Jasharaj flet për rrezikun e mbylljes së shkollave shkaku i largimit të nxënësve

Sindikata e Bashkuar e Arsimit, Shkencës dhe Kulturës (SBAShK) ka kërkuar nga Ministria e Arsimit, që në bashkëpunim me Drejtoritë Komunale të Arsimit dhe prindërit të krijohet një platformë në nivel vendi, e cila do t’i adresonte sfidat në arsim, e sidomos rrezikun e mbylljes së shkollave si shkak i largimit të nxënësve.

Kryetari i SBAShK-ut, Rrahman Jashari në një intervistë për Ekonomia Online, ka thënë se gjendja në sektorin e arsimit në Kosovës është e keqe për dy arsye. E para sipas tij, për shkak të uljes së natalitetit dhe për shkak të ikjeve nga vendi për një jetë më të mirë në shtetet e Bashkimit Evropian. Ai ka thënë se si shkak i kësaj në viset rurale ka tendenca për mbyllje të shkollave dhe duhet një angazhim më i madh që punëtorët e arsimit të mos mbesin pa vende pune.

“E kemi një gjendje të keqe në sektorin e arsimit, për dy momente. Për shkak të natalitetit që vazhdon të ulet në Kosovë, por edhe për shkak të ikjeve, gjegjësisht shkuarjeve në vendet e tjera për një jetë më të mirë dhe kjo ka prekur edhe sistemin arsimor. Gjatë vitit të kaluar shkollor jemi marr me këtë çështje dhe kishim informacione të cilat mund t’i quaj jo të verifikuara se po shtohet numri i atyre që largohen. Kam fjalën kërkesat që ishin për pushim sipas ligjit, një vit pa pagës, dhe ne kishim frikë se njerëzit tanë e marrin këtë pushim, shkojnë dhe e provojnë fatin jashtë dhe nëse atje stabilizohen nuk kthehen. E kishim frikën sidomos për kuadrot që i quajmë të lëndëve shkencore, teknologjisë, matematikës dhe lëndëve të tjera. Ne publikuam përmes mediave edhe shifrat e para që i përmendëm nga raportet tona 300 dhe pritëm që ministrja Arbërie Nagavci dhe Ministria të reagojnë. Do të ishim të lumtur po të na demantonte, mirëpo heshtja e Ministrisë tregon se këtu ka të vërteta. Fatkeqësia jonë është se ajo që dihet në viset rurale, kemi tendenca për mbyllje të shkollave dhe ne jemi kujdestar të situatës dhe luftojmë dhe angazhohemi që punëtorët e arsimit, që pa fajin e tyre ju ndodh kjo situatë me mbyllje paralelesh apo shkolla në tërësi, të mos mbesin pa vende pune”, ka thënë Jasharaj. 

Ai tha se deri më tani shteti dhe SBAShK-u janë kujdesur që mësimdhënësit të mos mbesin pa punë si shkak i mbylljes së shkollave. Por ai ka theksuar se duke marr parasysh gjendje aktuale të largimit nga vendi situata do të ndryshojë dhe do të ketë mbyllje të shkollave, raporton EO.

“Deri më tani nuk e kemi këtë situate edhe shteti është kujdes, por edhe SBAShK-u është kujdestar i saj. Nuk kemi ndonjë shifër që tregon se dikush ka mbetur pa punë për shkak të mbylljes së shkollave. Mirëpo kjo gjë nuk mund të ndodhë pa kufij dhe unë mendoj se shteti ynë, Qeveria, qoftë kjo, qoftë qeveri që vjen në zgjedhjet e shkurtit, duhet të ulet dhe ta bëjë një platformë për nivel vendi, të mos na ndodhi siç ndodhi dikur në Kamenicë. Ta marrim një vendim të bazuar në nivel vendi ku do të përfshiheshin të gjitha palët, MAShTI, Qeveria, prindërit dhe SBAShK”, tha Jasharaj.