Ambasadori i Gjermanisë në Kosovë, Jorn Rohde, e ka dënuar ashpër sulmin në rrjetin e ujësjellësit të Ibër-Lepencit në fshatin Varagë të Zubin-Potokut.
Ai ka theksuar se Gjermania mbështet autoritetet e Republikës së Kosovës.
“E dënoj fuqishëm sulmin në kanalin e ujit në Zubin-Potok që prek komunitetet përreth Kosovës. U bëjmë jehonë thirrjeve për hetim të plotë dhe vënien e autorëve para drejtësisë. Gjermania është e gatshme të mbështesë autoritetet kosovare”, ka shkruar Rohde në platformën X.
Të premten ka ndodhur një shpërthim në rrjetin e ujësjellësit të Ibër-Lepencit në fshatin Varagë të Zubin-Potokut - më pak se 24 orë pas sulmit me granatë dore në ndërtesën e Komunës në Zveçan - duke shkaktuar dëme të konsiderueshme në kanalin e ujit të Ibër-Lepencit, duke rrezikuar kështu furnizimin me ujë dhe rrymë në vend.
Autoritetet qendrore të Kosovës, për sulmin që kanë cilësuar terrorist, e bëjnë përgjegjëse Serbinë. Sulmet janë dënuar edhe nga SHBA-ja e BE-ja.
E, të martën granata dore ishin hedhur në oborrin e stacionit policor në Zveçan.
I strongly condemn the attack on the water canal in Zubin Potok that affects communities across Kosovo. We echo calls for full investigation and bringing perpetrators to justice. Germany stands ready to support Kosovan authorities. https://t.co/XyRgGTpStu
— Ambassador Jörn Rohde (@GermanAmbKOS) November 29, 2024
