Arbëri

Inflacioni po e “lehtëson” shportën

Çmimet e produkteve të konsumit, gjatë vitit të shkuar shënuan rritje vjetore prej 1.1 për qind, treguan të dhënave të Agjencisë së Statistikave. Teksa qytetarët ankohen për kosto zor të përballueshme, në Shoqatën “Konsumatori” thonë se nga kjo gjendje preket më së shumti shtresa e mesme

Pemët, perimet, qumështi e uji janë vetëm disa nga produktet, çmimi i të cilave u rrit gjatë vitit 2024, tregojnë të dhënat e Agjencisë së Statistikave.

Sipas këtyre të dhënave, çmimet u rritën për 1.1 për qind në bazë vjetore e 0.7 për qind në atë ditore.

Këtë rritje të çmimeve, qytetarët e kualifikuan të papërballueshëm.

“Po me përballu e përballojmë, por me vështirësi shumë të mëdha, sepse edhe ngritja e çmimeve, pastaj edhe kinse po e them në thonjëza ngritja e rrogave, shportën e konsumatorit e ka lehtësuar. E ka lehtësuar në kuptimin negativ, sepse është më e lehtë nëse e bartë nga marketi për me e dërgu deri në shtëpi”, tha një nga ta.

E, Bajram Krasniqi, një qytetar tjetër, është shprehur se çfarëdo ngritje çmimi ka ndikim të madh tek qytetarët.

“Nëse e shikojmë personalisht ndoshta nuk ka ndikuar aq shumë, por në përgjithësi ndikojnë, sepse tek ne është shumica e popullsisë në një gjendje jo të mirë ekonomike dhe ndikojnë, sepse këto janë të konsumit të përditshëm”, ka thënë ai.

Njohësi i ekonomisë, Fidan Qerimi, thotë se inflacioni global, lufta në Ukrainë e rritja e kërkesave janë disa nga indikatorët që kontribuuan në rritjen e çmimeve të konsumit dhe si rrjedhojë edhe në varfërimin e popullatës.

“Aftësia e pagesës së konsumatorëve është e njëjtë, kurse çmimet janë më të larta dhe ne nuk mundemi me i plotësu të gjitha kërkesat që i kemi pasur më herët. Kjo bënë që të rritet varfëria dhe në anën tjetër për ata që i mbulojnë gjërat elementare”, ka thënë Qerimi.

E udhëheqësi i shoqatës “Konsumatori”, Selatin Kaçaniku, thotë se nga ngritja e çmimeve dhe inflacioni goditet më së shumti shtresa e mesme e qytetarëve.

“Inflacioni ta ketë së paku edhe një shifër, edhe një zero. Nëse është po e zëmë 1 për qind, 1.1 për qind, realisht është 11 për qind, për arsye sepse neve po na hyjnë në hak me komponente të produktit, me sasi të produktit, me vëllim të produktit, me peshë të produktit, me cilësi të produktit, me siguri të produktit e shumë gjëra të tjera”.

Sipas raporteve të fundit të ASK-së, gjatë vitit 2024 shkalla e inflacionit ka qenë rreth 1.6 për qind.