Këshilli Drejtues do të vendosë edhe për veprimet tjera sindikale.
“Ishte ky takim i shkurtër dhe ka përfunduar pa as edhe një rezultat ngase Ministrja Nagavci nuk pati gatishmëri të bisedoj konkretisht për kërkesat legjitime të anëtarësisë që SBASHK i ka bërë publike tani e sa kohë”.
“SBAShK shpreh keqardhje për këtë qëndrim të Ministres Nagavci dhe prandaj nesër do të mbahet protesta e 4 paralajmëruar dhe Këshilli Drejtues do të vendosë edhe për veprimet tjera sindikale. SBASHK uron që nesër në kuadër të protestës përfaqësues të MASHTI-t të takohen me udhëheqës të protestës në përpjeke për të arritur marrëveshje të pranueshme për të dy palët”, thuhet në njoftimin e SBASHK-ut.
