Avokati i Popullit, Naim Qelaj, ka deklaruar se Qeveria e Kosovës nuk i ka qartësuar qëllimet dhe interesin publik për çështjen e shpronësimeve të tokave në veri, duke thënë se procedurat nuk ekzekutivi nuk janë përmbushur tërësisht.
Ai ka thënë të hënën në “60 Minuta” të KTV-së se kanë kërkuar sqarime nga Qeveria për vendimin mbi shpronësimin e parcelave në Leposaviq e Zubin-Potok, por që s’kanë marrë përgjigje specifike mbi kërkesën.
“Kemi marrë sqarime, në vendim përmenden projektet infrastrukturore, por ky term është i gjerë që nuk specifikon se çka do të arrihet me këto shpronësime. Edhe Kushtetuta e Ligji për shpronësim kerkon nga Qeveria që ta bëjë të qartë arsyen e shpronësimit, e kjo nuk ka ndodhur”, ka deklaruar Qelaj.
Avokati i Popullit ka theksuar tutje se çdo shkelje e parimeve të vendosura për shpronësimit paraqet problem në respektimin e të drejtave të njeriut, e sipas tij, institucioni i Avokatit të Popullit nuk përzihet në punët e gjyqësorit mbi këtë çështje.
“Ne duhet të sigurohemi në respektimin e të drejtave të pronarëve për këto shpronësime. Ka ndodhur dëgjimi publik, është lejuar ankimimi e edhe e drejta për kompensim, por e vetmja çështje që nuk është kryer është që s’është bërë i qartë qëllimi i shpronësimit. Në mungesë të këtij parimi ne s’i dimë parimet e tjera”, ka shtuar Qelaj.
