Ministrja e Punëve të Jashtme, Donika Gërvalla, është shprehur se akterë brenda Bashkimit Evropian po punojnë për ndarjen e komunitetit serb në Kosovë, pasi u pyet për vendimin e KE-së që qytetarëve në Kosovë me pasaporta serbe t’iu hiqen vizat.
Sipas Gërvallës, vendimi i BE-së është i gabueshëm, duke shtuar se vetëm integrimi i serbëve lokalë është hapi i duhur.
“Për pasaportat që nuk lëshohen nga institucione legjitime ne s’kemi hezituar dhe t’i paralajmërojmë e informojmë akterët e rëndësishëm. Ata (BE) kanë marrë një vendim që jo vetëm sipas mendimit tonë, çon në rrugë të gabuar, por bën të kuptosh se disa akterë në BE s’janë të interesuar në integrimin e pakicës serbe në Kosovë, por punojnë në ndarjen e tyre. Integrimi sa më i shpejtë i qytetarëve në struktura legale të pajisur me dokumente legale, çon në atmosferë e në hapësirë për të gjithë ata e për të gjithë ne”, ka deklaruar ajo të mërkurën në një konferencë për media.
Ministrja e Jashtme ka shtuar se Kosova nuk duhet të heshtë “përpara këtyre hapave të gabueshëm dhe të mos përsëriten”.
Gërvalla për çështjen e Faton Hajrizit: Gjithçka që ka ndodhur në Serbi është në mjegull
Ministrja e Jashtme e Kosovës, Donika Gërvalla, ka thënë se nuk ka asnjë garancë se personi që është vrarë në Serbi të premten është Faton Hajrizi.
Gërvalla ka thënë se deri më tash kanë pranuar shenjat e gishtërinjve, të cilat pas verifikimit janë përputhur me ato të Faton Hajrizit, të arratisurit nga burgu i Smrekonicës.
“Nuk kemi asnjë garancë që bëhet fjalë as për personin e vrarë, e as për ndonjë prej pretendimeve tjera. Deri tash çdo gjë që ka ndodhur në Serbi është në mjegull. S’mund t’u themi qytetarëve se kemi informata të sakta, nuk fshehim asnjë informacion. Kjo është gjendje. Nuk dua të paragjykojë asgjë që ka ndodhur në Serbi, pasi jam shumë e sigurt se nuk e dimë të gjithë të vërtetën. Të presim se si do të rrjedhë. I kemi bërë thirrje bashkësisë ndërkombëtare dhe misionave diplomatike, përfshirë edhe Zyrës së BE-së në Beograd që të ndihmojë në sqarimin e kësaj çështje dhe zbardhjen e të vërtetës”, ka thënë Gërvalla në konferencë për media.
Të premten autoritetet serbe kanë njoftuar se kanë vrarë një person të dyshuar për vrasjen e një polici serb. Nuk e ka konfirmuar identitetin, por po të premten ishte thënë se po kërkohej Faton Hajrizi si i dyshuar.
